भिडियोमा भूकम्पपछिको पुनःनिर्माण
काठमाडौँ: भूकम्पपछिको पुनःनिर्माणमा सक्रिय हुन युवालाई आह्वान गरिएको म्युजिक भिडियो सार्वजनिक भएको छ ।
‘अब उठ जाग’ बोलको गीतका शब्द डा. भिष्मकुमार भूसालका हुन् । भ्रष्टाचारविरुद्धका अभियानकर्ता भुसाल पुनःनिर्माणमा सक्रिय भएसँगै गीत लिएर आएका हुन् ।
डा. भूसालले तीन महिनाको अवधिमा तीन गीत सार्वजनिक गरिसकेका छन् । पछिल्लो गीत ‘अब उठ जाग’मा भूसालले पुनःनिर्माणमा सबैको सहभागिताका लागि आह्वान गरेका छन् ।
गीतको भिडियोमा पुनःनिर्माणका लागि युवा सक्रिय भएमा भत्किएका संरचना बनाउन समय नलाग्ने भाव गीतमा समेटिएको छ । गीतको भिडियोमा नेपाली चलचित्र क्षेत्रकी चर्चित नायिका सञ्चिता लुइटेल र जीवन लुइटेलले अभिनय गरेका छन् ।
रामकृष्ण ढकाल र स्मीता दाहालको स्वरमा सजिएको गीतमा वसन्त सापकोटाले संगीत भरेका छन् । वल्र्ड भिजन इन्टरनेश्नल नेपालको सहयोगमा राष्ट्रिय पुनःनिर्माण प्राधिकरणले निर्माण गरेको गीतको निर्देशन दीपक आचार्यले गरेका हुन् ।
सुदीप बरालले छायांकन गरेको भिडियोको सम्पादन अमन मानन्धरले गरेका हुन् ।
प्रतिक्रिया दिनुहोस !
