काठमाडौं : पोषणका लागि नागरिक समाज सञ्जाल (सिसान) ले सन अभियानमा आबद्ध एसिया क्षेत्रका नागरिक समाजबीच सिकाइ आदानप्रदान कार्यक्रम आयोजना गर्ने भएको छ । कार्यक्रम सोमबारबाट सुरु भई बिहीबारसम्म चल्नेछ ।
पोषण क्षेत्रमा आबद्ध गैरसरकारी संस्थाले नेपालमा देखिएको पोषणसम्बद्ध समस्या नियन्त्रण र न्यूनीकरणका लागि नागरिक समाजको तर्फबाट आवश्यक वकालत गर्दै आएको छ । संस्थाका अनुसार अहिले विश्वले नै कुषोषण नियन्त्रण तथा न्यूनीकरणलाई उच्च प्राथमिकतामा राखेको छ । संयुक्त राष्ट्रसंघले नै सन् २०१६ देखि २०२६ को दश वर्षलाई ‘पोषण दशकको' रूपमा अगाडि सारेको छ ।
त्यसैगरी, पोषणको स्तरोन्नतिका लागि संयुक्त राष्ट्रसंघले एक सय ५९ वटा मुलुकमा ‘स्कलिङ अप न्युट्रिसन (सन)' अभियान सञ्चालन गरिरहेको छ । सन् २००९ बाट सञ्चालित सन अभियान पहिलो चरण समाप्त भई दोस्रो चरणमा प्रवेश गरेको छ । सन अभियानमार्फत पोषण सुधार, गरिबी तथा भोकमरीको अन्त्य, बालमृत्यु दरमा नियन्त्रण, मातृ स्वास्थ्यमा सुधारलगायत कार्यलाई उच्च प्राथमिकतामा राखेर काम गर्दै आएको छ ।
यसरी एसियाली मुलुक कुपोषणसम्बद्ध समस्याबाट निकै प्रताडित भइरहेको सन्दर्भमा सन अभियानमा आबद्ध एसियाका विभिन्न मुलुकबीच पोषणसम्बद्ध सिकाइ आदानप्रदान गर्ने उद्देश्यले यो कार्यक्रम आयोजना गर्न लागिएको संस्थाले जनाएको छ । कार्यक्रममा नेपालसहित बंगलादेश, कम्पोडियो, इन्डोनेसिया, लाओस, फिलिपिन्स, म्यानमार, किर्किस्तान र पाकिस्तान गरी नौ देश सहभागी हुनेछन् ।
प्रतिक्रिया दिनुहोस !
