नेपालीलार्ई ईश्वरको एक पत्र

कल्की अवतारका रूपमा म पृथ्वीमा आउने दिन अझै टाढा छ । तर, तिमीहरूले धर्मको बाटो बिर्सिसक्यौ । त्यति लामो समय कुर्न सकिनँ र पत्र लेख्न बाध्य भएँ । धेरै तरिकाले तिमीहरूलार्ई धर्मको बाटो देखाउन प्रयास गरेँ तर सुनेनौ । त्यसैले चेतावनी दिँदै यो पत्र लेख्दैछु ।

मैले पाँच हजार वर्षपहिले गीतामार्फत सत्य र धर्मको बाटोको बारेमा बताएँ । गीतामा उल्लिखित ज्ञानयोग, भक्तियोग, राजयोग र कर्मयोगको अभ्यास गरी मलार्ई प्राप्त गर्न सक्छौ भनी सिकाएँ । अझै पनि सत्य र धर्मको त्यो ज्ञान गीतामा जस्ताको त्यस्तै छ । तिमीहरूले त्यसलार्ई थन्क्याएर राख्यौ । फलस्वरूप धर्मको बाटो बिरायौ ।

आत्माको स्वरूपलार्ई बुझ र मसम्म आऊ भनी मैले सांख्ययोग वा ज्ञानयोगका बारेमा गीतामा बताएँ । मसम्म आउने बाटो देखाएँ । जीवन निर्वाह गर्न सहयोग होस् र मेरो ध्यान गर्न सहज होस् भनी तिमीहरूलार्ई बुद्धि दिएको थिएँ । तिमीहरूले बुद्धिको प्रयोग भौतिक सुखसुविधा बढाउन मात्र गर्‍यौ । विज्ञानलार्ई नै ज्ञान ठान्यौ । गन्तव्य आत्मा थियो तर बाटोलार्ई नै गन्तव्य ठान्यौ र बाटोमै रुमल्लिइरह्यौ । तिम्रो शरीर मन र बुद्धि तिम्रा सहयोगीहरू मात्र हुन् । तिमी तिनीबाट अलग रहेको आत्मा हौ भन्ने सत्यलार्ई मनन गर्न सकेनौ ।

मन, बुद्धि र शरीरलार्ई नियन्त्रण गर्न सक, तिमी भित्रको मेरो स्वरूपलार्ई चिन्न सक भनी मैले राजयोग वा क्रियायोगको बारेमा गीतामा बताएँ । योग प्राणायाम र ध्यान गरेर पनि मेरो स्वरूपलार्ई जान्न सकिन्छ भन्ने सिकाएँ । तिमीहरूले योगलार्ई शारीरिक व्यायाममै सीमित गरायौ । अझै बिग्रेको छैन । मेरो अर्को नाम करुणा हो । धर्मको बाटोमा तिमीले एउटा मात्र पाइला राख्यौ भने पनि म तिम्रा हजार पापको नष्ट गरिदिन्छु । नियमित योग र ध्यानको अभ्यास गर्ने गर र मलाई चिन्ने प्रयास गर । जब मेरो दैविक ऊर्जा तिम्रो शरीरमा बहन थाल्नेछ तब तिमीले अपार आनन्द र शान्ति महसुस गर्नेछौ ।

तिमीहरू जे कुरालाई विकास ठान्छौ, त्यो होइन । वास्तविक विकास आध्यात्मिक विकास हो । भौतिक विकास गरेर मानिस कहिल्यै सुखी हुन सक्दैन । चन्द्रमामा पुग्यौं भनेर मानिसले घमण्ड गर्नु व्यर्थ छ किनकि चन्द्रलोकका प्राणीलाई मानिसका भौतिक आँखाले देख्न सक्दैनन् । रकेट चढेर मानिस त्यहाँ जानुको कुनै अर्थ छैन । त्यहाँका प्राणी र वातावरण तिम्रा इन्द्रियले जान्न नसक्ने अभौतिक आयाममा छन् । तिम्रा पुर्खा धेरैपहिले त्यहाँ पुगिसकेका छन् । शास्त्रहरूको अध्ययन गर । शास्त्रमा लेखिएको विधि प्रयोग गरी अझै पनि तिमीहरू चन्द्रलोक लगायतका मेरा अन्य अभौतिक लोकको यात्रा गर्न सक्छौ । तर, यसका लागि तिम्रो दिमाग र इन्द्रिय प्रयोग गरेर हुँदैन, तेस्रो आँखा प्रयोग गर्नुपर्छ । फेरि भन्छु, योग र ध्यान गर ।

