मादल बनाएर मनग्गे आम्दानी

 तम्घास : समाजमा धेरैको सोच श्रीमान्ले कमाएर श्रीमती पाल्नुपर्छ भन्ने छ । तर बागलुङको गल्कोट निवासी डिलबहादुर नेपाली दम्पतीले मादल बनाएरै लाखौं आम्दानी गरिरहेका छन् । गुल्मीको सदरमुकाम रेसुंगा नगरपालिका-३ मिलनचोकमा नेपाली दम्पतीले मादल बनाउने र बिक्रीवितरणका लागि गल्कोटे मादल पसल खोलेका छन् ।

५५ वर्षीय डिलबहादुरले सानैमा मादल बनाउने सीप सिकेकाले यही पेसा बुढेसकालको सहारा बनेको उल्लेख गरे । ‘मादल बनाउन सानैमा सिकेको हुँ', उनले भने, ‘यसैको आम्दानीले घरपरिवार चलाएर पनि छोरालाई विदेश पठाएको छुँ ।' दुवैजनाले मादल बनाउने भएकाले काम गर्न सहज भएको नेपाली बताउँछन् । ‘मेरो कामलाई श्रीमतीले सघाएकी छिन्', उनले भने, ‘दुवैले काम गरेपछि बचत पनि हुन्छ । बुढेसकालमा बुढाबूढी सँगै छौं, सँगै काम गर्छौं, यसैमा खुसी छौं ।'

एकै उमेरका नेपाली दम्पतीका आठ सन्तान छन् । उनका पाँच छोरा र तीन छोरी छन् । नेपाली दम्पतीले मादल बेचेरै मासिक एक लाख रुपैयाँसम्म कमाउने गरेका छन् । ‘सिजनमा धेरै नै बिक्री हुन्छ, तीज र दसैंमा मासिक डेढ लाख रुपैयाँसम्म पनि पुन्छ', उनले भने । हरिबहादुरकी श्रीमती पवित्राले उनको काममा सघाउन पाउँदा खुसी लागेको बताइन् । ‘बुढेसकालमा सबैले छाडेर जान्छन्', उनले भनिन्, ‘जोडाले नै दुःखसुख हेर्ने हुन् ।'

मादलको आम्दानीबाटै घरखर्च र चाडपर्व हाँसीखुसी मनाउन पाएको उनको भनाइ छ । ‘दुवैजनाले मादल बनाएर बेच्छौं', उनले भनिन्, ‘यसैबाट खुसी मिलेको छ ।'

नेपालीका अनुसार तीजमा मादलको माग पुर्‍याउनै नसकिने हुन्छ । माग धेरै भएपछि केही दिन पर्खिएर ग्राहकले मादल लैजाने गरेको उनले बताए । ‘तीजमा भ्याइनभ्याइ हुन्छ', उनले भने, ‘असारसाउनको ओसले मादल छिटो सुक्दैन ।' मादल बनाउन काठ, बाख्राको छाला, खरी, किट प्रयोग गरिने नेपालीले बताए ।