प्रधानमन्त्री प्रचण्ड र भारतीय राष्ट्रपति मुखर्जीबीच भेटवार्ता
कात्तिक १७, २०७३ बुधबार २०:११:०
काठमाडौँः प्रधानमन्त्री पुष्पकमल दाहाल ‘प्रचण्ड’ र भारतका राष्ट्रपति प्रणव मुखर्जीबीच बुधबार साँझ हायात रिजेन्सी होटलमा शिष्टाचार भेटवार्ता भएको छ ।
प्रधानमन्त्री प्रचण्ड र मुखर्जीबीचको भेटमा दुई मुलुकबीचको सम्बन्ध र आपसी हितका बारेमा वार्तालाप भएको परराष्ट्रमन्त्री डा प्रकाशशरण महतले जानकारी दिए ।
महतका अनुसार मुखर्जीले प्रधानमन्त्री प्रचण्डको भारत भ्रमण र केही दिन अघि भारतको गोवामा भएको दुई मुलुकबीचको उच्चस्तरीय भेटवार्ताले आपसी सम्बन्ध थप मजबुत बनाएको विचार व्यक्त गरेका छन् ।
भेटमा प्रचण्डले दुई मुलुकबीच रहिआएको सुमधुर सम्बन्ध अरु सुदृढ बनाउँदै लान नेपालका तर्फबाट कुनै कमी रहन नदिने विश्वास व्यक्त गरेका छन् ।
भारतीय राष्ट्रपतिसँगको भेटमा प्रधानमन्त्रीले नेपालको संविधान कार्यान्वयनको चरणमा रहेको र संविधानमा समेट्नु पर्ने केही विषयलाई समेट्ने प्रयास भइरहेको जानकारी गराएका छन् ।
भेटमा नेपालका तर्फबाट मन्त्री महत, संस्कृति, पर्यटन तथा नागरिक उड्डयन मन्त्री जीवनबहादुर शाही, मुख्यसचिव डा सोमलाल सुवेदी र परराष्ट्र सचिव शङ्करदास वैरागी सहभागी थिए ।
उच्चस्तरीय भेटवार्तामा भारतका तर्फबाट उच्च अधिकारीहरु सहभागी थिए । भारतीय राष्ट्रपति मुखर्जी नेपालको राजकीय भ्रमणका लागि बुधबार दिउँसो नेपाल आएका हुन् ।
प्रतिक्रिया दिनुहोस !
