उपाधि होडबाट बाहिरिइन् साबिक विजेता सेरेना 

रियो दि जेनेरियोः विश्व नम्बर एक अमेरिकी टेनिस खेलाडी सेरेना विलियम्स रियो ओलम्पिकको उपाधि होडबाट बाहिरिएकी छन् ।

लन्डन ओलम्पिकमा स्वर्ण पदक जितेकी साबिक विजेता सेरेना रियो ओलम्पिकको तेस्रो चरणबाटै घर फर्किन बाध्य बनेकी हुन् । मंगलबार राति भएको महिला एकलतर्फको तेस्रो चरणको खेलमा युक्रेनकी एलेना भितोलिनाले सेरेनालाई सोझो सेटमा पराजित भइन् ।

प्रतियोगिताको १५ औं वरीयतामा रहेकी भितोलिनाले सेरेनालाई ६-४, ६-३ को सोझो सेटमा स्तब्ध पारिन् । क्वार्टरफाइनलमा भितोलिनाले चेक गणतन्त्रकी पेट्रा भितोभासँग प्रतिस्पर्धा गर्नेछिन् ।

रियो ओलम्पिकको महिला डबल्सतर्फको स्पर्धामा पनि सेरेना र उनी दिदी भेनसको जोडी यसअघि नै उपाधि होडबाट बाहिरिइसकेको छ । सेरेना र भेनसको जोडी चेक गणतन्त्रका लुसी सफारोभा र बार्बरा स्ट्रेकोभाको जोडीसँग पराजित भएको थियो ।

‘मैले रियो ओलम्पिकलाई स्मरणीय बनाउन कुनै पनि तयारी गरेकी थिइन् । आगामी दिनमा राम्रो खेलेर अगाडि बढ्ने योजना बनाएकी छु', खेलपछि सेरेनाले भनिन् । भितोलिनाले आफ्नो लागि यो जित नसोचेको उपलब्धि भएको प्रतिक्रिया दिइन् । ‘यो मेरा लागि उत्कृष्ट क्षण बन्यो । सेरेनाजस्तो प्रभावशाली खेलाडीलाई हराउँछु भन्ने लागेको थिएन ।

यो जितले मेरो आत्मविश्वास पनि बढाएको छ', भितोलिनाले भनिन् । जर्मनीकी एन्जेलिक केर्बर र अमेरिकाकी माडिसन किज भने क्वार्टरफाइनलमा पुग्न सफल भए । दोस्रो वरीयताकी केर्बरले अस्ट्रेलियाकी साम स्टोसरलाई ६-०, ७-५ र सातौं वरीयताकी किजले नवौं वरीयतामा आसीन स्पेनिस खेलाडी कार्ला स्वारेज नाभारोलाई ६-३, ३-६, ६-३ ले पाखा लगाए ।

जर्मनीकी लाउरा सिगमन्ड, रुसकी दारिया कास्किना, पुएर्टो रिकोकी मोनिका पुइग र ब्रिटेनकी योहाना कोन्टा पनि क्वार्टरफाइनलमा पुग्न सफल भए । इटालीकी सारा इरानी, स्पेनकी गार्बिन मुगुरुजा र रुसकी श्वेतलाना कुजनेत्सोभा भने तेस्रो चरणको खेलबाट घर फर्किन बाध्य भए ।

यसैगरी पुरुष एकलतर्फको दोस्रो चरणको खेलमा ब्रिटेनका एन्डी मुरे, स्पेनका राफेल नाडाल र बेल्जियमका डेभिड गोफिनले सफलता हात पारे । दोस्रो वरीयताका मुरेले अर्जेन्टिनाका हुवाँ मोनाकोलाई ६-३, ६-१ ले हराए भने तेस्रो वरीयताका नाडालले इटालीका आन्द्रे सेपीलाई ६-३, ६-३ को सोझो सेटमा पाखा लगाए ।

आठौं वरीयताका गोफिनले भने इजरायलका डुडी सेलालाई ६-३, ६-३ ले हराए । सातौं वरीयताका स्पेनिस खेलाडी डेभिड फेरर दोस्रो चरणको खेलबाटै घर फर्किए भने रुसका एभ्गेनी डोनस्की, फ्रान्सका गिल्स सिमोन, अमेरिकाका स्टिभ जोन्सन र इटालीका फाबियो फोग्निनी अघिल्लो चरणमा पुग्न सफल भए ।