रियलले जित्यो युरोपियन सुपर कप
म्याड्रिडः स्पेनिस क्लब रियल म्याड्रिडले युरोपियन सुपर कप फुटबल प्रतियोगिताको उपाधि जितेको छ । रियलले मंगलबार राति भएको खेलमा अर्को स्पेनिस क्लब सेभिललाई अतिरिक्त समयमा ३-२ गोलले पराजित गर्यो । रियलले मुख्य तीन स्ट्राइकर क्रिस्टियानो रोनाल्डो, करिम बेन्जेमा र गारेथ बेलको अनुपस्थितिमा सुपर कप उपाधि जितेको हो ।
युरोपियन च्याम्पियन्स लिग र युरोपा लिगको विजेताबीच यो प्रतियोगिताको उपाधिका लागि प्रतिस्पर्धा हुनेगर्छ । गत सिजन रियलले युरोपियन च्याम्पियन्स लिग र सेभिलले युरोपा लिगको उपाधि जितेका थिए । नर्वेको लर्केन्डल रंगशालामा भएको खेलमा रियलले अतिरिक्त समयको खेल सकिन एक मिनेट बाँकी रहँदा निर्णायक गोल गरेको थियो ।
रक्षक ड्यानियल कार्भाजलले एक सय १९ औं मिनेटमा एकल प्रयासमा आकर्षक गोल गर्दै टोलीलाई कठिन तर, रोमाञ्चक जित दिलाएका हुन् । निर्धारित ९० मिनेटको खेल २-२ खेलको बराबरीमा सकिएको थियो । रियलका मार्को आनेन्सियो र सर्जियो रामोसले गोल गरे । सेभिलका लागि इभजेन कोनोपायन्का र फ्रान्को भाजक्वेजले एकएक गोल गरे ।
रियलले निर्धारित समयको इन्जुरी समयमा गोल गरेपछि खेल अतिरिक्त समयतर्फ धकेलेको थियो । रक्षक रामोसले लुकासको पासमा गोल गरेका थिए । तीन मिनेटको इन्जुरी समयमा रामोसले हेडमार्फत गोल गरेका हुन् । त्यसअघि खेलमा सुरुवाती अग्रता पनि रियलले नै लिएको थियो । आनेन्सियोले २१ औं मिनेटमा लामो दूरीबाट प्रहार गर्दै गोल गरेका थिए ।
भाजक्वेजले पहिलो हाफमै सेभिललाई बराबरीमा ल्याएका थिए । ४१ औं मिनेटमा भिटोलोको पासमा उनले गोल गरेका थिए । दोस्रो हाफमा सेभिलले अग्रता लियो । कोनोपायन्काले ७२ औं मिनेटमा पेनाल्टीमार्फत गोल गरेका थिए ।
रामोसले भिटोलोलाई फल गरेपछि सेभिलले पेनाल्टी प्रहारको अवसर पाएको थियो । जिनेदिन जिदान प्रशिक्षक भएयता रियलले जितेको यो दोस्रो उपाधि हो ।
यसअघि फाइनलमा एट्लेटिको म्याड्रिडलाई पराजित गरी रियल युरोपियन च्याम्पियन बनेको थियो । जिदान गत जनवरीमा रियलको प्रशिक्षक नियुक्त भएका थिए । रियलका प्रभावशाली खेलाडी रोनाल्डो घाइते छन् भने बेल र बेन्जेमाले आराम लिएका छन् । टोनी क्रुज पनि आराम लिइरहेका छन् । रियलले यसअघि सन् २००२ र सन् २०१४ मा पनि युरोपियन सुपर कपको उपाधि जितेको थियो ।
युरोपा लिगको फाइनलमा लिभरपुललाई हराएको सेभिल लगातार तेस्रो सिजन युरोपियन सुपर कपको फाइनलमा पराजित भएको हो । सन् २०१२ यता घरेलु लिगको उपाधि जित्न नसकेको रियलले आगामी संस्करण अगस्ट २१ तारिखमा रियल सोसिएडाडसँग प्रतिस्पर्धा गरेर सुरु गर्दैछ ।