मुम्बई: बलिउड अभिनेत्री करिना कपुर गर्भवती भएदेखि सन्तानको विषयमा सोधिने प्रश्नबाट हैरान भइरहेकी छन् । भारतमा आयोजना हुन लागेको 'ग्लोबल सिटिजन मुभमेन्ट इन इन्डिया' लाई समर्थन दिन त्यहाँ पुगेकी करिनाले आफू छोरी भएकाले छोरी नै जन्माउने चाहना भएको बताइन् ।
अहिले जहाँ पुगे पनि उनलाई एउटै प्रश्न तेर्सिन्छ, 'छोरा या छोरी ? ' उनलाई मात्र नभई उनका श्रीमान् सैफअली खानलाई पनि यही प्रश्नले पिरोल्ने गर्छ । यसबाट उनलाई आफ्नो व्यक्तिगत जीवनमा दक्खल दिएकोजस्तो समेत भान हुने गरेको छ । उनी पटकपटक उत्तर दिइरहन्छिन्, 'छोरा या छोरी जे भए पनि यसले के फरक पार्छ र ? '
आफू छोरी भएर पनि आफ्ना आमाबुबाको लागि छोराले भन्दा बढी काम गर्न सकेकोमा गर्व गर्दै उनले छोरी जन्माउने इच्छा व्यक्त गरेकी हुन् । 'ग्लोबल सिटिजन फेस्टिभल इन्डिया' को उद्घाटन मुम्बईमा १९ नोभेम्बरमा हुनेछ ।
यस फेस्टिभलमा रक ब्यान्ड 'कोल्ड प्ले' र जे जेड, अभिनेता आमिर खान, रणवीर सिंह, कटरिना कैफ, अर्जुन कपुर, दिया मिर्जा, मोनाली ठाकुरलगायतका कलाकार सहभागी हुनेछन् ।
प्रतिक्रिया दिनुहोस !
