चर्चामा ओलम्पिकमा स्वर्ण जित्ने पहिलो अफ्रिकन महिला
एजेन्सीः सिमोन म्यानुअल ओलम्पिक खेलकुदअन्तर्गत पौडीमा स्वर्ण पदक जित्ने पहिलो अफ्रिकन अमेरिकन महिला खेलाडी बनेकी छिन् । बिहीबार भएको पौडीअन्तर्गत महिलाको एक सय मिटर फ्रि स्टायलमा क्यानडाकी पेन्नी ओलेक्सियाकसँगै संयुक्त रुपमा स्वर्ण जित्दै म्यानुअलले ऐतिहासिक उपलब्धी हात पारेकी हुन् । म्यानुअल र ओलेक्सियाकले एकै समयमा दुरी पुरा गरेपछि दुबैलाई बिजेता घोषणा गरीएको छ ।
यस स्पर्धामा विश्व किर्तिमान धारी अष्टे«लियन खेलाडी केट क्याम्पबेल समेत सहभागी थिइन् । मानुअल र ओलेक्सियाकले क्याम्पबेललाई स्तब्ध तुल्याउदै स्वर्ण जित्न सफल भएका हुन् । सुरुवाती ५० मिटरको प्रतिस्पर्धासम्म क्याम्पबेल र उनकी बहिनी अग्र स्थानमा थिए । क्याम्पबेल सबै भन्दा अघि थिइन् भने उनको साथमै थिइन् बहिनी ब्रोन्टी । यद्यपि पछिल्लो ५० मिटरको प्रतिस्पर्धामा क्याम्पबेल दिदी बहिनीलाईपछि पार्दै मानुल र ओलेक्सियाक अघि आए ।
प्रतिस्पर्धा समाप्त हुदा ब्रोन्टी चौथो स्थानमा पुगिन् भने दिदी केट छैटौं स्थानमा पुगिन् । ओलेक्सियाकका लागि पनि पदक महत्वपूर्ण बनेको छ । १६ बर्षीया उनी २१ औं शताब्दीमा जन्मिएर कुनै पनि ओलम्पिक खेलकुदअन्तर्गत पौडीतर्फ स्वर्ण पदक जित्ने पहिलो खेलाडी बनेकी छिन् ।
आयोजकले म्यानुअल र ओलेक्सियाकलाई एकै स्थानमा राखेर पदक बितरण गरेको थियो । आयोजकले मेडल समारोहमा समेत पहिले म्यानुअलको देश अमेरीका र त्यसपछि ओलेक्सियाकको देश क्यानडाको राष्ट्रिय गान बजाएको थियो ।