रियो अलम्पिकमा अाज नेपालका तीन खेल
काठमाडौँ: ब्राजिलको रियो दि जेनेरियोमा जारी ३१ औं गृष्मकालीन ओलम्पिक खेलकुदमा मंगलबार नेपालका तीनजना खेलाडीले विभिन्न खेलमा प्रतिस्पर्धा गर्दैछन् ।
मंगलबार नेपालका जितबहादुर मोक्तानले आर्चरीको ६४ खेलाडीबीचको प्रतिस्पर्धामा आफ्नो कौशल प्रदर्शन गर्नेछन् । यसैगरी शिरीष गुरुङले पौडीको एक सय मिटर फ्रिस्टाइलमा र जुडोकी फुपूह्लामु खत्रीले महिलातर्फको ६३ केजी तौलसमूहमा प्रतिस्पर्धा गर्नेछन् ।
आर्चरीको ७० मिटर व्यक्तिगत रिकर्भमा सहभागिता जनाएका मोक्तानले र्याङ्किङ राउन्डमा ६० औं स्थान बनाएका थिए । र्याङ्किङ राउन्डमा उनले जिम्बावे, लिबिया, मालवी र टोंगाका खेलाडीलाई पछाडि पारेका थिए । जितबहादुरले ६४ खेलाडीबीचको प्रतिस्पर्धामा भारतका अतानु दाससँग भिडन्त गर्नेछन् । र्याङ्किङ राउन्डमा दासले पाँचौं स्थान हात पारेका थिए । यस स्पर्धाको फाइनल खेल अगस्ट १२ तारिखमा हुनेछ ।
यसैगरी, पौडीबाज शिरीषले मंगलबार हिट चरणमा प्रतिस्पर्धा गर्नेछन् । रियो ओलम्पिकमा सहभागिता जनाउनु नै ठूलो उपलब्धि मानेका शिरीषले आफ्नो स्पर्धामा नयाँ राष्ट्रिय कीर्तिमान बनाउने लक्ष्य राखेका छन् । ‘मेरो खेल पहिलो हिटमा परेको भए सजिलो हुन्थ्यो होला । दोस्रो हिटमा परेकाले केही अफ्ठ्यारो ठानेको छु । त्यैपनि म नयाँ राष्ट्रिय कीर्तिमान बनाउने हिसाबले खेल्नेछु’, शिरीषले अनलाइन सम्पर्कमा अन्नपूर्ण पोस्ट्सँग भने ।
यसैगरी, नेपालकी चर्चित जुडो खेलाडी फुपूले ६३ केजी तौलसमूहमा क्युवाकी मारिसेट इस्पिनोसासँग प्रतिस्पर्धा गर्नेछिन् । हरेक खेलमा पूरै समय रिङमा टिक्ने लक्ष्य लिएकी फुपूले वाइल्ड कार्डमार्फत रियो ओलम्पिकको यात्रा तय गरेकी हुन् । उनले रियो ओलम्पिकको तयारीका लागि ६ महिना हंगेरीमा ओलम्पिक छात्रवृत्तिमा अभ्यास र प्रशिक्षणको मौका पाएकी थिइन् । फुपूले १२ औं सागमा जुडोमा नेपाललाई स्वर्ण पदक दिलाएकी थिइन् ।
रियो ओलम्पिकमा नेपालबाट पाँच खेलका सातजना खेलाडीले भाग लिएका छन् । पौडीकी गौरिका सिंहको ओलम्पिक यात्रा भने हिट चरणबाटै टुंगिएको छ । ओलम्पिकमा सहभागी ११ हजार खेलाडीमध्ये सबैभन्दा कान्छी गौरिका महिला एक सय मिटर ब्याकस्ट्रोक स्पर्धामा ३४ जना खेलाडीमध्ये ३१ औं भएकी थिइन् । उनी आफ्नो हिटमा भने पहिलो भएकी थिइन् ।
यसैगरी, नेपालबाट एथलेटिक्समा हरिकुमार रिमाल र सरस्वती भट्टराईले पनि ओलम्पिकमा प्रतिस्पर्धा गर्दैछन् । एथलेटिक्सका खेलहरू अगस्ट १२ तारिखपछि मात्रै सुरु हुनेछन् । रिमालले पुरुष पाँच हजार मिटर दौडमा प्रतिस्पर्धा गर्दैछन् । १२ औं सागमा कांस्य पदक जितेका रिमाल अनिवार्य कोटामार्फत ओलम्पिकमा छनोट भएका हुन ्। पाँच हजार मिटर हिट चरणको प्रतिस्पर्धा अगस्ट १७ तारिखमा हुनेछ ।
यसैगरी, सरस्वतीले महिला १५ सय मिटर दौडमा प्रतिस्पर्धा गर्नेछिन् । सरस्वती पनि अनिवार्य कोटामार्फत ओलम्पिकमा सहभागी भएकी हुन् । उक्त स्पर्धाको फाइनल खेल अगस्ट १६ तारिखमा हुनेछ । रियो ओलम्पिकमा नेपालले आर्चरी, जुडो र तेक्वान्दो खेलमा वाइल्ड कार्डमार्फत तथा एथलेटिक्स र पौडीमा अनिवार्य कोटामार्फत सहभागिताको अवसर पाएको हो ।
प्रतिक्रिया दिनुहोस !
