कोरियाली साहुले नेपालीलाई टीका लगाइदिएको भिडियो

सोलः दक्षिण कोरियामा नेपाली दूतावास, एनआरएन कोरिया साथै विभिन्न संघसस्थाले दसैं मनाए । दूतावासले विजय दशमीको दिन टीका ग्रहण तथा शुभकामना आदानप्रदान कार्यक्रम गर्यो । एनआरएनको समन्वयमा विभिन्न सस्थाले अष्टमीमा टीका लगाउने कार्यक्रम राखे । सँगै किम्हे र फेन्थेक माइग्रेन्ट सेन्टरले पनि अष्टमीकै दिन टीका ग्रहण कार्यक्रम राखेका थिए ।

तर, यसरी आयोजना भएका कार्यक्रमले भन्दा अर्को एक फरक कार्यक्रमले नेपाली कामदारलाई धेरै प्रभाव पार्यो । तीन नेपाली कार्यरत एक कम्पनीका साहुले नेपाली कामदारसँगै दसैं मनाएको भन्ने खबरले देश विदेशमा चर्चा पाएको छ । साहुले टीका लगाइदिएको भिडियो समेत सार्वजनिक भएको छ । भिडियोमा कम्पनी साहुले नेपाली कामदारलाई टीका लगाइदिएर आर्शीवाद पनि दिएका छन् ।

दसैंको शुभसाइत पारेर साहुले टीका लगाइदिएको कम्पनीमा कार्यरत काठमाडौँ फुटुंगका यदुकुमार गिरिले जानकारी दिए । सुयोछन् नजिक योन्छन्मा खिम्ची (कोरियन खानाको परिकार) उत्पादन गरिने कम्पनीमा कार्यरत नेपालीलाई खुसीसाथ दसैं मनाउने अवसर मिलाइदिएको हो । कम्पनी साहुले नेपालीको कामको प्रशंसा गर्दै आर्शीवाद दिए । साथै साहुले स्वास्थ्यको ख्याल गर्न समेत नेपालीलाई सुझाव दिएका छन् ।

एक पुरुष र दुई महिला कार्यरत नेपाली कार्यरत कम्पनी संचालकले दक्षिणा स्वरूप जनही ५०/५० वन दिए । कोरियनले पनि मनाएको दसैंको भिडियो अहिले सामाजिक संजालमा सार्वजनिक भएको छ । उक्त भिडियो कोरियामा रहेका धेरै नेपालीले शेयर पनि गरेका छन् ।