व्यापारी भेडाच्यांग्रा किन्न केरुङ गएनन्
विदुर : दसैं आउन मात्र तीन साता बाँकी रहँदा यस वर्ष चीनको केरुङबाट भेडाच्यांग्रा ल्याउन व्यापारीले चासो दिएका छैनन् । गत वर्ष एक महिनाअघि नै भेडाच्यांग्रा खरिदका लागि रसुवागढी नाका हुँदै केरुङ पुग्ने गरेकोमा बिहीबारसम्म कोही पनि व्यापारी केरुङ गएका छैनन् ।
यस वर्ष बडादसैंका लागि चीनको केरुङबाट रसुवागढी हुँदै नेपालतर्फ भेडाच्यांग्रा नआउने टिमुरेका व्यापारी बुनिमा तामाङले बताए । पहिले एक महिना अगाडि नै भेडाच्यांग्रा खरिदका लागि व्यापारी चीन जाने गरेकोमा कोही नगएको र यस वर्ष रसुवागढीबाट भेडाच्यांग्रा नआउने तामाङको भनाइ छ । गत वर्ष रसुवागढी नाकाबाट चार सय थान भेडाच्यांग्रा नेपाल भित्रिएका थिए ।
गत वर्ष एउटा भेडाच्यांग्राको १८ देखि २२ हजार रुपैयाँ परेको थियो । भेडाच्यांग्रा खसीबोकाको तुलनामा निकै महँगो पर्न थालेका कारण यसका पारखी घटिरहेको व्यापारीहरूको भनाइ छ ।
गत वर्षभन्दा यस वर्ष चिनियाँ रुपैयाँ घोर्मुको दर घटेका कारण केही सस्तो पर्न जाने व्यापारी बुनिमा तामाङको भनाइ छ । पोहोर एक हजार घोर्मु बराबर नेपाली १८ हजार रुपैयाँ परेकोमा यस वर्ष घटेका कारण एक हजार घोर्मु बराबर नेपाली १५ हजार पाँच सय रुपैयाँ पर्ने तामाङले बताए ।
केरुङमा पहिले नै रकम बुझाउनु पर्ने र राम्रा खालका भेडाच्यांग्रा नपाउने भएका कारण यस वर्ष मुस्ताङ पुगेर भेडाच्यांग्रा ल्याउने तयारी गरिएको धुन्चेका व्यापारी रामेश्वर खड्काले बताए । सदियौंदेखि चीनको केरुङबाट रसुवागढी नाका हुँदै नेपालतर्फ बडादसैंका लागि भेडाच्यांग्रा भित्रिने गरेकोमा बाटोघाटो र विविध कारणले गर्दा यस वर्ष नआउने भएको उनको भनाइ छ ।
एक महिनाअघि नै भेडाच्यांग्रा किन्न रसुवागढी नाका हुँदै केरुङ पुग्ने व्यवसायीले यस वर्ष भने चासो देखाएका छैनन् ।
खसीको तुलनामा चीनका भेडाच्यांग्राको मासु स्वास्थ्यका लागि हितकर र स्वादिलो हुने गरेको छ । यसकारण केही महँगो परे पनि यसका पारखी भेडाच्यांग्रा खरिद गरेर खाने गरेका छन् । रसुवागढी नाकाबाट सबैभन्दा बढी भेडाच्यांग्रा २०६० सालमा चार हजार गोटा नेपाल भित्रिएका व्यापारीहरूको अनुभव छ । चिनियाँ मूल्यमा बढोत्तरी आएका कारण भेडाच्यांग्राका सौखिन उपभोक्तालाई महँगो पर्न गएको व्यापारी सरोज न्यौपानेको भनाइ छ ।