बुध्द एयरको हवाई सुरक्षा सुपरीवेक्षण
काठमाडौः अन्तर्राष्ट्रिय उड्डयन संगठन (आइकाओ)ले आन्तरिक वायुसेवा कम्पनी बुद्ध एयरको हवाई सुरक्षाको सुपरीवेक्षण गरेको छ । गत असोज १० देखि १२ गतेसम्म सञ्चालित सुपरीवेक्षणमा बुद्ध एयरका विभिन्न हवाई सुरक्षा इकाइको अडिट भएको बुद्ध एयरले जनाएको छ ।
आइकाओका प्रतिनिधि क्याप्टेन मेरी हेलेन जुब्रीकिज, क्याप्टेन माइकल ब्लेन्ड र होजे एम स्यालग्योरोले नेपाल नागरिक उड्डयन प्राधिकरणसँगको समन्वयमा बुद्ध एयरका विभिन्न एकाइको अडिट गरेका थिए ।
उक्त अडिटकाक्रममा बुद्ध एयरको उड्डयन सुरक्षाको अवस्था सुधारोन्मुख रहेको प्रतिवेदनले देखाएको बुद्ध एयरका प्रवन्ध निर्देशक विरेन्द्रबहादुर बस्नेतको भनाइ छ ।
अडिटको बिस्तृत विवरण आउन भने केही दिन पर्खनु पर्नेछ । बुद्धले प्राधिकरण तथा आईकाओका प्रतिवेदनलाई यथासिघ्र सम्बोधन गर्ने जनाएको छ ।
नेपाली उड्डयन सुरक्षामा देखिएको विभिन्न कमजोरीका कारण विगत तीन वर्षदेखि युरोपियन युनियन अन्तर्गतको युरोपेली आयोगले नेपाली उड्डयन क्षेत्रलाई नै कालो सूचिमा राखेको थियो । यसैलाई दृष्टिगत गर्दै नेपाल नागरिक उड्डयन प्राधिकरणले आइकाओको सहायतामा बुद्ध एयरका विभिन्न कार्यालयको सुपरीवेक्षण गरेको जानकारी बुद्ध एयरले विज्ञप्तीमार्फत गराएको छ ।
करिब दुई दशकदेखि आन्तरिक वायुसेवा प्रदान गरिरहेको बुद्ध एयरको बजार हिस्सा ६१ प्रतिशत रहेको छ । हवाई यात्रालाई थप व्यवस्थित तथा जोखिम न्यूनिकरण गर्न बुद्ध एयरले आफ्ना कर्मचारी तथा प्राविधिकलाई अन्तर्राष्ट्रियस्तरको तालिम प्रदान गर्दै आएको छ ।
बुद्धले कर्मचारी तालिमका लागि अन्तर्राष्ट्रिय हवाई यातायात संघ (आईटा)को प्रशिक्षण केन्द्र पठाउने गरेको छ । पछिल्लो समय बुद्धले आफैं अन्तर्राष्ट्रिय स्तरकै प्रशिक्षक तयार पारिरहेको छ । बुद्धको आफ्नै हवाई मर्मत तथा संभार संस्था रहेको छ ।
हवाई क्षेत्रको जोखिम न्यूनिकरणका लागि बुद्ध एयरले विगत वर्षदेखि नै विभिन्न अन्तर्राष्ट्रिय हवाई सुरक्षण परीक्षकहरुबाट विभिन्न विभाग, एकाईअन्तर्गतका टेक्निकल, अपरेशन, ग्राउड ह्याडलिङ तथा जनशक्तिहरुको अडिट (परीक्षण) गराउने गरेको छ । यस्तो अडिटका नतिजा सन्तोषजनक रहेको पनि बुद्ध एयरका प्रबन्ध निर्देशक बस्नेतको भनाइ छ ।
प्रतिक्रिया दिनुहोस !
