चेल्सीको महत्ववपूर्ण जित 

लन्डनः डिएगो कोस्टाले लगातार सात खेलको गोलको खडेरी टारेपछि चेल्सीले इङ्लिस प्रिमियर लिग फुटबलको मंगलबार राति भएको खेलमा महत्ववपूर्ण जित हात पारेको छ । कोस्टाकै उत्कृष्ट प्रदर्शनमा चेल्सीले साउथह्याम्पटनलाई ४-२ गोलले पराजित गर्‍यो । जितसँगै चेल्सीले उपाधिको सम्भावना पनि बलियो बनाएको छ । प्रिमियर लिग तालिकामा पाँच चरणको खेल बाँकी रहँदा चेल्सीले दोस्रो स्थानमा आसीन टोट्टनहामसँग सात अंकको अग्रता बनाएको छ । टोट्टनहामले एक खेल कम खेलेको छ ।

हालसम्म ३३ खेल खेलेको चेल्सीले ७८ अंक कमाएको छ भने ३२ खेलबाट टोट्टनहामको ७१ अंक छ । अघिल्लो साता म्यानचेस्टर युनाइटेडसँग पराजित भएपछि उपाधियात्रा केही मुस्किल देखिए पनि साउथह्याम्पटन विरुद्धको जितले चेल्सीलाई फेरि बलियो दाबेदार बनाएको छ । चेल्सीलाई अहिलेसम्म उपाधिका लागि टक्कर दिनसक्ने एकमात्र टोली टोट्टनहाम नै देखिएको छ ।

आफ्नै मैदान स्टामफोर्ड ब्रिजमा कोस्टाले दोस्रो हाफमा दुई गोल गरेपछि चेल्सीले महत्ववपूर्ण जित हात पारेको हो । जितपछि प्रशिक्षक एन्टोनियो कोन्टेले स्ट्राइकर कोस्टाको प्रशंसा गरे । ‘स्ट्राइकरले गोल गर्नपर्छ, किनभने स्ट्राइकरको भविष्य नै गोल गर्नसक्ने क्षमतामा निर्भर हुन्छ', प्रशिक्षक कोन्टेले भने, ‘कोस्टाको प्रदर्शनबाट म निकै खुसी छु ।'

 

कोस्टाले खेलको सुरुबाटै उत्कृष्ट प्रदर्शन गरेका थिए । उनले नै उपलब्ध गराएको पास सदुपयोग गर्दै इडेन हाजार्डले खेलको पाँचौं मिनेटमै चेल्सीलाई १-० ले अघि बढाएका थिए । २४औं मिनेटमा ओरिओल रोमेउको गोलमार्फत साउथह्याम्पटनले खेल १-१ को बराबरीमा फर्काएको थियो । पहिलो हाफको इन्जुरी समयमा गेरी काहिलले चेल्सीलाई पुनः २-१ को अग्रता दिलाएका थिए ।

खेलको दोस्रो हाफमा कोस्टा एक्लैले दुई गोल गरेपछि चेल्सी ४-१ ले अघि बढेको थियो । कोस्टाले ५३औं मिनेटमा सेस फाब्रिगासको क्रसमा हेडिङमार्फत प्रिमियर लिगमा आफ्नो ५०औं गोल गरेका थिए । त्यसपछि ८९औं मिनेटमा हाजार्ड र पेड्रो रोड्रिग्वेजसँग पास खेल्दै कोस्टाले खेलमा व्यक्तिगत दोस्रो गोल गरेका थिए ।

इन्जुरी समयमा रायन बेट्र्रान्डले गोल गरेपछि खेल ४-२ मा सकिएको थियो । उक्त खेलमा चेल्सीले आफ्ना कप्तान जोन टेरीलाई पनि गत नोभेम्बरपछि पहिलोपटक मैदानमा उतारेको थियो । चेल्सीमा २२ वर्ष बिताएका टेरीले यसै सिजनको अन्त्यपछि स्टामफोर्ड ब्रिज छाड्ने घोषणा गरिसकेका छन् ।