‘चुनाव नभए संवैधानिक सङ्कट’
काठमाडौँः नेकपा (एमाले)का महासचिव ईश्वर पोखरेलले संविधानको कार्यान्वयनका लागि ओली सरकारले तयार गरेको कार्यतालिकाभित्र अहिलेको सरकारले स्थानीय तहको निर्वाचन गर्नुपर्ने बताएका छन् ।
पार्टीको स्कुल विभागले युवा संघ पदाधिकारी तथा केन्द्रीय सदस्यलाई एकसातादेखि सञ्चालन गरेको प्रशिक्षणको समापनमा बोल्दै महासचिव पोखरेलले करिब डेढ वर्षभित्र तीनवटा चुनाव गर्न नसकेमा संविधान कार्यान्वयन हुन नसक्ने बताए ।
चुनाव हुन नसके देशमा संवैधानिक सङ्कट निम्तिने उनको भनाई थियो । उनले ओली सरकारले मुलुकको राष्ट्रियतालाई उँचो पार्ने कार्य गरेकाले राष्ट्रिय तथा अन्तर्राष्ट्रिय शक्ति केन्द्रले राष्ट्रको स्वाधीनतालाई कमजोर बनाउन सरकार ढालेको जीकिर गरे ।
युवा सङ्घका अध्यक्ष राजीव पहारी, उपाध्यक्ष दिलु पन्त, प्रवक्ता प्रभातविक्रम कटुवाललगायतले यस किसिमको प्रशिक्षणले युवालाई परिपक्व तथा परिस्कृत बनाउने विचार व्यक्त गरेका थिए । समाज निर्माणमा माक्र्सवादी शिक्षालाई समयसापेक्ष ढङ्गले उपयोग गर्नुपर्ने विचार उनीहरुको भनाई थियो ।
तुल्सीलाल स्मृति प्रतिष्ठानमा यही भदौ ७ गतेदेखि सञ्चालन भएको उक्त प्रशिक्षणमा सैद्धान्तिक, दार्शनिक आधार, बहुदलीय जनवाद, माक्र्सवाद, सीप, कला, संस्कृतिलगायत विषयमा प्रशिक्षण दिइएको थियो ।
प्रतिक्रिया दिनुहोस !
