महेन्द्र दल गणलाई उपाधि
भरतपुरः तेस्रो चितवन च्याम्पियनसिप फुटबल प्रतियोगिताको उपाधि दी फेमस महेन्द्र दल गण भरतपुरले जितेको छ ।
जुनियर प्रहरी अधिकृत शिक्षालय भरतपुरमा बुधबार सम्पन्न फाइनल खेलमा हरि स्मृति क्लब दिव्यनगरलाई ५-० गोलले पराजित गर्दै महेन्द्र दल गणले उपाधि हात पारेको हो । उपाधिसहित महेन्द्र दल गणले एक लाख २१ हजार रुपैयाँ नगद पुरस्का प्राप्त गरेको छ । उपविजेता हरि स्मृतिले ५५ हजार पाँच सय रुपैयाँ प्राप्त गर्यो ।
महेन्द्र दल गणलाई उपाधि दिलाउन फाइनल खेलमा शिव थापाले ह्याट्रिक गरेका थिए । उनी फाइनल खेलको म्यान अफ दी म्याचसमेत घोषित भए । महेन्द्र दल गणलाई शिवले खेल सुरु भएको चौथो मिनेटमै अघि बढाएका थिए ।
पहिलो हाफमा १-० ले अघि रहेको महेन्द्र दल गणले दोस्रो हाफमा थप चार गार गर्दै सान्दार जित आत्मसात् गर्यो । महेन्द्र दल गणलाई दोस्रो हाफ सुरु भएलगत्तै खेलको ४७औं मिनेटमा शक्ति धिमालले २-० ले अघि बढाएका थिए । त्यसको तीन मिनेटपछि नै कप्तान सन्तोष नेपालीले टोलीलाई ३-० को अग्रता दिलाए ।
त्यसपछि खेलको ७४औं र ८४औं मिनेटमा लगातार दुई गोल गर्दै शिवले ह्याट्रिक पूरा गर्दा महेन्द्र दलको जित ५-० ले पक्का भएको थियो । महेन्द्र दल गणका कप्तान नेपाली प्रतियोगिताकै उत्कृष्त खेलाडी घोषित भए । सोही टोलीका दिनेश कार्की उत्कृष्ट गोलरक्षक घोषित भए । एभरेस्ट क्लबका देव गुरुङ प्रतियोगिताका सर्वाधिक गोलकर्ता तथा एभरेस्टकै मनीष आले उत्कृष्ट मिडफिल्डर घोषित भए । उत्कृष्ट घोषित खेलाडीले पनि जनही पाँच हजार प्राप्त गरे ।
प्रतिक्रिया दिनुहोस !