 जसले काम, क्रोध र लोभलाई त्याग्न सक्दैन; त्यो असुर हो । आसुरी मानिस हिंसा गर्न रुचाउँछन्, भ्रष्टाचार गर्छन् र सधैं मदिरा र कामवासनामा लिप्त रहन्छन् ।

स्वभाव अनुसारको कर्म गर भनेर मैले गीतामा कर्मयोगबारे पनि बताएँ । तर तिमीहरूले स्वाभाविक कर्मलाई छोडेर विदेशी संस्कृतिलाई अँगाल्यौ । संस्कृत भाषा त छोड्यौ छोड्यौ अब नेपाली भाषा पनि छोड्ने छाँट ल्यायौ । संस्कृत भाषा म स्वयंले रचना गरेको हुँ, यसका शब्दहरू उच्चारण गर्दा मेरो स्वतः पूजा हुन्छ । संस्कृतका शब्द उच्चारण गर्दा निस्किने हरेक ध्वनिले तिमीभित्र रहेको कुण्डलिनी शक्तिलाई जगाउँछ । नेपाली भाषा राम्रोसँग बोल्यौ भने मात्र पनि तिमीहरूको कल्याण हुन्छ । नेपाली भाषा संस्कृत भाषाकै सन्तती हो । सन्तानको नाममा ईश्वरको नाम राख्ने गर । अज्ञानतामै भए पनि मेरो नाम लिँदा तिमीहरूले पुण्य कमाउनेछौ । मन लगाई आनन्दपूर्वक आफ्नो स्वभाव अनुसारको कर्म गर, त्यसैबाट तिमीलाई मुक्ति मिल्नेछ ।

मसम्म आउन सहज होस् भनी मैले गीतामा भक्तियोगको बारेमा पनि बताएँ । मनको शक्तिलाई प्रयोग गरी मेरो पुकार गर्‍यौ भने पनि तिमीले मलाई पाउनेछौ भनी बताएँ । भजन, कीर्तन, प्रार्थना, पूजा, पाठ आदि क्रियाकलाप गरी मेरो भक्ति गर भनेँ । तर, भावनाको शक्तिलाई तिमीहरूले बुझ्न सकेनौ । तिम्रा भावनाहरूलाई नियन्त्रण गर्न सिकाएँ तर मेरो कुरा नसुन्दा तिम्रा भावनाहरूले नै तिमीलाई नियन्त्रण गरे । फलस्वरूप तिमीहरूले मानसिक सन्तुलन गुमायौ र डिप्रेसनको सिकार भयौ ।

पच्चीस सय वर्षअगाडि म बुद्धको रूपमा फेरि आएँ । तिनै सत्यहरू फेरि बताएँ । मैले सिकाएको सत्य र अहिंसाको मार्ग बुद्ध धर्मको रूपमा पृथ्वीको कुनाकाप्चामा पुग्यो तर तिमीहरूले नै यो मार्गलाई अँगाल्न सकेनौ । बुद्ध नेपालमा जन्मेका हुन् भनेर सधैं फलाक्यौ, सिकाएको ज्ञानलाई आत्मसात् गरेनौ । जिब्रोको स्वादका लागि पशुबलि दिइरह्यौ । सांसारिक कुराहरूमा रुमल्लिरह्यौ । मैले दुःख छ र दुःखको कारण अज्ञानता हो भन्ने सिकाएँ । तिमीहरूले यसतर्फ ध्यान दिएनौ । मेरो जस्ताको त्यस्तै स्वरूप तिमीहरूभित्रै छ, तिमीहरू स्वयं पनि बुद्ध बन्न सक्छौ, त्यसका लागि चाहिने आठ मार्ग पनि सिकाएँ । तर, तिमीहरूले मेरो कुरा सुन्दै सुनेनौ । परमानन्द कसरी प्राप्त गर्ने भनेर पनि सिकाएँ तर तिमीहरू क्षणिक आनन्दका पछि लागिरह्यौ ।

