अमेरीकाः अमेरिकाको शक्तिकेन्द्र ह्वाइट हाउसबाट बिदा हुन लागेका र ह्वाइट हाउस प्रवेश गर्न लागेका दुई प्रथम महिलाबीच शुक्रबार भेटवार्ता भएको छ ।
प्रथम महिलाले के के जान्न आवश्यक छ भन्ने कुरा आफैंले बुझ्न आवश्यक हुन्छ । यही प्रसंगमा फेसन आइकनका रूपमा समेत ख्याति कमाएकी मिसेल ओबामा र एक समयकी चर्चित मोडेल मेलानिया ट्रम्पको भेट बाराक ओबामा र डोनाल्ड ट्रम्पको भेटजत्तिकै चर्चित बनेको छ ।
भेटका क्रममा प्रथम महिलाका रूपमा आठ वर्षको अनुभव सँगालेकी मिसेल ओबामाले मेलानियालाई ‘बेस्ट अफ द बेस्ट’ वुमन भनेकी छन् । उनीहरूबीच रमाइलो कुराकानी भएको थियो । दुवैजना निकै आकर्षक देखिएका थिए । भेटमा मेलानियाले मिसेललाई निकै ध्यानपूर्वक सुनेकी थिइन् ।
मिसेलले भने उनलाई औपचारिक र व्यावहारिक कुराका बारेमा बयान गरेकी थिइन् । सो अवसरमा मिसेलले मेलानियालाई पतिको चुनावी प्रचारमा नदेखिनुको कारण पनि सोधेकी थिइन् । मेलानियाले आफ्नो साथमा १० वर्षीया छोरा ब्यारोन भएकाले उसैको रेखदेखमा व्यस्त भएको बताएकी थिइन् ।
प्रथम महिला भएपछि धेरै उत्तरदायित्व वहन गर्नुपर्ने मिसेलको अनुभवलाई मेलानियाले आत्मसात् गरेकी थिइन् । ७० वर्षीया डोनाल्ड ट्रम्पले राष्ट्रपतिको चुनावमा विजय हासिल गरेपछि उनकी तेस्री पत्नी ४६ मेलानिया ट्रम्पले अमेरिकी प्रथम महिला बन्ने अवसर पाएकी हुन् । एजेन्सी
प्रतिक्रिया दिनुहोस !
