मिर्गौला प्रकरण : ‘चिकित्सकको बदनाम गर्न खोजियो'

काठमाडौं : प्रस्तावित मनमोहन मेडिकल कलेज एवं शिक्षण अस्पतालका चिकित्सकले एक बिरामीको पत्थरी झिक्दा लापरवाहीपूर्ण तरिकाले मिर्गौला झिकेको र बेचविखन गरेको भन्दै प्रचारप्रसार हुन थालेपछि त्यससँग सम्बन्धित चिकित्सकहरूले संयुक्त रूपमा आपत्ति जनाएका छन् । आफैंले पत्थरीको शल्यक्रिया गरेर ‘डिस्चार्ज' गरेका नुवाकोट विदुरका शिवप्रसाद रिमाल उपचारमा चिकित्सकले लापरवाही गरेको भन्दै न्यायका लागि प्रहरी प्रशासन र सञ्चारमाध्यम धाउन थालेपछि युरोलोजिकल शल्यचिकित्सकहरूले संयुक्त रूपमा आपत्ति जनाएका हुन् ।

रिमालले आफ्नो पत्थरीको शल्यक्रिया गर्ने क्रममा चिकित्सकले मिर्गौला नै झिकिदिएको र गुपचुपमै आफ्नो परिवारसँग सम्झौता गरेको भन्दै न्यायका लागि प्रहरीसमक्ष पुगेको दाबी गर्दै आएका छन् । अस्पतालले भने रिमालको ज्यान बचाउन मिर्गौला झिक्नुपरेको र मानवीय दृष्टिले रिमाल र उहाँको परिवारलाई सहयोग गर्ने प्रतिबद्धता जनाएको जिकिर गरेको छ ।

रिमालको शल्यक्रियामा संलग्न प्राडा गुणकुमार श्रेष्ठले कुनै गल्ती नगरे पनि अनावश्यक आरोप खेप्नुपर्दा उहाँ मानसिक रूपमा विछिप्त हुन पुगेको भन्दै नेपाल युरोलोजिकल शल्यचिकित्सक संघले सम्बन्धित पक्षको ध्यानाकर्षण गराएको छ । संघका अध्यक्ष प्राडा विश्वराज जोशीले सामान्यतया यस्ता खालका शल्यक्रियामा हुन सक्ने जटिलता विश्वव्यापी मान्यताभित्रै पर्ने गरेको बताउनुभयो ।

रिमालको ज्यान बचाउन मिर्र्गाैैला झिक्नुपरेको र मानवीय दृष्टिले उहाँको परिवारलाई सहयोग गर्ने प्रतिवद्वता जनाएको अस्पतालको जिकिर । 

यस्ता घटनाको सत्यतथ्य बाहिर ल्याउन उजुरी दिए सरकारी निकायले छानबिन गर्न सक्ने र अदालतमा पनि मुद्दा दर्ता गर्न सक्ने कानुनी बाटो नखोजी बिरामी पक्षले चिकित्सकको बद्नाम गर्नु, संस्थालाई धम्की दिनु व्यक्तिको चरित्रहत्या गर्नु र गैरकानुनी उपाय अवलम्बन गर्न खोज्नुलाई कुनै हालतमा स्वीकार्य नहुने संघको भनाइ छ ।

संघले डा. श्रेष्ठले गल्ती गरेको ठहरिए त्यसको सजाय भोग्नुपर्छ भन्ने मान्यता पनि आफ्नो रहेको बताएको छ । घटनाको अनुसन्धान नै नगरी अनुभवी विशेषज्ञ चिकित्सकको चरित्रहत्या गर्ने, आधारहीन आरोप लगाउने र मानसिक रूपमा तनाव दिने काम भएको भन्दै संघले आपत्ति जनाएको छ । साथै, संघले अस्पतालमा हुने यस्ता घटनापछि कानुनी उपचार नखोजी, अस्पताल र बिरामी पक्षबीच विगतमा गरिएको सम्झौताले यस विषयमा झन् जटिल उत्पन्न गरेको संघले ठहर गरेको छ ।

एक वर्षअघि वैदेशिक रोजगारीबाट फर्केका ३२ वर्षीय रिमाल अत्यधिक कोख दुखेको अवस्थामा जेठ २२ गते उपचारका लागि अस्पतालमा भर्ना हुनुभएको थियो । चिकित्सकका अनुसार स्वास्थ्य जाँचका क्रममा रिमालको दुवै मिर्गौलामा पत्थरी देखिएको थियो । बायाँ मिर्गौला भने मुत्रथैली नजिकै (सामान्य अवस्थाभन्दा फरक स्थानमा ) रहेको पाइएको थियो । त्यस्तो अवस्थामा शल्यक्रिया गर्दा जटिलता आउन सक्नेबारे बिरामी पक्षलाई जानकारी गराएको थियो ।

शल्यक्रियाका क्रममा आन्द्रासँग पनि मिर्गौला टाँसिएको पाइयो र उक्त मिर्गौलाको पत्थरी निकाल्दा रक्तस्राव हुन थालेकाले रिमाललाई बचाउन मिर्गौला नै झिक्नुपरेको अस्पतालको भनाइ छ । उहाँको जेठ २५ गते शल्यक्रिया भएको थियो ।

रिमाल र अस्पतालबीच शल्यक्रिया गर्दा मिर्गौला झिकेकाले नकारात्मक प्रभावबाट बचाउन रिमाललाई निःशुल्क उपचार गर्ने, उहाँलाई रोजगारी दिने, पछि प्रत्यारोपण गर्नुपर्ने अवस्था आए त्यसमा सहयोग गरिदिनेलगायत ६ बुँदे सम्झौता भएपछि रिमाल घर फर्कनुभएको थियो । सम्झौतासँगै सेलाएको घटनालाई अचानक आफूलाई अन्याय भएको भन्दै रिमालले ५० लाख क्षतिपूर्तिको माग गर्दै प्रहरी कार्यालयमा उजुरी दिनुभएको छ ।