काठमाडौः नायिका खुश्बु खड्का चलचित्र ‘भ्रम’ रिलिजको पर्खाइमा छिन् । उनीद्वारा अभिनित यो चलचित्र पुस २२ गते रिलिज हुने तरखरमा छ ।
त्रिकोणात्मक प्रेमकथामा आधारित चलचित्रमा आफूले माया गर्ने व्यक्तिबाट माया नपाउनु उनले निभाएको भूमिकाको सार हो । सिन्धुपाल्चोकमा जन्मेहुर्के पनि कक्षा ८ देखि उनी काठमाडौमा अध्ययन गर्न थालिन ।
विद्यालय जीवनदेखि तेक्वान्दो खेल्न निकै रुचि राख्ने खुश्बुले ब्ल्याकबेल्ट पाइसकेकी छन् । आफू खेल्नेताका खेल क्षेत्रमा त्यति राम्रो भविष्य नदेखेकी खुश्बु अहिले त्यही क्षेत्रमा सफलता हासिल गर्न सकिने बताउँछिन् ।
सुन्दर अनुहार, मिलेको शरीर भएपछि नायिका बन्ने रहर कसलाई नहोला र ! त्यसमा पनि रेखा थापा र निरुता सिंहको चलचित्र हेरेपछि खुश्बुलाई नायिका बन्ने इच्छा थप उत्कठ भइदिन्थ्यो ।
आफू खेलाडी भएकाले उनलाई एक्सन चलचित्र गर्ने रहर थियो । एउटा कार्यक्रममा नृत्य निर्देशक गोविन्द राईसँग भेट हुँदा उनले आफ्नो रहरको पोको खोलिन ।
तत्कालै छायांकन सुरु हुन लागेको चलचित्रको एउटा गीतमा उनले नृत्य गर्ने अवसर पाइन् । चलचित्रमा काम गर्न सक्छु भन्ने आत्मविश्वास उनलाई पहिलेदेखि नै थियो । उक्त चलचित्रमा काम गरेपछि पाएको प्रशंसाले उनलाई थप हौसला बढ्यो । त्यसपछि चलचित्र ‘सायना’मा उनले मुख्य भूमिका निभाउने मौका पाइन् ।
चलचित्र ‘हाम्रो माया जुनीलाई’ बाट अभिनय यात्रा सुरु गरेकी खुश्बुले ‘सुकुलगुन्डा’, ‘उहिले बाजेको पालामा’, ‘सिष्टम’, ‘दीपज्योति’ लगायत १० भन्दा बढी चलचित्रमा काम गरिसकेकी छिन् ।
ऋषि लामिछानेको चलचित्र ‘हाम्रो माया जुनी जुनीलाई’बाट अभियान यात्रा सुरु गरेकी खुश्बुले ‘सुकुलगुन्डा’, ‘उहिले बाजेको पालामा’, ‘सिस्टम’, ‘दीपज्योति’लगायत १० भन्दा बढी चलचित्रमा काम गरिसकेकी छन् ।
टेलिचलचित्र ‘मेरी बास्सै’का केही भागमा अभिनय गरेकी उनले करिब तीन दर्जनभन्दा बढी म्युजिक भिडियोमा मोडलिङ गरेकी छन् । फुर्सदमा किताब पढ्न रुचाउने खुश्बु मीठो पकाएर परिवारलाई खुवाउन रुचाउँछिन् ।
२०६४ सालको राष्ट्रिय खेलमा सहभागिता जनाइसकेकी खुश्बु तेक्वान्दोको नियमित अभ्यासले शरीरलाई फिट बनाउन सहयोग मिलेको बताउँदिन् । खेलजीवनले चलचित्रमा फाइदा पुगेको उनको अनुभव छ ।
चलचित्र र खेल दुवैमा उत्तिकै संघर्ष गर्नु परे पनि मन परेको क्षेत्र हुनाले चलचित्रमा बढी झुकाव भएको उनको भनाइ छ । अहिले उनी रमेशकुमार राईको चलचित्र ‘जुनी’मा व्यस्त छिन् ।
व्यवस्थापन उनको पढाइको विषय भएकाले उनले व्यवसाय पनि सँगै अगाडि बढाएकी छन् । बी एन्ड के इन्टरटेनमेन्ट प्रालि डिल्लीबजारकी उनी सञ्चालक समेत हुन् । संस्कृतिलाई छाड्न नहुने मान्यता बोकेकी उनी भन्छिन्, ‘अहिलेको समयमा यसो नगर, उसो नगर भन्न मिल्दैन । चलचित्रमा मैले गरेको त छैन, तर किस सिन सामान्य भइसक्यो ।’
प्रतिक्रिया दिनुहोस !
