सेवा नै सफलताको कडी
आजभन्दा १० वर्षपहिला एउटा कोठा र दुईतीनजना कर्मचारीबाट सुरु भएको सिटी मनी ट्रान्सफर अहिले दोस्रो स्थानमा पुगेको छ । नेपालमा सञ्चालनमा रहेका ५५ रेमिट्यान्स कम्पनीबीच तीव्र प्रतिस्पर्धा चलिरहँदा सिटीको विस्तार अब्बल देखिएको छ । यसको कारण सहज ढंगको सेवा भएको कम्पनीको भनाइ छ । प्रतिस्पर्धाबीच यसपटकको चाडपर्वको अवसर पारेर सिटीले घडेरी उपहार दिने योजना ल्याएको छ । यसै सन्दर्भमा सिटी एक्सप्र्रेस मनी ट्रान्स्फरका प्रमुख प्रशासन अधिकृत कृष्णराज पौडेलसँग अन्नपूर्ण पोस्टले गरेको कुराकानीः
घडेरी नै अफर ल्याउनु भयो नि, त्यो पनि काठमाडौंमा, महँगो अफर भएन ?
वर्षभरिको कमाइबाट प्रमुख चाडपर्वमा एकपटक अफर ल्याउने गरेका छौं । ग्राहकलाई उपहार दिन पाउँदा खुसी लाग्छ । खर्च व्यवस्थापन गरेर नै उपहार ल्याएका हौं । हामीले वर्षभरि गरेको कमाइबाट २०/२५ लाखको उपहार दिन गाह्रो हुँदैन ।
अफर ल्याउन थालेपछि ग्राहक कत्तिको बढेका छन् ?
उपहार तथा अफरले ग्राहक बढेका होइनन् । हामीले दिने सेवा ठूलो हो । तर पनि लौ न सिटीबाटै पैसा पठाऊँ, यस्तो अफर रहेछ, न परिहाल्छ कि भन्नेहरू पनि छन् । एकपटक सिटीबाट सेवा लिइसकेका मान्छे पछि अन्यत्र जान मान्दैनन् । हाम्रो सेवाबाट सन्तुष्ट भएर ग्राहक सिटीलाई छोड्न चाहँदैनन् । एकपटक आएपछि सिटीलाई ग्राहकले छोड्दैनन् । यो नै हाम्रो सम्पत्ति हो ।
सिटीमा कुन कुन देशबाट पैसा आउँछ ?
हुन त हाम्रो नटेवर्क विश्वभरि नै छ । विश्वभरिबाट सिटीको सेवा लिन सकिन्छ । तर, मुख्यतया साउदी, कतार र जापानबाट सिटीमा रेमिट्यान्स पठाउने ग्राहक धेरै छन् ।
सेवा शुल्क कस्तो छ ?
सबै रेमिट्यान्सको सेवा शुल्क एउटै हुन्छ । सिटीको एउटा रेट र अर्कोको अर्को भन्ने हुँदैन । तर, देशअनुसार भने सेवा शुल्क फरक हुन्छ । हामीले पनि राष्ट्र बैंकको नियम नै अवलम्बन गर्दै आएका छौं ।
वर्षमा कति भित्रिन्छ सिटी एक्सप्रेसबाट रेमिट्यान्स ?
नेपालमा भित्रिने कुल रेमिट्यान्सको १० देखि ११ प्रतिशत सिटी एक्सप्रेसबाट भित्रिने गरेको छ । नेपाल राष्ट्र बैंकको तथ्यांकअनुसार नेपालमा गएको वर्ष ६ खर्ब ६५ अर्ब ६ करोड रुपैयाँ रेमिट्यान्स भित्रिएको थियो
सिटीको अबको नयाँ योजना के छ ?
सबैभन्दा पहिला हामी सिटीको ब्यानरलाई चिनाउन चाहन्छौं । यस वर्षको दसैं र तिहारका लागि काठमाडौंमा एकजनालाई घडेरी उपहार अफर ल्याएका छौं । त्यसपछिको योजना भने केही समयपछि कम्पनीमा छलफल गरेर बनाउनेछौं ।
ग्राहकको सेवा सुविधाका लागि कस्ता कार्यक्रम ल्याउँदै हुनुहुन्छ ?
ग्राहकलाई घरदैलोमा सुविधा दिने हाम्रो अभियान हो । अहिले गाउँबाट पैसा लिन सहर जानुपर्ने बाध्यता छ । सिटीले आठदस घर भएका स्थानमा पनि आफ्नो सेवा विस्तार गर्ने कार्यक्रम ल्याउन लागेको छ ।
दसैंमा कति रेमिट्यान्स भित्रिन्छ ?
अन्य समयको भन्दा दसैं तिहारमा बढी रेमिट्यान्स भित्रिन्छ । दोब्बरै त हुँदैन । तर, तीन भागको दुई भाग भने यो समयमा नेपाल भित्रिने गर्छ । अहिले रेमिट्यान्स नै घटिरहेको छ । दसैं नजिकिँदै छ, अब बढ्न पनि सक्छ ।
रेमिट्यान्स कम्पनीले राम्रो सेवा दिँदादिँदै पनि हुन्डीबाट पनि नेपालमा ठूलो रकम भित्रिरहेको छ नि ?
वैधानिक रूपमा पैसा नेपालमा भित्र्याउन कम्पनीहरूले गरेको पहल पर्याप्त छैन, हुँदैन । यसमा सरकारी पक्षबाट नै चासो देखाउनुपर्छ । हुन्डी सञ्चालन गर्ने तथा अवैध रूपमा पैसा भिœयाउनेलाई कारबाही गर्नुपर्ने हो । केही समयअघि न्युरोडमा यस्ता कारोबारीलाई समायो । त्यसपछि फेरि केही भएको छैन । यस्ता कोराबारी चारपाँचजना नभइ चारपाँच हजार छन् ।
तिनीहरूलाई किन समाउँदैन सरकारले ?
अहिले भित्रिरहेको रेमिट्यान्सभन्दा कति गुणा बढी अवैध तरिकाबाट नेपाल भित्रिन्छ, भन्न सक्ने अवस्था छैन । सरकारले कडाभन्दा कडा कानुन ल्याएर दण्ड सजायको व्यवस्था गरेमा उनीहरू सही मार्गमा आउँछन् नत्र यस्तै चलिरहन्छ । यसरी नै सरकार कानमा तेल हालेर बस्ने हो भने अवैध कारोबार अझ बढ्न पनि सक्छ ।
जोखिम हुँदाहुँदै पनि किन वैदेशिक रोजगारमा गएकाले हुन्डीबाट रेमिट्यान्स पठाउँछन् ?
हुन्डीवालाहरू कामदारहरूको कोठाकोठामा गएर रकम संकलन गर्छन् । यसले उनीहरूलाई सुविधा मिलेको छ । हाम्रा कम्पनीको काउन्टर एक ठाउँमा हुन्छ । त्यसमा पनि त्यहाँ गएर लाइन बस्नुपर्ने हुन्छ । लाइन बस्नुपर्ने बाध्यताले गर्दा पनि उनीहरूले हुन्डीबाट पैसा पठाउने गरेका हुन् ।
हुन्डीबाट पठाएको पैसा डुबेको कुनै समाचार आउँदैन । चेतनाको अभावका कारण हुन्डी व्यवसाय फस्टाएको हो । कामदार सचेत भएको भए दुःख गरी कमाएको पैसा जोखिममा डुबाउने थिएनन् ।
प्रतिक्रिया दिनुहोस !
