अभिभावककै पथमा
भाइबहिनीहरू हामीलाई हाम्रो जीवनमा सबैभन्दा बढी प्यारो र महत्त्वपूर्ण लाग्ने व्यक्ति भनेका हाम्रा आमाबुवा नै हुन् । हामी जन्मिएदेखि नै उहाँहरूका गतिविधि नियालेर त्यसलाई व्यवहारमा उतार्ने गर्छौं । कतिले आफ्ना आमाबाबुको पेसालाई आफ्नो लक्ष्य बनाएका हुन्छन् भने कतिले उहाँहरूको रुचिलाई आफ्नो पनि रुचि बनाउँछन् ।
आफ्नी आमाको रुचिको विषय संगीतलाई आफ्नो पनि रुचि बनाउनेमध्ये समृद्धि बस्याल पनि हुन् । उनले आफ्नी आमा भारती बस्यालको शब्द र संगीतमा हालै एउटा गीत 'समृद्धि' बजारमा ल्याएकी छन् । सात वर्षको उमेरदेखि गायनमा लागेकी समृद्धिले अन्य केही गीतलाई यसमा समेटेर एउटा एल्बम निकाल्ने तयारी गरिरहेकी छन् ।
त्यसैगरी चाँडै बन्न लागेको यही गीतको म्युजिक भिडियोमा पनि उनले नै अभिनय गर्ने भएकी छन् । वैशाख १२ को भूकम्पमा मानिसका साथै धेरै जनावरको पनि मृत्यु भयो । तर, जनावरको वास्ता कसैले पनि गरेनन् । त्यसैले जनावरलाई पनि माया गर्नुपर्छ भन्ने सन्देश उनको गीतले दिएको छ । समृद्धिकी आमा भारतीले लखनउबाट शास्त्रीय संगीतमा स्नातक पार गरेकी छन् ।
२०५४ सालमा रेडियो नेपालबाट गीत गाएर अध्ययनका लागि भारत गएकी भारतीले त्यति बेला नै 'मृगतृष्णा' नामक एल्बम निकालेकी थिइन् । त्यसपछि 'मिराकल' हुँदै अन्य विभिन्न सांगीतिक कोसेली उनले श्रोतामाझ ल्याएकी छन् । आमाकै प्रेरणाले यस क्षेत्रमा लागेकी समृद्धिले आमाको विषयमा एक गीत लेखेर त्यसलाई अंग्रेजीमा अनुवाद गरिसकेकी छन् ।
समृद्धि सेन्ट मेरिज स्कुल जावलाखेलमा कक्षा ४ मा पढ्छिन् । हार्मोनियम बजाउन जान्ने उनी आफ्नी आमासँग 'आमा मलाई ल्याउदेऊ न हिमाल पारिको त्यो लालीगुराँस' बोलको गीत रेकर्ड गराउने तरखरमा छिन् । यही कारणले गर्दा उनी नियमित अभ्यास पनि गरिरहेकी छन् । तर गीतसंगीतको अभ्यास उनी बिदाको दिनमा र हरेक दिन गृहकार्य सकाएर केही पढिसकेपछि मात्रै गर्छिन् ।
तारादेवी, नारायणगोपाल, लता मंगेशकर उनलाई मन पर्ने गायकगायिका हुन् । गायन उनको रुचि भए पनि लक्ष्य एस्ट्रोनट बन्ने छ । वैज्ञानिक अनुसन्धानमा उनको विशेष रुचि छ । त्यसैले त उनी फूल टिपी त्यसलाई पिसेर अत्तर बनाउँछु भन्दै प्रयासमा जुटिरहन्छिन् । 'गीत राम्रो गाउँछु । त्यसैले मानिसले चिन्ने बन्न र नाम कमाउन यसमा लागेको', उनले भनिन् ।
अभिभावककै पथमा हिँड्न रुचाउनेमध्ये गायक अमन प्रधान पनि हुन् । हाल बालुवाटारस्थित मेरिडियन इन्टरनेसनल स्कुलमा कक्षा १० मा पढ्ने अमन आफ्ना बाबा संगीतकार राहुल प्रधानकै प्रेरणाले सांगीतिक क्षेत्रमा लागेका हुन् । उनले 'अमन द रकस्टार' र 'रकस्टार रिलोडेड' नामक दुई एल्बम श्रोतामाझ ल्याइसकेका छन् । यस वर्ष पढाइमा नै बढी ध्यान दिनुपर्ने भएकाले अमनले गायनमा समय दिन नभ्याए पनि एसएलसीपछि नयाँ गीतको तयारी गर्ने उनले सोच बनाएका छन् ।
आठ वर्षको उमेरमा चलचित्र 'लभ यु बाबा'को निर्देशन गरेर विश्वकै कान्छा निर्देशकका रूपमा गिनिज बुकमा नाम लेखाउन सफल सौगात विष्ट पनि आफ्ना बाबा गजित विष्टकै पथ पछ्याउँदै यस क्षेत्रमा लागेका हुन् । एउटा तेलको विज्ञापनमा खेल्दै सानो पर्दाबाट आफ्नो अभिनय यात्रा सुरु गरेका सौगातले केही ठूला पर्दाका चलचित्रमा पनि अभिनय गरिसकेका छन् । हाल सौगात आफ्नो नयाँ चलचित्र 'हैरान'को छायांकनमा व्यस्त छन् ।
प्रतिक्रिया दिनुहोस !
