दैलेख: स्थानीय तह पुनःसंरचनाअन्तर्गत दैलेख जिल्लाको सीमाङ्कन कार्य टुङ्गिएको छ।लामो छलफल र बहसपछि जिल्लामा पाँचवटा नगरपालिका र तीनवटा गाउँपालिका गठन गर्नेगरी सर्वसम्मत रुपमा टुङ्गाइएको बुझिएको छ।
निर्वाचन क्षेत्र नम्बर २ मा तीनवटा नगरपालिका साथै क्षेत्र नं १ मा दुईवटा नगरपालिका र तीनवटा गाउँपालिका रहने गरी जिल्लास्थित सर्वदलीय बैठकले टुङ्गो लगाएको हो।जिल्लाका सबै क्षेत्रबाट आएका सुझावसँगै हेरफेरसहित सीमाङ्कन गरिएको साथै साविक नारायण र दुल्लुसँगै राकम कर्णाली, देवलोक, रानीमत्ता गरी पाँचवटा नगरपालिका र ज्वाला, वेस्तडा र नौमुले गरी तीनवटा गाउँपालिका प्रस्ताव पेस गरिएको छ।
सदरमुकामको नगरपालिकालाई ४५ हजार र अन्य नगरपालिकालाई ३५ हजार जनसङ्ख्या हुनुपर्ने निर्देशिकामा उल्लेख भएअनुसार नगरपालिको र गाउँपालिकाको हकमा २५ हजार जनसङ्ख्या पुग्ने गरी प्रस्ताव गरिएको जिल्लास्थित सर्वदलीय समितिका प्रतिनिधिहरुले जानकारी दिएका छन्।
दैलेख जिल्लामा प्रस्ताव गरिएका नगरपालिका र गाउँपालिकाको केन्द्रविन्दु पनि सर्वदलीय बैठकले तोकेको छ।नगरपालिकाको हकमा राकमकर्णालीको तिलेपाटाको शीतलचौर, देवलोकको चामुण्डाको देउराली र रानीमत्ताको घोडावासलाई केन्द्रविन्दु मानिएको छ ।त्यसैगरी गाउँपालिकाको हकमा ज्वालाको छिउडीबजार, नौमुलेको नौमुले बजार र वेस्तडाको विक्रमचौर तोकिएको छ।
पुराना नारायण र दुल्लु गाविसको केन्द्रविन्दु साविक नै मानिएको साथै नारायण नगरपालिकासँग इलाका नं २ र वेलपाटा गाविसलाई समाहित गरिएको छ भने दुल्लु नगरपालिकामा इलाका नं .८ र इलाका नं. ७ का नाउलेकटुवाल र छिउडीपुसाकोट गाविसको आधा भूभाग समेटिएको स्रोतले जनाएको छ।
रानीमत्ता नगरपालिकामा साविकको इलाका नं ५ र ६ साथै देवलोक नगरपालिकामा साविकको इलाका नं ९ समेटिएको छ भने राकमकर्णाली गाविसमा इलाका नं १० र ११ का सातवटा गाविस समेटिएको स्रोतबाट बुझिएको छ।
गाउँपालिकाको हकमा वेस्तडामा इलाका नं .४ का सात गाविस, नौमुलेमा इलाका नं ३ का सातवटा गाविस र ज्वालामा इलाका नं ७ का गमौडी, कालभैरव, गौरी, मालिका र छिउडीपुसाकोट गाविसको आधा भूभाग समेटिएको बुझिएको छ। जनजाति समुदायको बाहुल्यता रहेको नौमुले गाउँपालिकालाई विशेष संरक्षित गाउँपालिकाका रुपमा सिफारिस गरिने तयारी गरिएको जिविस स्रोतको भनाइ रहेको छ।
सीमाङ्कनका विषयमा नारायण, दुल्लु र देवलोक नगरपालिकाका वडा विभाजनमा सामान्य विवाद भएको बुझिएको छ। जिल्लाको सीमाङ्कनका सन्दर्भमा राष्टिय जनमोर्चाले सङ्घीयताको विषयमा फरक मत भएको भन्दै सहभागी नभएको जनाएको छ। रासस
प्रतिक्रिया दिनुहोस !