विज्ञानलाई तिमीहरूले यति विश्वास गर्न थाल्यौ कि अब मेरो अस्तित्वको पनि प्रमाण खोज्न थाल्यौ । मेरो स्वरूप अभौतिक छ । मलाई देख्न र बुझ्नका लागि इन्द्रियको प्रयोग गरेर हुँदैन । विज्ञानको प्रयोग गरेर मलाई बुझ्न असम्भव छ । मलाई बुझ्नका लागि योगको मार्ग अपनाउनु पर्छ । म स्वरूप र मेरो शक्तिको रूपमा जहाँतहीँ व्याप्त छु । भौतिक संसार आधारभूत रूपमा मेरै ऊर्जा हो । जसरी एउटै धागोबाट फरकफरक स्वरूपका कपडा बनाउन सकिन्छ त्यसैगरी मैले मेरै ऊर्जा प्रयोग गरी फरकफरक भौतिक स्वरूपहरू बनाउने गर्छु । पाटनको कृष्ण मन्दिरमा पनि म नै छु । पशुपतिमा पनि म नै छु ।

दक्षिणकाली, भद्रकाली र मनकामनामा जहीँतहीँ छु । मेरो सच्चा भक्त बनेर मेरो दर्शन गर्न आऊ, मेरो शक्तिलाई महसुस गर्न सक्नेछौ । अर्जुनले मेरो जुन स्वरूप देखे त्यो स्वरूप देख्ने मेरा भक्तहरू तिम्रा माझमै छन् । प्रत्यक्ष दर्शन गरेका योगीहरू पनि तिम्रै माझमा छन् । उनीहरूको संगत गर, मसम्म आउने मार्ग देखाउनेछन् ।

तिमीहरूले धार्मिक पुराण र ग्रन्थहरूमा सुनेका देवीदेवताहरू पनि तिमीहरूकै माझमा छन् । धर्मको बाटो जसले अँगालेका छन्, हिंसालाई त्यागेका छन्, भौतिक सुख त्यागी आत्मिक सुखको बाटो रोजेका छन्, तिनीहरू नै देवी देवताहरू हुन् । तिनलाई जान र तिनको कुरा सुन । तिमीहरूको कल्याण हुनेछ । असुरहरू पनि तिम्रै माझमा छन् जसले काम, क्रोध र लोभलाई त्याग्न सक्दैन, त्यो असुर हो । आसुरी मानिस हिंसा गर्न रुचाउँछन्, भ्रष्टाचार गर्छन् र सधैं मदिरा र कामवासनामा लिप्त रहन्छन् । आसुरी प्रवृत्ति भएको मानिस निरन्तर पतन भइरहेको हुन्छ । उसले जन्मौंजन्म तल्लोस्तरको आसुरी योनी प्राप्त गर्छ ।

भ्रष्टाचार भनेको भ्रष्ट आचार हुनु हो, पैसाको दुरुपयोगमात्र होइन । सबैभन्दा ठूलो भ्रष्टाचार त आफ्नो धर्म र संस्कृतिको उपेक्षा गर्नु हो जुन तिमीहरू सबैले गरिरहेका छौ । नेताहरूलाई मात्र दोष दिन बन्द गर । आफूभित्र रहेको आसुरी स्वभावलाई बहिष्कार गर । तिमी र तिम्रा सन्ततीको कल्याण हुनेछ । तिमीहरूलाई सत्य बोध होस् भनी मैले तिमीहरूलाई बेलाबेलामा दुःख पनि दिने गर्छु ।

म हावा चलाउँछु किनकि म मेरा रूखबिरुवाहरूका जरा बलिया हुन् भन्ने चाहन्छु । विचलित नभई दुःखलाई सामना गर र सत्यको खोजी गर त्यसैमा कल्याण छ । भौतिकवादीहरूले तिमीहरूलाई गरिब भने पनि ज्ञानका आधारमा तिमीहरू गरिब छैनौ । सम्पत्ति नाशवान् छ, ज्ञान नाश हुँदैन । गरिब भयौँ भनेर बिलौना नगर, त्यो तिमीहरूको अज्ञानतामात्र हो । ठूलो भूकम्प आउँदा पनि तिमीहरूका आँखा अझै खुलेका छैनन् । अझ ठूला र अस्थिर महल ठड्याउँदैछौ ।

