यसरी गरियो हिटलरसँग ट्रम्पको तुलना
एजेन्सी : उत्तर कोरियाले अमेरिकी राष्ट्रपति डोनाल्ड ट्रम्पलाई जर्मनका तानाशाह एल्डोफ हिटलरसँग तुलना गरेको छ । उत्तर कोरियाको आधिकारिक समाचार एजेन्सी 'कोरियन सेन्ट्रल न्यूज एजेन्सी'को एक सम्पादकीयमा ट्रम्पले सैन्य बलको प्रयोग गरी विश्वभर आफ्नो प्रभुत्व जमाउने नीतिको निरन्तर वकालत गरिरहेको र त्यो हिटलरको नीति भएको उल्लेख गरिएको छ ।
ट्रम्पले अगाडि बढाई रहेको विश्वव्यापी नीति हिटलरको विश्वव्यापी नीति जस्तै भएको भनी आलोचना गरिएको छ । हिटलरले जसरी विश्वभरिका मानिसलाई जर्मनको मित्र र शत्रु भनी विभाजित गरी आफ्ना सेना र जर्मन जनतालाई युद्धमा लाग्न उत्तेजित बनाएका थिए । हाल ट्रम्पले त्यही दमनकारी नीति अवलम्बन गरेको आरोप लगाइएको छ ।
यसै लेखमा दक्षिण कोरियाका नव निर्वाचित राष्ट्रपति 'मुन जे इन' को आसन्न अमेरिका भ्रमणको तीब्र आलोचना गरिएको छ । मुनको भ्रमण अमेरिकाको प्योङयाङमाथिको सैन्य महत्वकांक्षा पुरा गर्नका लागि उठाइएको कदम भनिएको छ । मुनले राष्ट्रपतिमा निर्वाचित हुने वित्तिकै उत्तर कोरियासँग सम्बन्ध सुधार्ने भन्दै आफ्नो पहिलो भ्रमण प्योङयाङको हुने उदघोष गरेका थिए ।