समाजलाई युवाको सम्बोध

सिनेमा       :   रक अन–२
निर्देशक      :   सुजात सौदागर
कास्ट        :   फरहान अख्तर, अर्जुन रामपाल, श्रद्धा कपुर, पुरव कोहली, प्राची देसाई र शशांक अरोरा
रेटिङ         :   २.५/५
सुजात सौदागर निर्देशित पहिलो चलचित्र ‘रक अन–२’ ‘म्युजिकल ड्रामा’ विधाअन्तर्गत तयार पारिएको सामाजिक सिनेमा हो । अभिषेक कपुर र पुवाली चौधरीको मूल चरित्रमा आधारित यस सिनेमामा फरहान अख्तर, अर्जुन रामपाल, श्रद्धा कपुर, पुरब कोहली, प्राची देसाई र शशांक अरोराको भूमिका देखिन्छ ।

फरहान अख्तर र रितेश सिधवानीको लगानीमा एक्सेल इन्टरटेनमेन्टले निर्माण गरेको यो सिनेमा २००८ मा रिलिज भएको सिनेमा ‘रक अन’को ‘सिक्वेल’ हो, जसमा शंकर एहसान लोयको संगीत छ ।सिनेमाको धेरै दृश्य उत्तर भारतको मेघालय र सिलोङमा छायांकन गरिएको छ । रक संगीतको राजधानी मानिने सिलोङको सामाजिक कथावस्तु नै यसको मूल कथा हो ।

सिनेमाको मान्यता छ, ‘ठूलो रुखको छायाँमा सानो रुख हुर्कन सक्दैन ।’ संगीत शास्त्रीय मात्रै हुँदैन, रक पनि हुन्छ र त्यसलाई सबैले आत्मसात् गर्दै जानुपर्छ भन्ने भाव सिनेमाले दिन खोजेको छ । सामाजिक परिवेशमा जोडिएका पात्रहरूको आत्मालोचनाले सिनेमालाई संवेदनायुक्त बनाएको छ । आफ्नो लापरबाहीका कारण एक पात्रले आत्महत्या गरेपछि गाउँमा गएर जीवन चलाइरहेका आदित्य स्रोफ ‘फरहान अख्तर’को कथावरिपरि सिनेमा घुमेको छ ।

छरिएका ‘म्याजिक ब्याण्ड’का सदस्यहरूलाई पुनः एकधारमा ल्याउन साथी र आफन्तको महत्व सिनेमामा स्पष्ट पारिएको छ । गाउँले परिवेशमा देखिएका समस्यालाई सहयोग र साथ दिँदै आएका मुख्य पात्रको कथा प्राकृतिक विपत्तीमा घर, फार्म जलेर नष्ट भएपछि मोडिएको छ । साथीहरूसँग मिलेर गाउँलाई सहयोग गर्न म्याजिक ब्यान्डले अन्य ब्यान्डको साथ लिएर ठूलो कन्सर्ट आयोजना गर्दा आउने दुःख कष्टलाई पन्छाउँदै सफलता हासिल गरेको हुन्छ ।

निरन्तर प्रयास र साथ भयो भने जे जस्तो दुःख आइपरे पनि काम फत्ते गर्न सकिन्छ भन्ने सन्देश पनि दिन खोजेको छ यस चलचित्रले ।शंकर एहसान लोयको संगीत मन छुने खालको भए पनि रक ब्यान्डका लागि खासै रुचिकर देखिँदैन । पात्रहरूको भुमिकालाई सशक्त बनाउनमा निर्देशक चुकेका छन् । आफ्नाे भाइले आत्महत्या गरेपछि रक म्युजिकलाई खाली शोख मात्र बनाउने जिया शर्मा (श्रद्धा कपुर)को भूमिका सबल छ ।

आत्महत्या गर्नुमा म्याजिक ब्यान्ड मात्र नभई आफ्ना नै बाबुको पनि दोष रहेको मानसिकताबाट माथि उठेर उनले सामाजिक सहयोगका लागि अग्रसरता देखाएको कथाले अहिलेको पुस्तालाई बलियो सन्देश दिन्छ । सिनेमामा लोभलाग्दो दृश्यको भरपुर प्रयोग भएको छ । विपत्तीमा पर्दा पनि नआत्तिन र सबैलाई सहयोग गर्न दिइएको सन्देशले महाभूकम्पबाट ग्रसित नेपालीलाई भावनात्मक साथ दिन सक्छ ।

त्यति हुँदा–हुँदै पनि कमजोर कथा र निर्देशनले सिनेमालाई ‘रक अन’जत्तिको आकर्षक बनाएको छैन । सिनेमाले दर्शकको अपेक्षामा उत्रन भने सफल हुन सकेन । भारतमा भर्खर ठूला दरको नोट बन्द गर्दा पनि सिनेमा क्षेत्र मारमा परेको प्रष्ट हुन्छ । बक्सअफिसमा जस्तोसुकै व्यापार गरे पनि यो सिनेमाले जगाउने सामाजिक भावनाचाहिँ बलियो छ ।