कुलेखानी तेस्रोको निर्माण कार्य सुस्त

 हेटौंडा :  २०७४ साउनभित्र कुलेखानी तेस्रो विद्युत् आयोजनाको निर्माण सम्पन्न गर्ने सरकारी लक्ष्य पूरा नहुने भएको छ । ठेकेदार पक्षबाट भएको ढिलाईका कारण लक्ष्यअनुसार काम गर्न नसकिएको कुलेखानी तेस्रो आयोजनाका प्रमुख सुभाष मि श्रले बताउनुभयो ।

निर्माण कार्य बिचैमा छाडेर गएको इलेक्ट्रोमेकानिकल चिनियाँ ठेकेदार कम्पनी झेजियाङ जिल्लुनलाई झिकाएर गत माघदेखि काममा लगाए पनि सोचेजस्तो प्रगति नभएको उहाँले बताउनुभयो । ‘आउँदो साउनभित्र सबै निर्माण कार्य सक्ने लक्ष्य पूरा नहुने भएको छ', मि श्रले भन्नुभयो, ‘सबै पक्षबाट सहयोग भए पुससम्म सकिने अनुमान छ ।' निर्माण समय लम्बिने भएपछि आयोजनाको लागत पनि बढ्ने भएको छ ।

इलेक्ट्रोमेकानिकलतर्फ सामान आपूर्ती ८० प्रतिशत र जडान ६० प्रतिशत सकिएको आयोजना प्रमुख मि श्रले बताउनुभयो । झेजियाङले विद्युत् निकाल्न जेनेरेटर आपूर्ती, जडान र प्रशारण लाइनसम्म पहुँच विस्तारको काम जिम्मा लिएको थियो । सिभिलतर्फ ९६ प्रतिशत काम सकिएको उहाँले जानकारी दिनुभयो । सिभिलतर्फका चिनियाँ ठेकेदार कम्पनी सिने हाइड्रोले विद्युत् गृह निर्माण गरिसकेको छ । विद्युत् गृहभित्र टर्बाइन, जेनेरेटर, कन्ट्रोलर उपकरण जडान गर्ने काम भइरहेको छ ।

इलेक्ट्रोमेकानिकल ठेकेदार झेजियाङले २०७३ पुस १६ गते काम सक्नेगरी प्राधिकरणसँग चौथो पटक म्याद थप गरेको थियो । यसअघि सन् २०१४ सेप्टेम्बर, सन् २०१५ जुन र सन् २०१५ अक्टोबरमा म्याद थप गरेको थियो । पहिलो पटक ३० महिना म्याद थपिएकोमा प्राधिकरणले क्रमशः नौ, तीन र ६ महिना म्याद थप गरेको थियो । निर्माण कार्य समयमा नसकिएकाले ठकेदार कम्पनीलाई हर्जना तिराएको आयोजना प्रमुख मि श्रले बताउनुभयो ।

१४ मेगावाट विद्युत् उत्पादन क्षमता रहेको कुलेखानी तेस्रोको लागतमा स्टिमेटभन्दा तीन गुणा बढी खर्च भइसकेको छ । एक अर्ब ४७ करोड रुपैयाँमा निर्माण सक्ने गरी सुरु गरिएको आयोजनामा हालसम्म चार अर्ब ६३ करोड रुपैयाँ खर्च भइसकेको छ । आयोजना सम्पन्न हुँदा पाँच अर्ब बढी रकम खर्च हुने अनुमान गरिएको छ । २०६४ चैतदेखि काम सुरु गरिएको उक्त आयोजना २०६८ सालमा सम्पन्न गर्ने गरी ठकेदार पक्षसँग सम्झौता भएको थियो ।