स्थानीय निकायको तयारीमा सरकार
कञ्चनपुरः कृषि मन्त्री गौरीशङ्कर चौधरीले स्थानीय निकायको निर्वाचन गराउनका लागि सरकारको ध्यान केन्द्रित भएको बताएका छन् ।
कञ्चनपुरको पुनर्वास नगरपालिका-३ सीताबस्तीमा नवोदय जीवनशक्ति युवा क्लबले बिहीबारदेखि आयोजना गरेको चतुर्दशी मेलाको उद्घाटन गर्दै चौधरीले संविधान कार्यान्वयन गराउनका लागि स्थानीय निकायको निर्वाचन आवश्यक भएको बताए ।
‘निर्वाचनका लागि सरकार आन्तरिक गृहकार्यमा जुटेको छ’ उनले भने । आन्दोलनरत मधेसी र थारू समुदायसँग स्थानीय निकायको निर्वाचनको वातावरण बनाउनका लागि सरकार प्रयासरत रहेको उनको भनाई थियो । मेला बिहीबारदेखि तीनदिनसम्म आयोजना हुनेछ ।
यसैबीच, मन्त्री चौधरीले भारतीय अतिक्रमणको चपेटामा परेको प्याराताल क्षेत्रको स्थलगत अवलोकन गरे । स्थानीय बासिन्दासँग सीमा क्षेत्रबारे जानकारी लिँदै उनले यसबारे मन्त्रीपरिषदमा कुरा उठाउने आश्वासन दिए ।
भारतीय जङ्गली हात्तीले पुर्याउँदै आएको क्षतिबारे आफू जानकार भएको उल्लेख गर्दै मन्त्री चौधरीले हात्ती नियन्त्रण गर्न र कृषकलाई क्षतिपूर्ति रकम उपलब्ध गराउनका लागि कार्य अगाडि बढाइने बताए ।
पुनर्वास नगरपालिका–१२ मा सुदूरपश्चिमाञ्चल विश्वविद्यालयको आङ्गिक कृषि क्याम्पस स्थापनाका लागि सक्दो पहल गर्नुपर्ने उनको भनाई थियो ।
पुनर्वास नगरपालिकाकै जीवनशक्ति निम्न माध्यमिक विद्यालयले रु २० लाखभन्दा बढीको लगानीमा निर्माण गरेको पौडीपोखरीको निरीक्षण गर्दै उनले सरकारका तर्फबाट सहयोगका लागि पहल गर्ने पनि प्रतिबद्धता व्यक्त गरे ।
प्रतिक्रिया दिनुहोस !