तिमीहरूको धर्म र संस्कृति नै तिमीहरूको ठूलो सम्पत्ति हो । यसको प्रचार गर र धार्मिक पर्यटनको प्रवद्र्धन गर । धर्मग्रन्थहरूको अध्ययन गर । सत्य ज्ञानको प्रचार गर । विश्वलाई योग र ध्यान सिकाऊ । यसलाई ज्ञानभूमि बनाऊ । मठमन्दिरको संरक्षण गर । आफ्नो भूमिमा उत्पादित उत्पादनहरू प्रयोग गर । कर्मयोगी बन र कृषिलाई आधुनिकीकरण गर । विश्वलाई सत्य, अहिंसा र शान्तिको मार्ग देखाउन सक । नेपाल देश आफैंमा एउटा विशाल मन्दिर हो । ऋषिमुनिहरूले तपस्या गरेको पवित्र भूमि हो । यहाँका धेरै धार्मिक स्थलमा दैविक ऊर्जा छ । जसले यो भूमिमा पाइला राख्छ उसले तुरुन्तै शान्ति महसुस गर्छ । तिम्रा पितापुर्खाले गरेको धर्मकर्मले तिमीहरूलाई मेरो आशीर्वाद सधैं प्राप्त छ ।

देशका नीतिनियमहरू शास्त्रहरूमा निर्देशित सिद्धान्तका आधारमा बनाऊ । भुटानमा जस्तै आध्यात्मिक विकासको नयाँ सिद्धान्त बनाऊ र लागू गर । विकसित देशले अनुसरण गर्नेछन् । नक्कल नगर । नक्कल पतनको मार्ग हो । भौतिक विकासमा हैन, आध्यात्मिक विकासमा जोड देऊ । जातीयताको राजनीति बन्द गर । गीतामा कर्मको आधारमा जात छुट्याएको हुँ, जन्मका आधारमा हैन । आज ब्राह्मण छौ तर निर्दिष्ट कर्म गर्दैनौ भने भोलि शुद्र हुन सक्छौ । आज शुद्र छौ भने सत्कर्मका आधारमा भोलि तिमी ब्राह्मण हुनेछौ ।

इच्छाअनुसार कर्म गर्न तिमीहरू स्वतन्त्र छौ तर तिमीहरूले गरेका हरेक क्रियाकलापको परिणाम तिमीहरू स्वयंले नै भोग्नुपर्छ । गलत मार्ग अपनाउँछौ भने कानुनले तिमीलाई छोड्ला तर मेरो कर्मसम्बन्धी नियमले छोड्दैन । म स्वयं पनि त्यही नियममा बाँधिएको छु । मैले तिमीले गरेका हरेक कर्मको सूचना सुरक्षित राखेको हुन्छु । यो सूचना तिमीहरूकै मनमस्तिष्कमा सुरक्षित रहेको हुन्छ । तिम्रा शरीरका कोषकोषमा पनि तिमी स्वयंका र तिम्रा पुर्खाहरूका क्रियाकलाप सुरक्षित छन् । तिमीलाई बोध नभएको मात्र हो । जब तिमीहरूले आत्मज्ञान प्राप्त गर्नेछौ, यी कुरालाई जस्ताको तस्तै देख्न र बुझ्न सक्नेछौ ।

मृत्युको समयमा तिम्रो आत्माले शरीरको त्याग गर्नेछ अनि त्यस बेला सबै विवरण एकपटकका लागि देख्न पाउनेछौ । म चाहन्छु, त्यस दिन तिमीलाई कुनै पछुतो र ग्लानि नहोस् । फेरि भन्छु, अरूलाई दोष दिन वा अरूमा भर पर्न बन्द गर । तिमीले संसारलाई दुःख दिन्छौ भने कालान्तरमा तिमीले नै त्यो प्राप्त गर्नेछौ ।

मेरो कुरा सुन्दैनौ र अधर्म गरिरहन्छौ भने तिमीहरूको नाश गर्न म आउने नै छु । कल्की अवतार आउन धेरै समय छ, हामीलाई केही हुँदैन भन्ने ठानेका छौ भने त्यस्तो भ्रममा नपर । अधर्म गर्‍यौ भने तिमीहरूले मर्नेबित्तिकै फेरि मनुष्य वा अन्य प्राणीका रूपमा जन्म लिनैपर्छ । म कल्कीका रूपमा आउने दिनसम्म तिमीहरू यसै पृथ्वीमा हुनेछौ । जब म कल्की बनेर आउनेछु, पापको नाश र धर्मको रक्षा गर्नेछु ।