सुनील राष्ट्रिय टोलीमा
काठमाडौंः नेदरल्यान्ड्सविरुद्ध हुने अन्तर्राष्ट्रिय क्रिकेट काउन्सिल (आईसीसी) वल्र्ड क्रिकेट लिग (डब्लूसीएल) च्याम्पियनसिप खेलका लागि बुधबार नेपाली टोलीको घोषणा गरिएको छ । १५ सदस्यिय टोलीमा सुनील धमलाले पहिलोपटक स्थान पाएका छन् । नेपालले अगस्ट १३ र १५ मा नेदरल्यान्ड्समा दुईवटा एकदिवसीय खेल खेल्दैछ । पारस खड्काको कप्तानी रहेको टोलीको उपकप्तानमा ज्ञानेन्द्र मल्लले निरन्तरता पाएका छन् । शक्ति गौचन, वसन्त रेग्मी, शरद भेषावकर, विनोद भन्डारी, सागर पुन, राजु रिजाल, अनिलकुमार मण्डल, राजेश पुलामी टोलीमा छन् ।
यसैगरी सोमपाल कामी, करण केसी, सन्दीप लामिछाने र विक्रम सोबले पनि टोलीमा ठाउँ बनाएका छन् । नेपाल क्रिकेट संघ (क्यान) निलम्बनमा रहेको अवस्थामा आईसीसी प्रतिनिधि बैंकटपति राजु, प्रमुख प्रशिक्षक जगत टमटा र कप्तान पारस खड्कासहितको टोलीले टिम छनोट गरेको हो । आईसीसीको एफिलिएट तथा एसोसिएट सदस्यले मात्र खेल्ने सबैभन्दा ठूलो एकदिवसीय प्रतियोगितासमेत रहेको डब्लूसीएल च्याम्पियनसिपमा आठ टोली सहभागी छन् । हरेक टोलीले प्रत्येकसँग दुईदुईवटा एकदिवसीय खेल खेल्नेछ । प्रतियोगिताको शीर्ष चार टोली सन् २०१८ मा हुने एकदिवसीय विश्वकप छनोट प्रतियोगितामा छानिनेछन् । नेपालले तीनवटा टोलीसँग खेलिसकेको छ ।
नेपाल ६ खेलबाट चार अंक जोड्दै तालिकाको छैटौं स्थानमा छ । शीर्ष स्थानमा रहेको नेदरल्यान्ड्सले ६ खेलबाट १० अंक जोडेको छ । नेदरल्यान्ड्सले प्रतियोगितामा हार बेहोरेको छैन । उसले खेलेका चार खेलमा जित हात पार्यो भने दुईवटा खेल रद्द भएपछि एक एक अंक बाँडेको थियो । ६ खेलपछि हङकङको नौ, पपुआ न्युगिनीको आठ र स्कटल्यान्डको सात र केन्याको ६ अंक छ । नेपालले नामिबियासँग खेलेका दुवै खेल जितेर अंक जोड्न सफल भएको थियो ।
नेपालले नामिबियासँग गत अप्रिल १६ र १८ मा खेलेको थियो । त्यसअघि पहिलो चरणमा स्कटल्यान्ड र दोस्रो चरणमा पपुआ न्युगिनीसँग खेलेको नेपाल सबै चार खेलमा पराजित भएको थियो । प्रारम्भिक ब्याट्सम्यान सुनील ब्याटिङ अलराउन्डर हुन् । क्षेत्र नम्बर ९ कञ्चनपुरबाट घरेलु क्रिकेट प्रतियोगिता खेल्ने गरेका उनी राम्रो स्पिन बलिङ गर्न सक्छन् । यसअघि बन्द प्रशिक्षणामा परे पनि सुनील सिनियर राष्ट्रिय टोलीमा पर्न सकेका थिएनन् । यू-१९ राष्ट्रिय टोलीबाट उत्कृष्ट प्रदर्शन गरेपछि सिनियर टोलीमा उनको भविष्य हेरिएको थियो । सुनीलले यसै वर्ष बंगलादेशमा भएको आईसीसी यू-१९ विश्वकपमा उत्कृष्ट प्रदर्शन गरेका थिए ।
बायाँ हाते युवा स्पिनर सन्दीप लामिछाने लगातारको लयसँगै टोलीमा निरन्तरता पाउन सफल भएका हुन् । उनले नामिबियासँगको खेलमार्फत सिनियर टोलीमा डेब्यु गरेका थिए । नेपाली टोलीले भर्खरै इङ्ल्यान्ड भ्रमणका क्रममा लर्डसमा मेरिलिबोन क्रिकेट क्लब (एमसीसी)विरुद्ध उत्रँदै जित हात पारेको थियो । नेपाली टोली पछिल्लो समय लयमा देखिएको छ । युवा खेलाडीहरू सिद्धान्त लोहनी, आरिफ सेख, अविनाश कर्ण, प्रदीप ऐरीलगायतले यसपटक पनि टोलीमा स्थान बनाउन सकेनन् । यसैगरी विकेटकिपर तथा प्रारम्भिक ब्याट्सम्यान सुवास खकुरेलले पनि स्थान बनाउन सकेनन् ।
प्रतिक्रिया दिनुहोस !
