म्याद गुज्रेका सामग्री बजारमा
जुम्ला: कर्णालीको व्यापारिक केन्द्र जुम्लाका अधिकांश खाद्यान्न पसलमा म्याद गुज्रेका खाद्यवस्तु भेटिएका छन् । धेरै समयपछि जिल्ला प्रशासनको नेतृत्वमा भएको बजार अनुगमनका क्रममा ८० प्रतिशत खाद्यान्नका पसलमा म्याद गुज्रेका खाद्यवस्तु भेटिएका हुन् ।
कर्णालीका अधिकांश जिल्लाका उपभोक्ता म्याद गुज्रेका र गुणस्तरहीन खाद्यवस्तु उपभोग गर्न बाध्य छन् । सरकारी तवरबाट अनुगमन नहुनु र उपभोक्ता सचेत नभएकै कारण व्यवसायीले गुणस्तरहीन वस्तु बिक्री गरिरहेको प्रशासनले जनाएको छ । प्रशासनले अनुगमन गरेपछि मंगलबार खलंगा बजारमा सबै खाद्य पसलमा म्याद गुज्रेका खाद्यवस्तु पाइएको सहायक प्रमुख जिल्ला अधिकारी धर्मराज न्यौपानेले बताउनुभयो ।
‘हामीले उपभोक्ताको मागलाई ध्यानमा राखेर पसल अनुगमन गर्यौं', उहाँले भन्नुभयो, ‘तर बजारका अधिकांश पसलमा म्याद गुज्रेका सामग्री पाइँयो । यो निकै डरलाग्दो स्थिति हो ।' बजारका ८७ पसलमा अनुगमन गर्दा करिब २८ हजारभन्दा बढी मूल्यका म्याद गुज्रेका खाद्य सामग्री भेटिएको न्यौपानेले बताउनुभयो । ‘हामीले अनुगमन गरेको क्षेत्र सानो हो तर सोचेभन्दा निकै ठूलो परिमाणमा म्याद गुज्रेका सामग्री भेटियो,' उहाँले थप्नुभयो, ‘यसरी हेर्दा बजारभरिका गोदाम म्याद गुज्रेका खान नमिल्ने खाद्य वस्तुले भरिएको छ । यसका लागि अनुगमनमा कडाइ गरिनेछ ।'
यस्तै, अनुगमनका क्रममा भेटिएका सामग्रीमध्ये धेरैजसो पेय पदार्थ छन् । कोकाकोला, फेन्टा, स्प्राइटलगायत पेय पदार्थ भारी मात्रामा जफत गरिएको छ । यस्तै, पिठो, फुरन्दाना, दालमोट, बिस्कुट, चक्लेट, हर्लिक्सलगायत खाद्य सामग्री पनि भारी मात्रामा जफत गरिएको थियो । जफत गरिएका सामग्री बुधबार जिल्ला प्रशासन कार्यालय परिसरमा जलाएर नष्ट गरिएको थियो । अनुगमन टोलीका संयोजक सहायक प्रमुख जिल्ला अधिकारी धर्मराज न्यौपानले सदरमुकाममा आउने जो कोही उपभोक्ताले खाद्य सामग्री किन्दा उत्पादित कम्पनी र म्याद अनिवार्य हेरेर मात्रै खरिद गर्न सुझाव दिनुभयो ।
सदरमुकाममा बिक्री वितरणका लागि राखिएका अधिकांश पेय पदार्थ खान नमिल्ने अवस्थामा पुगेकाले यसबाट बच्न उपभोक्ता सचेत हुन आवश्यक रहेको न्यौपानेले बताउनुभयो । प्रशासनको नेतृत्वमा करदाता सेवा कार्यालय, प्रहरी, जिल्ला पशु स्वास्थ्य, घरेलु तथा साना उद्योग विकास समिति, सञ्चारकर्मी र उद्योग वाणिज्य संघका प्रतिनिधिको सहभागितामा अनुगमन गरिएको थियो ।
पसलेहरू भागाभाग
बजारमा खाद्यान्न पसल अनुगमनका लागि टोली खटिएपछि मंगलबार जुम्ला बजारका खाद्यान्न पसल गरेर बसेका व्यवसायीको भागाभाग भएको थियो । सदरमुकामको तर्फबाट अनुगमन थालिएपछि अधिकांश खाद्यान्न पसल बन्द गरेर व्यवसायी भागेका थिए । प्रशासनले यसपटक पसल बन्द गरी भागे पनि अर्को पटकको अनुगमनमा कसैलाई पनि उन्मुक्ति नदिने जनाएको छ । उपभोक्ताको स्वास्थ्यलाई बेवास्ता गरी नाफामात्र खोज्ने व्यवसायीलाई कानुनी दायरामा ल्याएरै छाड्ने प्रशासनको दाबी छ ।
यस्तै मंगलबारको अनुगमनका क्रममा म्याद नाघेका खाद्य सामग्री जफत गर्नुका साथै नियमविपरीत सञ्चालनमा आएका पसललाई जरिवानासमेत गरिएको थियो । कानुनी दायराभन्दा बाहिर रहेर सञ्चालन भएका र कर नतिर्ने पसललाई ८५ हजार रुपैयाँ जरिवाना गरिएको करदाता सेवा कार्यालयका कर अधिकृत खडानन्द खत्रीले बताउनुभयो । ‘केही पसल हाम्रो अधिकार क्षेत्रभन्दा बाहिर गएर सञ्चालन गरेको पाइयो', उहाँले भन्नुभयो, ‘त्यस्ता केही पसलबाट जरिवाना गरेका छौं । आगामी दिनमा अनुगमनलाई जिल्लाव्यापी बनाउनेछौं ।'
जुम्लामा पटकपटक सचेत गराउँदा पनि व्यापारीले म्याद नाघेका, सडेगलेका र ढुसी लागेका खाद्य तथा तरकारी बेच्दै आएको पाइएको छ । बजारमा बिक्रीका लागि राखिएका खाद्यवस्तुको म्याद गुज्रिएको, गुणस्तर कमजोर भएको, तौल नपुगेकोलगायत समस्यामा उपभोक्ता ठगिएका छन् । उपभोक्ताले प्रत्येक महिना अनुगमनलाई निरन्तरता दिँदै गुणस्तरीय खाद्यवस्तु बिक्री हुने वातावरण सिर्जना गर्न प्रशासनलाई आग्रह गरेका छन् ।