हङकङ भ्रमण गर्दै सी
बेइजिङ : चिनियाँ राष्ट्रपति सी जिनपिङले यही जुन २९ देखि जुलाई १ तारिखसम्म हङकङ भ्रमण गर्ने भएका छन् । हङकङ सहर बेलायतले चीनलाई हस्तान्तरण गरेको वार्षिकोत्सवका अवसरमा उनी त्यहाँ जान लागेको चिनियाँ सरकारी समाचार समिति सिन्ह्वाले जानकारी दिएको छ । आगामी साता उक्त हस्तान्तरणको २० वर्ष पुग्न लागेको छ ।
यसअघि उनले हङकङको भ्रमण गर्ने वा नगर्ने भन्ने बारेमा चिनियाँ अधिकारीहरूले केही बताएका थिएनन् । यद्यपि त्यस समारोहमा राष्ट्रपति सी उपस्थित हुनसक्ने अड्कल गरिन थालेका थिए । उनी सन् २०१३ मा चीनको राष्ट्रपति भएपछिको यो पहिलो हङकङ भ्रमण हो । चिनियाँ पत्रिका द साउथ चाइना मोर्निङ पोष्टले उनको हङकङ भ्रमण निश्चित भएको आइतबार जनाएको छ ।
हङकङमा केही समयदेखि स्वतन्त्रताको आन्दोलन सुरु भएको छ । त्यो आन्दोलनमा चीनले अंकुश लगाएको भनी व्यापक मात्रामा प्रचार भएको मात्र नभई हङकङका नागरिकमा यसका कारण निराशा छाएको पनि बताउँदै आइएको छ । यस्तो अवस्थामा चिनियाँ राष्ट्रपतिले हङकङ भ्रमण नगर्ने केही सञ्चारमाध्यमको दाबी थियो । आइतबार सरकारी समाचार समिति सिन्ह्वाले नै पुष्टि गरेपछि उक्त अन्योल हराएको छ ।
हङकङ हस्तान्तरण गरिएको समयको अवसर पारेर ठूलो संख्याका नागरिकले प्रदर्शनको तयारी गरेका हङकङबाट विभिन्न अन्तर्राष्ट्रिय सञ्चारमाध्यमले जनाएका छन् । त्यसैले पनि सीको भ्रमणको समयमा ठूलो मात्रामा सुरक्षा दिनुपर्ने अवस्था रहेको पनि विश्लेषकहरू बताउँछन् । त्यसको तयारी भइरहेको हङकङबाट प्राप्त समाचारमा जनाइएको छ । हङकङको पाँचौं प्रशासकीय क्षेत्र उद्घाटनको विशेष अवसरमा पनि सी उपस्थित हुने चिनियाँ समाचार समितिले जानकारी दिएको छ । —रासस/सिन्ह्वा