सलमानले भनेः पाकिस्तानी कलाकार आतंकवादी होइनन्, किन प्रतिबन्ध लगाउने ?
एजेन्सीः भारतमा पाकिस्तानी कलाकारमाथि प्रतिबन्ध लगाएको भन्दै सलमान खानले त्यसको विरोध गरेका छन् । शुक्रबार सलमानले पाकिस्तानी कलाकार आतंकवादी नभएकाले प्रतिबन्ध लगाउनुपर्ने आवश्यकता नरहेको बताएका हुन् ।
भारत र पाकिस्तानबीच युद्धको खतरा बढ्दै गएपछि पाकिस्तानी कलाकारलाई भारतमा चलचित्र खेल्न प्रतिबन्ध लगाइएपछि सलमानले त्यसको विपक्षमा अभिव्यक्ति दिएका हुन् । सलमानले सबै पाकिस्तानी कलाकार भिसा लिएर भारतमा आएकाले उनीहरुलाई आतंकवादीको व्यवहार गर्नु नहुने बताए ।
सलमानले भने ‘कलाकार र आतंकवाद फरक कुरा हो । के कलाकार आतंकवादी हुन् ? उनीहरु भीसा लिएर भारत आएका हुन्छन् । उक्त भीसा सरकारले नै दिने गरेको छ ।’
सलमानले भारत र पाकिस्तानको स्थिती सामान्य र शान्त हुनु आवश्यक रहेको उल्लेख गर्दै भारतीय सेनाले गरेको सर्जिकल स्ट्राइकलाई ‘एक्सनको रियाक्सन’ भएको प्रतिक्रिया दिए ।
भारतमा पाकिस्तानी कलाकारलाई चलचित्रमा खेल्न प्रतिबन्ध लगाएको प्रति निर्माता करण जोहर र नायिका जुही चावलाले यस अघि नै आपत्ति जनाइसकेका छन् ।
शुक्रबार दिल्लीमा एक स्टोरको उद्घाटन कार्यक्रममा सलमानले पाकिस्तानी कलाकारमाथि प्रतिबन्ध लगाउनु नहुने तर्क गरेपछि उनको बोलीको पक्ष र विपक्षमा सामाजिक सञ्जालमा बहस सुरु भएको छ ।
प्रतिक्रिया दिनुहोस !
