म्यान्मार डुंगा दुर्घटनाः ३० को मृत्यु, सयभन्दा बढी मारिएको आशंका
यांगुनः म्यान्मारमा भएको एक डुंगा दुर्घटनामा ३० जनाभन्दा बढीको मृत्यु भएको छ भने दर्जनौं मानिस बेपत्ता भएको स्थानीय अधिकारीले सोमबार जानकारी दिएका छन् ।
उक्त डुंगामा विद्यार्थी, शिक्षक र केही कामदार सवार रहेका बताइएको छ । शनिबार बिहानै भएको यस दुर्घटनाबाट १ सय ५४ व्यक्तिको उद्धार गरिएको छ । म्यान्मारको मोनिवा सहरबाट ७२ किलोमिटर उत्तरमा पर्ने जलक्षेत्रमा उक्त दुर्घटना भएको थियो । उद्धारकर्मीले सुरुमा पानीमा तैरिएका मृत शरीरको मात्र उद्धार गरिरहेकाले डुबेको डुंगा पानी बाहिर ल्याउँदा मृतकको संख्या १ सयभन्दा बढी पुग्ने अधिकारीले बताएका छन् ।
उक्त डुंगामा २ सय ४० देखि २ सय ५० जनासम्म सवार रहेको अनुमान गरिएको छ । डुंगामा विश्वविद्यालयका ७० देखि ८० जना विद्यार्थी, करिब ३० जना शिक्षक, केही चिकित्सक र १ सयभन्दा बढी व्यक्ति बीच बन्दरगाहमा चढेका जनाइएको छ । दुर्घटनापछि डुंगामा कार्यरत चारजना कर्मचारी कानुनी प्रक्रिया पूरा नगरेका आरोपमा पक्राउ परेका छन् ।
दुर्घटनाबाट बाँच्न सफल २७ वर्षीय एक विद्यालयका शिक्षिकाले बौद्धधर्मावलम्बीले मनाउने पर्वको आफ्ना एक वर्षीय छोरा र श्रीमान्सँग पारिवारिक यात्रा गरिरहेकामा आफ्ना छोराको मृत्यु भएको र श्रीमान्को अवस्था अज्ञात रहेको बताएकी छन् ।
उनले डुंगामा क्षमताभन्दा बढी यात्रु राखेकाले डुंगा डुबेको उनको दाबी छ । म्यान्मारमा डुंगा यात्रामा सुरक्षाको कमी र क्षमताभन्दा बढी यात्रु डुंगामा सवार हुनुले बारम्बार दुर्घटनाका कारण बन्न गरेकोे अधिकारीले बताएका छन् ।
पुल खस्दा ८ को मृत्यु
जकार्ताः इन्डोनेसियाको बालीमा पुल खस्दा ८ जनाको मृत्यु भएको छ । उक्त पुलले त्यहाँका दुईवटा टापुलाई जोड्ने गरेको थियो । हिन्दु मन्दिरमा भइरहेको कार्यक्रमका लागि जाँदै गरेका मानिसहरू दुर्घटनामा परेका थिए । नदीमा अत्यधिक पानी नभए पनि पुलले थिचिएर उनीहरूको मृत्यु भएको थियो ।
दुर्घटनामा ३० जना घाइते भएका छन् । उक्त पुलले नुसा लेंबोगन र नुसा क्यानिंगन टापुलाई जोड्ने गरेको थियो । आइतबार पनि इन्डोनेसियामा डुंगामा आगलागी हुँदा ४ जनाको मृत्यु भएको थियो । इन्डोनेसियामा १७ हजार पाँच सय द्वीप रहेका छन् । साना तर उच्चगतिमा चल्ने डुंगाले त्यस्ता हजारौं टापुलाई जोड्ने लोकप्रिय साधन हुन् ।
प्रतिक्रिया दिनुहोस !
