भारतीय गायिका लता मंगेशकरको सम्झनामा नेपाली गीत
भारतीय गायिका लता मंगेशकरले ८७ औं जन्मदिन मनाएकी छन् । आफूले गरेका काममा ठीकैमात्र सन्तुष्टि पाएकी उनले अझैसम्म पनि ‘वाह कस्तो गीत गाएँ’ भनेर महसुस गरेकी छैनन् । उनलाई अहिलेसम्मको भन्दा अझै राम्रो गर्नसक्ने क्षमता आफूमा रहेको विश्वास छ। गीत गाउँदा आफूले गरेको कमीकमजोरी आफैंलाई मात्र राम्रोसँग थाहा हुने हुँदा कलाकार कहिल्यै पूर्ण सन्तुष्ट हुँदैनन् । लतालाई पनि यस्तै लाग्छ ।
कुनै गीतमा पूर्ण रूपमा सन्तुष्ट हुन नसके पनि उनलाई गाह्रो लागेका केही गीत छन् । तीमध्ये नेपाली चलचित्र ‘माइतीघर’को ‘जुन माटो न मेरो’ बोलको गीत उनलाई सबैभन्दा गाह्रो लागेको थियो । यसै पनि जयदेवको संगीत संयोजन सजिलो छैन । लताको हातमा गीत सुम्पिएपछि जयदेव ढुक्क हुने गरेका थिए । त्यसपछि कामको तनाव लताको टाउकोमा आउने गथ्र्यो । तर, राजा महेन्द्रले लेखेको उक्त गीत गाउनु भने लताका लागि करिअरकै चुनौतीपूर्ण काम थियो ।
उनको स्वर ‘हाई रेन्ज’को छ भनेर संगीतकारहरू उनका लागि ‘हाई पिच’को संगीत बनाउँछन् । लतालाई चलचित्रको गीत गाउनुभन्दा शास्त्रीय गायन चुनौतीपूर्ण लाग्छ । उनको अनुभवमा चलचित्रको गीत गाउँदा स्क्रिनमा देखिने चरित्रलाई मात्र केन्द्रित गरेर गाइन्छ । तर, शास्त्रीय गाउँदा सुधार गर्नुपर्ने र प्रयास गर्नुपर्ने थुप्रै ठाउँ हुन्छन् । भारतीय संगीतमा एकछत्र राज गरेकी उनले आफूभन्दा राम्रो गाउनेहरूको नाममा के एल सैगल र नूर जेहानलाई समावेश गरेकी छन् ।
प्रतिक्रिया दिनुहोस !
