बालबालिकामा बचत बानी बसाल्ने मेगा बैंकको योजना
काठमाडौंः मेगा बैंकले ‘नानीमा लागेको बानीः आज बचाऊँ जिन्दगीभर रमाऊँ’ अभियान सुरु गरेको छ । स्कुल पढ्ने सानै उमेरदेखिका बालबालिकालाई बचत संस्कृति विकास गर्ने उद्देश्यले बैंकले यस्तो योजना ल्याएको हो ।
बैकले सोमबार राजधानीमा विशेष कार्यक्रम आयोजना गरी यो योजना सार्वजनिक गरेको हो । बैंकले यस अभियानका लागि राष्ट्रिय क्रिकेट टिमका कप्तान पारस खड्का र अभिनेत्री प्रियंका कार्कीलाई ‘मेगा सेभिङ स्टार’ का रूरुपमा नियुक्त गरेको छ ।
बैंकका प्रमुख कार्यकारी निर्देशक अनिलकेशरी शाहले देशमा बचत गर्ने प्रचलन एकदमै कम रहेको अवस्थामा देशको विकासका लागि बचतको स्तर वृद्धि गर्नुपर्ने बताउँदै बैंकले यस्तो अभियन सञ्चालनमा ल्याएको जनाएका छन् । स्कुले विद्यार्थीलाई लक्षित गरी ल्याइएको यो अभियानमा शून्य मौज्दातमा खाता खोल्न सकिनेछ ।
समाजका सबै तहमा बैंकिङ कारोबारलाई प्रोत्साहन गर्ने सरकारको उद्देश्यलाई ध्यानमा राखी मेगा बैंकले यो अभियान ल्याएको शाहले बताए । उनले मेगा बैंकले वित्तीय समावेशितालाई आफ्नो मुख्य लक्ष्य बनाउँदै आएको र वित्तीय समावेशिताको पहिलो खुड्किला खाता खोल्दादेखि नै सुरु हुने बताए ।
सानो उमेरदेखि नै बचत गर्ने बानी विकास भएमा जिन्दगीभर त्यो बानी रहिरहने भएकाले नेपालमा यस्तो अभियानको आवश्यकता रहेको उनको भनाइ थियो ।
यो अभियानको मुख्य उद्देश्य देशभरका स्कुल र कलेजका विद्यार्थीमाझ पुगेर बैंकिङ बानीको प्रोत्साहन गर्दै ‘मेगा सम्बन्ध’ स्थापना गर्ने रहेको बैंकले जनाएको छ । ‘हामीमा अरूले रोपेको रूखबाट फल टिप्ने प्रचलन छ ।
तर, मेगा बैंकले नानीमा लागेको बानीः आज बचाऊँ जिन्दगीभरि रमाऊँ अभियान सुरु गरेर आजबाटै युवा विद्यार्थीमा बचत गर्ने बानीको बीउ रोप्न चाहेकोे हो’, शाहले भने । यस बचत योजनामा ग्राहकले चार प्रतिशत ब्याज पाउने बैंकले जनाएको छ ।
कार्यक्रममा क्रिकेटर पारस खड्काले आफ्नो समयमा यस्ता खालका बचत अभियान नभएकाले बचत गर्ने बानी विकासका लागि धेरै समय लागेको बताए । उनले यो अभियनमा सहभागी हुन पाउँदा हर्षित भएको उल्लेख गरेका छन् ।
त्यस्तै अभिनेत्री कार्कीले मेगा बैंकको अभियानलाई साथ दिन पाएकोमा खुसी लागेको बताउँदै बचत गर्ने बानी विकासका लागि बालबालिकामाझ पुग्न पाउनु खुसीको विषय भएको बताइन् ।