‘विदेशी इसारामा सत्ता परिवर्तन’
काठमाडौंः एमालेका केही नेताहरूले माओवादी केन्द्रलाई भद्र सहमतिका नाममा सरकारको नेतृत्व जिम्मा दिएको भए पनि त्यो समीकरण कायम हुन नसक्ने दाबी गरेका छन् । उनीहरूले वर्तमा समीकरण परिवर्तन हुनुमा विभिन्न बाह्य शक्ति केन्द्रको चलखेल रहेको समेत टिप्पणी गरेका छन् ।
सो पार्टीको शुक्रबार जारी स्थायी समिति बैठकमा बोल्दै केही नेताहरूले यस्तो दाबी गरेको बैठकका सहभागी एक नेताले बताए ।
बैठकमा बोल्दै उपमहासचिव विष्णु पौडेल, संसदीय दलका उपनेता सुवास नेम्बाङ र स्थायी समिति सदस्य छविलाल विश्वकर्माले यस्तो धारणा राखेका हुन् ।
‘हाम्रो पार्टीले एमाले र माओवादी केन्द्रका बीचमा निर्माण भएको समीकरणलाई दीर्घकालीन रूपमा अघि बढाउन चाहेको भए तापनि माओवादी केन्द्र स्वयंले राजनीतिक समीकरणको कोर्स बदल्न चाहेको र उसलाई विभिन्न शक्तिहरूको प्रलोभनले त्यस्तो ठाउँमा पुर्याएको कारणले नै बदलिन पुगेको हो भन्ने भनाइ बैठकमा प्रस्तुत भएका छन्’, बैठकपछि प्रचार विभाग प्रमुख योगेश भट्टराईले जारी गरेको विज्ञप्तिमा उल्लेख छ ।
बैठकमा संविधानसभा र संसद्मा पार्टीले खेलेको भूमिका, एमाले अध्यक्ष केपी शर्मा ओली नेतृत्वमा गठित सरकार र त्यसले गरेका काम, अघिल्लो राजनीतिक समीकरणमा परिवर्तन र नयाँ समीकरण निर्माण, पार्टीको आन्तरिक क्रियाकलाप, आगामी कार्यभारलगायतका विषयमा समीक्षात्मक धारणा राख्ने क्रम जारी रहेको विज्ञप्तिमा उल्लेख छ ।
संविधान निर्माणमा पार्टीले नेतृत्वदायी भूमिका निर्वाह गरेको, पार्टी नेतृत्वको सरकारले जनता र राष्ट्रका पक्षमा सकारात्मक काम गरेको, परराष्ट्र सम्बन्धलाई सन्तुलित रूपमा परिचालन गरेको, राष्ट्रको आर्थिक समृद्धिका पक्षमा जनतामा आत्मविश्वास बढाएकोलगायतका उपलब्धि हासिल भएको पनि सदस्यहरूले दाबी गरेका थिए ।
प्रतिक्रिया दिनुहोस !
