दसैंतिहारमा ग्राहकलाई नेपाल टेलिकमको छुट

काठमाडौः नेपाल टेलिकमले विभिन्न सेवामा छुट अफर ल्याएको छ । टेलिकमले जीएसएम तथा सीडीएमएका प्रिपेड तथा पोस्टपेडका ग्राहकलाई दसैं, तिहार तथा छठको उपलक्ष्यमा डाटा अफर प्रदान गरी त्यसमा निःशुल्क भ्वाइस तथा एसएमएससमेत उपलब्ध गराउने व्यवस्था गरेको छ ।

असोज १५ देखि २९ गतेसम्म र कात्तिक १२ देखि २१ गतेसम्म सय एमबी डाटा ५० रुपैयाँमा र दुई सय ५० एमबी डाटा सय रुपैयाँमा उपलब्ध हुनेछ । टेलिकमका अनुसार सय एमबी डाटाको अवधि पाँच दिनसम्म र दुई सय ५० एमबी डाटाको अवधि १० दिनसम्म रहनेछ ।

सो अवधिमा डाटा प्रयोगकर्ताले क्रमशः १० मिनेट भ्वाइस कल गर्न तथा १० वटा एसएमएस पठाउन र २५ मिनेट भ्वाइस कल गर्न तथा २५ वटा एसएमएस पठाउन पनि सक्नेछन् । त्यस्तै टेलिकमले जीएसएम तथा सीडीएमए दुवैमा नाइट डाटा अफर पनि उपलब्ध गराएको छ ।

सो अनुसार राति १० बजेदेखि बिहान ६ बजेसम्म ४० रुपैयाँमा पाँच सय एमबी र ८५ रुपैयाँमा १२ सय एमबी डाटा प्रयोग गर्न सकिनेछ । यी डाटा भोल्युमको अवधि क्रमशः सात दिन र १५ दिन हुनेछ । टेलिकमले कम्पनीकै नेटवर्कभित्र हुने कलमा विद्यमान महसुल दरमा १० प्रतिशत छुट उपलब्ध गराएको छ भने एसएमएसमा ५० प्रतिशत छुट दिने भएको छ ।

यो असोज २२ देखि २९ गतेसम्म र कात्तिक १४ देखि २१ गतेसम्म लागू हुनेछ । टेलिकमले स्थानीय टेलिफोन सेवामा दिँदै आएको छुटमा थप सय लोकल फ्री कल उपलब्ध गराउने भएको छ ।

एडीएसएलमा दसैं, तिहार तथा छठको समयमा भ्यालिडिटी सकिने भोलुम बेस तथा अल्टिमेट एडीएसएलका ग्राहकलाई समय थप गरिने जनाएको छ । वाइम्याक्स तथा फाइबरका ग्राहकको हकमा डाटा भोलुम बाँकी भएको तर भ्यालिडिटी सकिएको खण्डमा समय थप गरिने जनाएको छ ।