काठमाडौं : कर्णालीमा एक वर्षभित्रै दू्रत गतिको इन्टरेट सेवा पुर्याउन दुई कम्पनी तयार भएका छन् । नेपाल दूरसञ्चार प्राधिकरणले गत वैशाख ७ गते मागेको सार्वजनिक प्रस्तावमा वल्र्ड लिंक र मर्कन्टाइलले आवेदन दिएका छन् । प्राधिकरणले आइतबारसम्मका लागि दिएको ४५ दिनको समयमा दुईवटा कम्पनीले प्रस्ताव पेस गरेको प्राधिकरणका सहायक प्रवक्ता अच्चुतानन्द मिश्रले जानकारी दिनुभयो ।
उहाँका अनुसार प्राधिकरणले प्रतिप्याकेज ३० करोड रुपैयाँसम्मको प्रस्ताव माग गरेको थियो । यो रकमको सीमाभित्रै रहेको दुई कम्पनीले २४ करोडसम्ममा खर्च गरेर काम गर्ने गरी आवदेन दिएका छन् । प्राधिकरणले प्रदेश नम्बर ६ अन्तर्गतको कर्णालीका हुम्ला, जुम्ला मुगु, र डोल्पाका लागि प्याकेज ‘ए' र कालिकोट, रुकुम, जाजरकोट र रोल्पाको ‘बी' प्याकेज बनाएर आवेदन मागेको थियो । यी दुई प्याकेज अन्र्तगत एकैपटक आठ जिल्लामा ब्रोडब्यान्ड इन्टरनेट सेवा पुर्याउन उपयुक्त कम्पनीको छनोट गर्न प्रस्ताव मागिएको थियो ।
प्रस्तावमा ए प्याकेजका लागि २० करोड रुपैयाँ र बी प्याकेजका लागि २४ करोड रुपैयाँसम्ममा दुई कम्पनीले आवेदन दिएका छन् । प्राधिकरणका अनुसार दुवै प्याकेजमा वल्र्ड लिंकको प्रस्ताव मूल्य मर्कन्टायलभन्दा कम छ । दुवै कम्पनीको प्रस्ताव मूल्यांकन गरेर दुई साताभित्रमा उपयुक्त कम्पनीलाई कर्णालीमा इन्टरनेट विस्तार गर्ने जिम्मा दिने मि श्रले बताउनुभयो ।
सरकारले ग्रामीण दूरसञ्चार विकास कोषको रकमबाट कर्णालीमा दूरसञ्चार सेवाको पहुँच इन्टरनेटमार्फत विस्तार गर्न लागेको हो । यसका लागि प्राधिकरणले दुवै प्याकेजका लागि दिने सरकारी अनुदानको रकमबाट दु्रत गतिको इन्टरनेट सेवा विस्तार गर्नुपर्छ । प्राधिकरणका अनुसार यी दुई प्याकेजमा आगामी एक वर्ष भित्रै ब्रोडब्यान्ड इन्टरनेट पुर्याउनुपर्छ । उपयुक्त कम्पनी छनोट गरेर सम्झौता भएको एक वर्षमा यी जिल्लाको हरेक गाउँपालिका, स्वास्थ्य चौकी तथा सामूदायिक विद्यालयमा इन्टरनेट पुर्याउनुपर्छ ।
सरकारले अन्य जिल्लामा तयार बनाएको प्याकेजको तुलनामा कर्णालीलाई विशेष प्राथमिकतामा राखेको छ । अनुदानमा उपलव्ध हुने यो रकमबाट दुई वर्षसम्म निःशुल्क सेवासमेत दिनुपर्ने सर्त प्राधिकरणले तोकेको छ । मि श्रले दिनुभएको जानकारीअनुसार प्राधिकरणले प्रदेश नम्बर ६ र ७ का लागि मध्यपहाडी लोकमार्ग भएर विस्तार हुने सूचना महामार्गको पूर्वाधार बनाउने कम्पनी छनोट गर्न पनि दुई कम्पनीकै आवेदन मागिसकेको छ । यसमा सुविसु र वल्र्ड लिंकको आवदेन परेको छ । यसको प्राधिकरणले मूल्यांकन गरेर टुंगोमा पुग्ने अन्तिम तयारी छ ।
प्रतिक्रिया दिनुहोस !
