एमयुमा नेविसंघले जित्यो स्ववियु

सुर्खेतः मध्यपश्चिमाञ्चल विश्वविद्यालयमा भएको स्वतन्त्र विद्यार्थी युनियन (स्ववियु) को निर्वाचनमा नेपाली कांग्रेस निकट नेपाल विद्यार्थी संघ (नेविसंघ) ले वर्चश्व कायम गरेको छ । १० पदका लागि भएको निर्वाचनमा नेविसंघले अध्यक्षसहित नौ पदमा जीत हात पारेको हो । सोमवार राती घोषणा गरिएको मत परिणाम अनुसार एक पदमा भने एमाले निकट अनेरास्ववियुले जितेको छ ।

नेपाल विद्यार्थी संघका झक्कबहादुर शाही स्ववियु अध्यक्षमा विजयी भएका छन् । सुर्खेतमा रहेको केन्द्रीय क्याम्पसमा आइतवार भएको निर्वाचनको मत परिणाम अनुसार शाहीले पाँच सय चार मत प्राप्त गरी अध्यक्षमा विजयी भएका हुन् । शाहीले नेकपा माओवादी केन्द्र निकट अखिल क्रान्तिकारीका अध्यक्ष पदका उम्मेदवार राजेन्द्र बुढालाई ४० मतको अन्तरले जितेका हुन् । बुढाले चार सय ६४ र अनेरास्ववियुका प्रभात पोखरेलले तीन सय ९२ मत प्राप्त गरेका छन् ।
निर्वाचन समितका अनुसार स्ववियु सचिवमा अनेरास्ववियुका भरतबहादुर शाही विजयी भएका छन् । उनले पाँच सय ३३ मत ल्याएका छन् । उनका निकटतम प्रतिद्धन्दी नेविसंघका सन्तोष उपाध्यायले चार सय ७६ मत ल्याएका छन् । निर्वाचनमा १० पदका लागि ६९ जनाको उमेद्वारी परेको थियो ।

यस्तै स्ववियुको कोषाध्यक्षमा नेविसंघका शुसिल भट्राई पाँच सय ६२ मत प्राप्त गरी विजयी भएका छन् । उनका निकट्तम प्रतिद्धन्दी अनेरास्ववियुका अनु आँकुराले चार सय २० मत प्राप्त गरेकी छन् । मिश्रित निर्वाचन प्रणाली अनुसार भएको निर्वाचनमा उपाध्यक्ष, सहसचिव र केही सदस्यहरु समानुपातिक प्रणाली अनुसार विद्यार्थी संगठनले प्राप्त गरेको मतका आधारमा निर्वाचित हुनेछन् ।

देशकै पूरानो र ठूलो त्रिभुवन विश्वविद्यालय र अन्य विश्वविद्यालयमा लामो समयदेखि चुनाव हुन नसकिरहेको बेला मध्यपश्चिम विश्वविद्यालयमा भने निर्वाचन सम्पन्न भएको हो । स्ववियुको नेतृत्व हत्याउनका लागि विभिन्न आठ वटा विद्यार्थी संगठनहरुले निर्वाचनमा भाग लिएका थिए ।

अध्यक्ष, सचिव र कोषाध्यक्षसहित सात जना सदस्य प्रत्यक्ष निर्वाचनबाट छनौट भएका छन् । यस्तै सदस्यहरुमा नेविसंघका वर्षा केसी, निशान्त खत्री, दिपकराज विसी, हरिवहादुर थापा, पुरुषेतम जैसी, विश्वराज भट्राई र धिरेन्द्र हमाल विजयी भएका छन् ।

निर्वाचन समितिका अनुसार अब समानुपातिक तर्पबाट नेविसंघले तीन, अनेरास्ववियु र अखिल क्रान्तिकारीले समान दुई–दुई जना सदस्य पाउने छन् । यसैबीच निर्वाचनमा संस्थागत धाँधली भएको भन्दै विभिन्न पाँच विद्यार्थी संगठनले मतगणना र मतपरिणाम वहिस्कार गरेका छन् ।

अनेरास्ववियु, अखिल क्रान्तिकारी, अखिल छैठौं, नेक्राविसंघ र राप्रविसंघका अध्यक्ष पदका उम्मेदवारहरुले सोमवार मतगणनाको क्रममा खसेको भन्दा बढी मत फेला परेको भन्दै वहिस्कार गरेका हुन् । उनीहरुले फर्जी मतको छानबीन गर्न माग गरे पनि निर्वाचन समितिले मध्य रातमा नतिजा घोषणा गरेको हो ।

विश्वविद्यालयमा क्रियाशील विद्यार्थी संगठनहरुबीच भएको प्रतिस्पर्धाले जिल्लाकै राजनीति तातेको थियो । जिल्लास्थित सबै राजनीतिक दलहरुले आफू निकट विद्यार्थी संगठनका उमेद्वारहरुलाई जिताउनका लागि निकै कसरत गरेका थिए ।

विद्यार्थी संगठनका केन्द्रीय नेतृत्व पनि सुर्खेतमा केन्द्रीत भएको थियो । स्ववियु निर्वाचनमा एमाले निकट अनेरास्ववियु, नेपाली कांग्रेस निकट नेपाल विद्यार्थी संघ र नेकपा माओवादी केन्द्र निकट अखिल क्रान्तिकारीका उमेद्वारबीच मुख्य प्रतिस्पर्धा भएको छ । विश्वविद्यालयमा एक हजार ६ सय ९३ जना विद्यार्थी रहेकोमा एक हजार चार सय ८० मत खसेको थियो ।