पिन टाइप नगरी मोबाइलमा ब्यालेन्स रिचार्ज
१२ वर्षअघि हजुरबाको हातमा नेपाल टेलिकमको सिमसहित नोकियाको सेट आउँदा साह्रै खुसी लागेको थियो । हजुरबाबा पढेलेखेको भएकाले नम्बर डाएल गर्न, ब्यालेन्स रिचार्ज गर्न उहाँलाई गाह्रो थिएन । एक दिन उहाँले रिचार्ज कार्ड किनेर घरमा लिएर आउनुभयो ।
हजुरबाले ब्यालेन्स रिचार्ज गर्न कार्ड कोरेको हेरिरहेका थिएँ । उहाँ आफैं रिचार्ज गर्दै हुनुहुन्थ्यो । सायद उहाँले पिन नम्बर गलत हाल्नुभयो । धेरैपटक प्रयास गर्नुभयो । त्यत्तिकैमा सिम ब्लक भयो । अब फसाद !
सिम अनब्लक गर्न पोखरा टेलिकम अफिससम्म पुगेर निवेदन दर्ता गर्नुपर्थो । त्यो बेला सिम जहाँ पायो त्यहाँबाट नपाइने भएकाले साह्रै झन्झट भयो । त्यो समयमा बाबा भन्नुहुन्थ्यो, यति लामो पिन नम्बर नलेखी सीधै रिचार्ज गर्न मिल्ने सिस्टम बनाए कति सजिलो हुन्थ्यो होला ।
पिन नम्बरबिनै ब्यालेन्स रिचार्ज गर्न अहिलेका पुस्ताले ई-बैंकिङ, ई सेवा र आई पेजस्ता अनलाइन सेवादेखि एमपीओएस प्रविधिको प्रयोग गरिरहेका छन् । सबैले यस्ता सेवा प्रयोग गर्छन् भन्ने पनि हँदैन । यस्तो समयमा ‘सजिलो रिचार्ज' एप उपयोगी हुन सक्छ । जुन एप्स स्टोर सहजै उपलब्ध छ ।
यस एपमार्फत बिना पिन टाइप गरी रिचार्ज गर्न सकिन्छ । यसका लागि रिचार्ज कार्ड किनेर पिन नम्बर छोपिएको भाग स्क्राच गरी, बिना पिन नम्बर लेखी सीधै ब्यालेन्स रिचार्ज गर्न सकिन्छ ।
यस एपले अप्टिकल क्यारेक्टर रिकोग्निसन (ओसीआर) प्रविधि प्रयोग गरी रिचार्ज कार्डमा लेखिएको पिन नम्बरलाई चिनेर सजिलै ब्यालेन्स रिचार्ज गर्न मद्दत गर्छ । यो एप वृद्धा र ई बैंकिङ सेवा नलिएका तर पिन हानिराख्न झन्झट मान्नेका लागि उपयोगी हुन्छ । ‘सजिलो रिचार्ज' एपको प्रयोग साह्रै सजिलो छ ।
सुरुमा यसका लागि रिचार्ज कार्डमा पिन नम्बर भएको ठाउँ स्क्र्याच भने गर्नुपर्छ । अनि यो एप खोलेर एनसेल, एनटीसी (प्रिपेड, पोस्टपेड) आफ्नो सिमअनुरूप अप्सन छान्नुपर्छ । त्यसपछि कार्डमा पिन नम्बर भएको ठाउँमा क्यामेरालाई पोइन्ट गर्नुहोस् ।
एपले आफैं पिन नम्बरलाई प्रोसेस गरेर ब्यालेन्स रिचार्ज गरिदिन्छ, जुन सरल र प्रभावकारी पनि रहेको छ । एनसेल र नेपाल टेलिकम दुवै कम्पनीका रिचार्ज कार्डमा यो एप प्रयोग गर्न सकिन्छ । हालसम्म ३० हजारभन्दा बढी प्रयोगकर्ता भएका यो एप गुगल प्ले स्टोरमा सित्तैमा उपलब्ध छ ।
सजिलोरिचार्ज एप डाउनलोड गर्नका लागि यहाँ क्लिक गर्नुहोस्