फुटबलप्रति बालबालिकाको बढ्दो उत्साह
धनकुटाः धनकुटा–१ हिले स्थित डनबस्को स्कुलमा कक्षा ७ मा अध्ययरत ११ वर्षीय गरिमा कार्की हिजोआज बिहान सबेरै उठ्छिन् । लगत्तै फुटबलको जर्सी र बुट लगाएर नजिकैको टुँडिखेलतर्फ दौडिन्छिन् । सोही स्कुलको कक्षा ५ मा अध्ययरत युनिक राई पनि उज्यालो नहुँदै टुँडिखेल पुगिसक्छिन् । पछिल्लो एक महिनायता कार्की र राई जस्ता धेरै ससाना बालबालिका फुटबल सिक्न हरेक बिहान हिलेस्थित स्थानीय टुँडिखेल पुग्ने गर्छन् ।
युरोकप, कोपा अमेरिकाजस्ता ठूला प्रतियोगिता सञ्चालन भएपछि ससाना बालबालिकामा फुटबलप्रतिको क्रेज बढ्दो छ । अहिले उक्त टुँडिखेलमा फुटबल सिक्नेको मेला नै लाग्ने गर्छ । गरिमालाई मनपर्ने खेलाडी स्पेनिस ला लिगा क्लब बार्सिलोनाका अर्जेन्टिनी स्टार लियोनल मेसी हुन् ।
यसैगरी युनिकको रोजाइमा पर्छन्, अर्को स्पेनिस क्लब रियल म्याड्रिडका पोर्चुुगिज स्टार क्रिस्टियानो रोनाल्डो । उनी मैदानमा रोनाल्डोले लगाउनले जस्तै सात नम्बरको जर्सी लगाएर फुटबल खेल्छन् । भविष्यमा रोनाल्डोजस्तै खेलाडी बन्ने सपना पालेका छन्, युनिकले ।
हिलेका स्थानीय गौरव कार्कीले व्यक्तिगत प्रयासमा ससाना बालबालिकालाई फुटबलको प्रशिक्षण गराइरहेका छन् । उनले असार पहिलो साताबाट प्रशिक्षण सुरु गरेका हुन् । प्रशिक्षणमा बालबालिकाको सहभागिता उत्साहपूर्ण रहेको उनले बताए । ‘फुटबल सिक्ने सुरुका दिनमा २० जना थिए, अहिले बढेर ५३ जना पुगेका छन्’, अन्नपूर्ण पोस्ट्सँगको कुराकानीमा उनले भने ।
खेलमैदान हिलाम्ये भए पनि फुटबल सिक्नेको भीड लाग्ने गरेको छ । नेपालले पछिल्लो समय अन्तर्राष्ट्रिय स्तरमा हात पारेको सफलताले पनि फुटबलप्रति सबैको ध्यान बढेको उनको भनाइ छ ।
‘हाम्रो पालामा हात खुट्टा भाँच्चिने डरले बाबुआमाले खेल्न दिनुहुन्नथ्यो, अहिले अभिभावक आफैं प्रशिक्षणमा छोराछोरीलाई लिएर आउने गर्छन् । नेपालले अन्तर्राष्ट्रिय जगत्मा पछिल्लो समय हासिल गरेको सफलताले पनि ससाना बालबालिका फुटबलप्रतिको रुचि बढेको छ । अन्तर्राष्ट्रिय स्तरमा नेपाली खेलाडी पनि कमजोर छैनन् भन्ने सन्देश गएको छ’, गौरव भन्छन् ।
गौरव फुटबल सिक्न आउने ससाना बालबालिकालाई प्रशिक्षण दिनुअघि सुरुमा मैदानमा दौडाउँछन् । त्यसपछि खेलको आधारभूत नियमबारे अवगत गराउँछन् । फुटबल सामूहिक रूपमा खेलिने खेल भएकाले गर्दा उनले विशेषगरी पासिङ, ड्रिबलिङ, गोलकिपिङबारे सिकाउने गरेका छन् ।
प्रशिक्षणको व्यवस्थापन खर्च धान्न उनले मासिक प्रतिव्यक्ति एक सय रुपैयाँ शुल्क लिने गरेका छन् । प्रशिक्षणका लागि आठ देखि १८ वर्षसम्मका बालबालिका आउने गरेका छन् । गौरव फुटबल खेललाई कुनै भूभागले नछेक्ने तर्क गर्छन् । अवसर पाए सबैले राम्रो गर्न सक्ने उनको विश्वास छ ।
धनकुटालाई खेलाडी उत्पादनका लागि उब्जाउ भूमि मानिन्छ, गौरव । धनकुटा जन्मथालो भएका राजारानीका किरण चेम्जोङ राष्ट्रिय टोलीका पहिलो रोजाइका गोलरक्षक हुन् । यसैगरी धनकुटा बजार घर भएका सुजल श्रेष्ठ पछिल्लो राष्ट्रिय टोलीका नियमित सदस्य छन् । यीबाहेक बुद्ध चेम्जोङ र गोलरक्षक राजु नगरकोटी पनि ‘ए’ डिभिजन क्लबबाट व्यावसायिक फुटबल खेल्छन् ।
एन्फाको उमेरसमूह टोलीमा पनि बर्सेनि एकदुईजना खेलाडी धनकुटाबाट छनोटमा पर्दै आएका छन् । गौरवको यो प्रयासलाई एन्फा उपाध्यक्ष कर्माछिरिङ शेर्पाले पनि सहयोग गरेका छन् । शेर्पाले ५० थान फुटबल निःशुल्क रूपमा उपलब्ध गराएको जानकारी गौरवले दिए ।
कतैबाट भरपर्दो स्रोत जुटे चाँडै उमेरसमूहको फुटबल प्रतियोगिता आयोजना गर्ने सोच रहेको उनले बताए । उनले प्रशिक्षणमा आवश्यक सामग्री व्यक्तिगत खर्चबाटै धानिरहेका छन् । उनले साताको एक दिन शनिबार एन्फाका जिल्लास्तरीय प्रशिक्षक सुमन श्रेष्ठलाई ल्याएर प्रशिक्षण दिने गरेका छन् । प्रशिक्षक श्रेष्ठलाई मासिक पाँच हजार रुपैयाँ पारि श्रमिक दिएको उनले बताए ।