बक्सिङका लागि हेर्दाहेर्दै लाखौं उठ्यो

काठमाडौंः नेपाली खेलकुदमा ठूलो समस्याका रूपमा देखा पर्दै आएको विषय हो, प्रायोजन । खेल विकासको जिम्मा पाएका संघहरू पैसा अभावमा प्रतियोगितालगायतका विभिन्न गतिविधि सञ्चालन गर्न नसकेको भन्दै पन्छिने गर्छन् । केही खेलहरूले अन्तर्राष्ट्रिय पदक ल्याउने गरे पनि घरेलु प्रतियोगितामा उनीहरूलाई प्रायोजकको अभाव खड्कने गर्छ ।

गत बुधबार ललितपुर जिल्ला बक्सिङ संघले ललितपुरको होटेल हिमालयमा नेपाली खेल संघहरूमा दुर्लभै देखिने ‘फन्ड रेजिङ' कार्यक्रमको आयोजना गरेको थियो । चौथो राष्ट्रव्यापी तथा प्रथम नोभिस बक्सिङ प्रतियोगिताका लागि भन्दै रकम संकलन गर्न कार्यक्रम आयोजना गरिएको थियो । विभिन्न उद्योगी र व्यवसायीलाई निमन्त्रणा गरिएको उक्त कार्यक्रममा उपस्थित व्यक्तित्वलाई सांगीतिक कार्यक्रममार्फत मनोरञ्जन दिइएको थियो ।

कार्यक्रम सुरु भएसँगै बक्सिङलाई माया र सहयोग गर्नेहरूको प्रतिस्पर्धा नै चलेको थियो । कार्यक्रमबाट बक्सिङको सहयोगार्थ ११ लाख ५५ हजारभन्दा बढी रुपैयाँ संकलन भएको थियो । जसमा व्यक्तिगत तथा संस्थागत रूपमा दुईजनाबाट समान दुई लाख ४० रुपैयाँ प्राप्त भएको थियो । एकजनाले एक लाख, एक जनाले ७५ हजार र चार जनाले समान ५० हजार रुपैयाँ दिएका थिए । २० जनाभन्दा बढीले आर्थिक सहयोग गरेका थिए ।

नेपाल बक्सिङ संघका अध्यक्ष राम अवालेले मनोरञ्जनसँगै सामूहक भावना जगाउने हिसाबले कार्यक्रम आयोजना गरिएको बताए । ‘मनोरञ्जन पनि गरौं र स्वतःस्फुर्त रूपमा सहयोग पनि गरौं भन्ने हिसाबले कार्यक्रमको आयोजना गरेका हौं', अवालेले भने । अवालेले यस्तो सहयोगले खेलप्रति अपनत्वको भावना विकास गर्ने बताए । गत जुनको पहिलो साता अवाले नेपाल बक्सिङ संघको अध्यक्षमा निर्वाचित भएका हुन् ।

यसअघि ललितपुर जिल्ला बक्सिङ संघको अध्यक्ष हुँदा पनि उनले यस्ता कार्यक्रमको आयोजना गरेका थिए । ललितपुर जिल्ला बक्सिङ संघको आयोजनामा भदौ ७ देखि ११ गतेसम्म आयोजना हुन लागेको चौथो राष्ट्रव्यापी तथा प्रथम नोभिस बक्सिङ प्रतियोगितामा खेलाडी, प्रशिक्षक र अफिसियल गरी पाँच सयभन्दा बढीको सहभागिता रहने आयोजकले जनाएको छ । संघका अध्यक्ष अवालेले प्रतियोगिताको मुख्य प्रायोजनका लागि विभिन्न व्यापारिक प्रतिष्ठानसँग कुराकानी भइरहेको जानकारी दिए ।