एलजीको भीआरएफ एसी बजारमा

काठमाडौः नेपालको एयर कन्डिसनर (एसी) उत्पादन कम्पनी एलजी नेपालमा चौथो जेनेरेसनको एसी उत्पादन गर्ने पहिलो कम्पनी भएको छ । पहिलो कम्पनीको रूपमा रहेको एलजीले अहिले बजारमा भेरिएवल रेफ्रिजेरेटर फ्लो (भीआरएफ) एसीको रूपमा आफ्नो नयाँ उत्पादन प्रस्तुत गरेको छ ।

नेपालका लागि एलजी इलेक्ट्रोनिक्सको आधिकारिक बिक्रेता सीजी इलेक्ट्रोनिक्सले यसलाई भित्र्याएको हो । चौथो जेनेरेसनका रूपमा कम्पनीले ‘मल्टी भी फोर' एसीलाई बजारमा ल्याएको छ ।

चौथो जेनेरेसनका पुराना एसीको तुलनामा कम्पनीले मल्टी भिलाई प्रविधिमैत्री एसीको निमार्ण गरेको एलजी इलेक्ट्रोनिक्स नेपालका नायव प्रबन्धक विवेक ज्ञवालीले बताए । उनका अनुसार नेपालमा सीजीको सतुङ्गलस्थित इलेक्ट्रोनिक कार्यालय, चितवनको मेघौलीस्थित रिसोर्टमा, केसर मल र नेपाल एसबीआई बैंकमासमेत यो एसी जडान भईसकेको छ ।

सन् १९६८ बाट एसी निमार्ण गर्न थालेको कम्पनीले अहिलेसम्म आइपुग्दा आपूmलाई विश्वका अन्य विभिन्न ब्रान्डको माझमा अब्बल सावित गरिसकेको छ । विन्डोज एसी, स्प्लीट एसी, सेन्ट्रल एसी प्रणालीमासमेत एसी निमार्ण गरेको कम्पनीले अहिले भीआरएफ प्रणालीका नयाँ एसी बजारमा भित्र्याएको हो ।

विशेषगरी ठूला व्यावसायिक भवन, कर्पोरेट हाउस, बैंक, अस्पताल तथा औद्योगिक कलकारखानामा यो बढी प्रभावकारी हुने ज्ञवालीले बताए । उनका अनुसार कम्पनीले भीआरएफ एसी आफै प्रयोग गर्दै आएको छ । यो स्प्लीट एसीको तुलनामा केही फरक रहेको छ ।

अहिले प्रयोग गर्दै आएको स्प्लीट एसीमा कोठा भित्र एसी हुन्छ र त्यसलाई चलाउन बाहिर एउटा छुट्टै बक्स राखिएको हुन्छ । त्यसले ठुल्ठूला मल, होटेल, हाउँजीङलगायत स्थानको सुन्दरतालाई घटाउछ । तर भीआरएफ एसीलाई घरको छत, बगैंचा वा अन्य कुनै स्थानमा राखेर पाइपमार्फत एकैपटक सयभन्दा बढी कोठामा एसी सञ्चालन गर्न सकिन्छ । आउट डोरमा राखिएको केन्द्रीय युनिटबाट नै सबै कोठामा तापक्रमको सन्तुलन मिलाउन सकिन्छ । यसको पाइपलाई एक हजार मिटर परसम्म पनि पुर्‍याउन सकिने उनको भनाइ छ ।

ज्ञवालीका अनुसार भीआरफ प्रणालीबाट कोठाको तापक्रम नियन्त्रण गर्न आवश्यक ग्यासको मात्रालाई नियन्त्रण गरेर कोठालाई आवश्यक मात्रामा तातो-चिसो बनाउछ । पछिल्लो समय बजारमा भीआरएफ प्रणालीका विभिन्न कम्पनीहरू भित्रिएका छन् । त्यसमा एलजीको एसी बिजुली कम खपत गर्ने एसीको रूपमा विश्व बजारमा चिनिएको कम्पनीको दाबी छ ।

अन्य ब्रान्डको तुलनामा यसले २० प्रतिशत कम बिजुली खपत गर्नेछ । सायद यसैले पनि होला एलजीले भीआरएफ ब्रान्डको नम्बर वान एसी भएको दाबी गरेको छ । यसको कार्यक्षमता अन्य कम्पनीको तुलनामा चार गुणा बढी रहेको ज्ञवाली बताउँछन् । उनका अनुसार जडानका साथै प्रयोगमा समेत सहज रहेको एलजीका एसीमा आफ्नै ‘हाइ प्रेसर अल रिटर्न' प्रणालीको प्रयोग गरिएको छ ।

यसमा प्रयोग भएको कम्प्रेसर पूर्णरूपमा इन्भटर कन्ट्रोल छ । साउन्डको हिसाबले एलजीले विश्व किर्तिमान नै कायम गरेको ज्ञवालीको भनाइ छ । उनका अनुसार एलजीका एक टन एसीमा १९ डेसिबलभन्दा कम आवाज दिने क्षमता छ जुन हाम्रो कानले नसुन्य हुन्छ । एसीमा भ्याकुर इन्जेक्सन र ६ वटा वाइपास भल्वसहितको प्रविधि जडान गरिएको छ । यसले ८० एचपीसम्मको क्षमता प्रदान गर्नेछ ।

कम्पनीले अहिले प्रमोसनल प्राइजको रूपमा एसीको बिक्रीवितरण गरिरहेको छ । नेपाली बजारमा चार एचपीदेखि ८० एचपी क्षमता भएका एसी उपलब्ध छन् । ज्ञवालीका अनुसार एक टनको एसीको जडान खर्च करिब एक लाख २५ हजार पर्छ । यो सामान्य बेडरूम वा कार्यालय कोठाका लागि उपयुक्त हुन्छ ।