काठमाडौः अन्तर्राष्ट्रिय लघुचलचित्र महोत्सव ‘एकादेशमा' शुक्रबारदेखि काठमाडौंको कमलपोखरीस्थित कुमारी सिनेमा हलमा सुरु भएको छ । लघुचलचित्रको विश्लेषण, प्रदर्शनी र अन्तक्रियासहित तीन दिनसम्म चल्ने महोत्सवको पहिलो दिन दुई नेपाली एवं स्विट्जरल्यान्ड, क्यानडा र भुटानका एकएक गरी पाँचवटा चलचित्र प्रदर्शन गरिएको थियो ।
प्रदर्शित दुई नेपाली छोटो चलचित्रमा पूजा गुरुङ र विभूषण बस्नेत निर्देशित ‘दाद्या' र सुनिल पाण्डे निर्देशित ‘अनन्त यात्रा' रहेका थिए । त्यसैगरी क्यानडेली निर्देशक मार्टिन इडरलिनको ‘होले', स्विस निर्देशक फ्रान्सेस्का एकालिसी र मार्क आलेजाको ‘मोरिम' एवं भुटानी निर्देशक डेचेन रोडरको ‘लो सुम चो सुम' रहेका थिए ।
नेपालमा कमैमात्र प्रदर्शन हुने भुटानी चलचित्रलाई दर्शकले निकै रुचाए । उदीयमान भुटानी चलचित्र उद्योगलाई महोत्सवमा विशेष महत्व दिइएको छ । बलिउडको प्रभाव हुँदाहुँदै पनि भुटानका केही चलचित्रकर्मीले आफ्ना कलाद्वारा अन्तर्राष्ट्रिय तहमा पहिचान छाड्न खोजिरहेको छ । आयोजकले दिएको जानकारी अनुसार महोत्सवमा भुटानी प्रयासलाई सम्मान गर्दै ६ वटा चलचित्र प्रदर्शन गरिने भएको छ ।
कार्यक्रममा बोल्दै चलचित्र विकास बोर्डका अध्यक्ष राजकुमार राईले एकादेशजस्तो अन्तर्राष्ट्रिय छोटो चलचित्र महोत्सव खासगरी अलग धार र सिर्जनशील चलचित्रका लागि राम्रो प्लेटफर्म भएको बताए । महोत्सवको यो चौथो संस्करण हो जसमा संसारभरका ३० मिनेटभन्दा कम समयका ७८ वटा लघुचलचित्र सहभागी छन् ।
महोत्सवमा २१ वटा नेपाली लघुचलचित्र छनोटमा परेका छन् ।
महोत्सवलाई उदीयमान चलचित्रकर्मी र चलचित्रका विद्यार्थीलाई आफ्नो सिर्जना र प्राविधिक दक्षता अभिव्यक्त गर्ने अवसरका रूपमा लिइएको छ । आयोजकले जनाएअनुसार महोत्सवमा सात सयभन्दा बढी चलचित्रले सहभागिताका लागि निवेदन दिएका थिए । सहभागीमध्ये १६ वटा चलचित्र यही महोत्सवमार्फत वल्र्ड प्रिमियर हुँदैछ ।
प्रतिक्रिया दिनुहोस !
