काठमाडौ : राष्ट्रपति विद्यादेवी भण्डारीले बहुमतीय आधारमा प्रधानमन्त्री चुन्न आह्वान गर्नुभएको छ । राष्ट्रपतिको आह्वानसँगै बिहिबारदेखि बहुमतीय आधारमा प्रधानमन्त्री छान्ने प्रक्रिया सुरु हुने छ ।
बहुमतीय आधारमा नेपाली काँग्रेसका सभापति शेरबहादुर देउवाको नेतृत्वमा सरकार गठन हुने निश्चितप्रायः छ । राष्ट्रपति कार्यालयका प्रवक्ता माधवप्रसाद वाग्लेद्वारा जारी विज्ञप्तिमा राजनीतिक सहमतिको आधारमा समयसीमाभित्र प्रधानमन्त्री छनोट हुन नसकेको भन्दै संविधानको धारा २९८ उपधारा ३ अनुसार व्यवस्थापिका संसदमा उपलब्ध सांसदको बहुमतको आधारमा सरकार गठनका लागि आह्वान गरिएको हो ।
विद्यादेवी भण्डारीले सभामुख ओनसरी घर्तीलाई बहुमतीय प्रक्रियाबाट प्रधानमन्त्री निर्वाचन गर्न पत्र पठाएसँगै देउवाले आफू नेतृत्वको सरकार गठन गर्न पहल थाल्नु हुनेछ । सहमतीय प्रक्रियाबाट प्रधानमन्त्री निर्वाचित गर्न राष्ट्रपति भण्डारीले दिएको सात दिनको समयसीमा बुधबार रातीबाट सकिएको थियो।
देउवाका लागि प्रधानमन्त्री हुन आवश्यक बहुमत सत्ता गठबन्धनसँग पर्याप्त देखिन्छ । हाल संसदमा कायम रहेको साँसदको संख्या पाँच सय ९३ छ भने बहुमतका लागि दुई सय ९७ मत आवश्यक पर्नेछ । सत्ता गठबन्धनसँग तीन सय ११ मत छ भने राप्रपाले पनि सरकारमा सहभागी हुन काँग्रेस सभापति शेरबहादुर देउवालाई सकारात्मक सन्देश दिएको छ । संसदमा राप्रपाको साँसद संख्या ३७ छ । राप्रपा पनि सरकारमा सहभागी भएको अवस्थामा देउवाको पक्षमा तीन सय ४८ साँसद हुनेछन ।
गत साउनमा काँग्रेस र माओवादी केन्द्रबीच भएको समझदारी अनुसार माओवादी केन्द्रका अध्यक्ष पुष्पकमल दाहाल प्रचण्डले राजीनामा दिएपछि देउवाका लागि प्रधानमन्त्री बन्ने बाटो खुलेको हो । आगामी असार १४ गते भन्दा पहिले देउवाले सानो आकारको मन्त्रिपरिषद गठन गर्ने एक काँग्रेस नेताले बताए । स्रोतका अनुसार मन्त्रिपरिषदमा नपर्ने नेताहरु असन्तुष्ट हुन सक्ने भएकोले देउवाले निर्वाचन भन्दा पहिले सानो आकारको सरकार गठन गर्न खोजेका हुन् ।
संसदमा कायम रहेको संख्या ५९३
बहुमतका लागि २९७
सत्ता गठबन्धनसँग कायम रहेको संख्या ३११
काँग्रेस २०७
माओवादी केन्द्र ८२
नेपाल लोकतान्त्रिक फोरम १७
नेकपा संयुक्त ३
अखण्ड नेपाल १
समाजवादी जनता पार्टी १
जम्मा ३११
प्रतिक्रिया दिनुहोस !
