भन्सारको ढिलाइले रसुवागढीमा रोकिए कन्टेनर

विदुर: दसैंका लागि चीनको केरुङबाट सामान बोकेर आएका तीन सयभन्दा बढी कन्टेनर रसुवागढी नाकामा थन्किएका छन् । स्थानीयका अनुसार कन्टेनर साँघुरो सडकमै राख्दा जोखिम बढेसँगै आवतजावतमा पनि समस्या भएको छ ।

सिन्धुपाल्चोकको तातोपानी नाका विनाशकारी भूकम्पका कारण बन्द भएपछि उत्तरतिर रसुवागढी नाकामात्र सञ्चालनमा छ । स्याफ्रुबेसी–रसुवागढी सडकको बीचमा पर्ने टिमुरेमा १५ दिनदेखि तीन सय कन्टेनर थन्किएका हुन् । काठमाडौंबाट एक सय ५२ किलोमिटर दूरीमा रहेको रसुवागढी नाकामा दैनिक डेढ सय कन्टेनर आवतजावत गरे पनि रसुवा भन्सारमा कर्मचारीको अभावमा दैनिक २०/२५ वटा कन्टेनरको सामानमात्र जाँच हुँदा समस्या भएको गोसाइकुण्ड ट्रक कन्टेनर व्यवसायी समितिका उपाध्यक्ष सीताराम अर्यालले बताए । उनका अनुसार समयमा नै भन्सार जाँच हुन नसक्दा लामो समयदेखि सयौं गाडी पालो कुरेर बसिरहेका छन् ।

अघिल्लो वर्षको तुलनामा यस वर्ष रसुवागढी नाका हुँदै सामान आयात बढेको छ । नाकामा गाडीको चाप बढ्नु स्वााविक भएको र कर्मचारी अभाव हुँदा केहि असहज भएको रसुवागढी भन्सार कार्यालयले जनाएको छ । अबको एक सातामा सबै कन्टेनरको जाँच भइसक्ने रसुवा भन्सारका प्रमुख केदार पनेरूले बताए । चीनमा सामान लिन गएका थप एक सयभन्दा बढी कन्टेनर सामान लोड गरेर नेपाल आउने तयारीमा छन् ।

दैनिक ७५ भन्दा बढी गाडीको भन्सार चेक गर्न सकिने भए पनि २० थान कन्टेनरको मात्र काम हुने गरेको विदुरका व्यापारी कृष्ण रावलले बताए । उनले रसुवागढी नाकालाई व्यवस्थित नबनाएसम्म समस्या समाधान नहुने बताए ।
रसुवाबाहेक बाहिरी जिल्लाका व्यापारी तथा चालक रसुवागढी नाकासम्म पुगेर फर्कने गरेका छन् । व्यापारी तथा चालक सीमापारि जान नपाउँदा सामग्री हराउने क्रम पनि बढ्दै गएको छ ।

रसुवागढी हुँदै केरुङ जान रसुवाका चालकलाई १२ देखि १५ हजार रुपैयाँ प्रतिट्रिप शुल्क बुझाउनुपर्दा अर्को समस्या थपिएको गोसाइकुण्ड ट्रक कन्टेनर व्यवसायी समितिका सचिव अशोक अधिकारीले बताए । उनका अनुसार रसुवागढी नाका खुलेपछि सामान आयात बढेको भए पनि आफैं जान नपाउँदा सामान हराउने तथा चोरी हुने समस्याले व्यापारी आजित भएका छन् ।