एक सय ३७ सहकारी कारबाहीमा
सिन्धुलीः सहकारी डिभिजन कार्यालय धनुषाले सिन्धुली, महोत्तरी र धनुषाका एक सय ३७ वटा सहकारी संस्थामाथि कारबाही थालेको छ । १० वटा सहकारीको दर्ता नै खारेजी गरेको छ । सिन्धुलीका मात्र २० वटा सहकारी संस्था छन् । सहकारी ऐन अनुसार नचलेका र डिभिजन कार्यालयको निर्देशन पालना नगर्ने सहकारीमाथि कारबाही थालिएको डिभिजन कार्यालयले जनाएको छ ।
समयमा लेखापरीक्षण नगर्ने, लेखापरीक्षण गर्दा लेखापरीक्षक नियुक्त नगर्ने र आर्थिक हिनामिना गर्ने सहकारी संस्थालाई दर्ता खारेजीसम्मको कारबाही थालिएको डिभिजन कार्यालयका प्रमुख रविन्द्रप्रसाद यादवले जानकारी दिए ।
उनले भने, 'तीन जिल्लाको गरी एक सय ३७ वटा सहकारी कारबाहीमा परेका छन् । यसमध्ये १० वटाको दर्तानै खारेज गरिसकिएको छ । बाँकी पनि छानबिनमा भएकाले दर्ता खारेजी हुन सक्छ ।'
सिन्धुली जिल्लाबाट दर्ता भएका चार सय ८६ वटा सहकारीमध्ये २० वटा सहकारी संस्था कारबाहीमा परेको बताइएको छ ।
डिभिजन कार्यालयको कार्य क्षेत्रभित्र पर्ने तीन जिल्लाका सहकारी संस्थाको अनुगमनका क्रममा कमजोरी भएको पाइएकालाई सचेत गराइएको र सचेत गराउँदासमेत अटेर गर्नेलाई कारबाही थालिएको उनको भनाइ छ । पछिल्लो समय सहकारी संस्थामा मनोमानी चल्दै गएका बेला डिभिजन कार्यालयले कारबाही थालेपछि सहकारी सञ्चालक सचेत भएका छन् ।
जिल्लाका रतनचुर, भीमस्थान र बेलघारी गाविसमा सञ्चालित महिला सहकारी संस्थामा लाखौं रुपैयाँ अनियमितता भएको पाइएकाले सहकारीमाथि पनि छानबिन थालिएको उनले जनाए ।
'तीनवटै गाविसमा सञ्चालिन महिला सहकारी संस्थामा ठूलोमात्रमा रकम हिनामिना भएको भन्दै उजुरी परेको छ । यस्ता उजुरीमाथि कारबाही थालिएको छ' ,उनले भने । जिल्लामा सञ्चालित सहकारी संस्थाले उद्देश्य अनुसारको काम नगरी सहकारी ऐन विपरीत चल्ने गरेको पाइएकाले उनीहरूलाई सच्चिने मौका दिएको पनि उनको भनाइ छ ।
जिल्ला सदरमुकाम र ग्रामीण क्षेत्रमा सञ्चालन गरिएका कतिपय सहकारी संस्था सरकारले दिने अनुदान लिनका लागि मात्र दर्ता हुने र अनुदान लिइसकेपछि निष्कृय हुने गरेको डिभिजन कार्यालयले जनाएको छ ।
प्रतिक्रिया दिनुहोस !
