चिनियाँ प्रधानमन्त्री, स्टेट काउन्सिलर र विदेशमन्त्रीले महरासँग के भने ?

काठमाडौ : उपप्रधान तथा परराष्टमन्त्री कृष्णबहादुर महराले चिनिया प्रधानमन्त्री लि खछयाङ, चिनियाँ स्टेट काउन्सिलर याङ् जेइची र चिनियाँ बिदेशमन्त्री वाङ् यीसँग गरेको भेटवार्ता नेपाल र चीन वीचमा दुरगामी महत्व राख्ने खालका छन् । दुई पक्षीय वार्तामा उठेका बिषयलाई वार्तामा सहभागी नेपाली प्रतिनिधिमण्डलका सदस्यहरुसँग बरिष्ठ सम्वाददाता सन्तोष घिमिरेले गरेको कुराकानीका अंश यहाँ प्रस्तुत गरिएको छ ।

 

चिनियाँ प्रधानमन्त्री लि खछ्याङ् : राजनीतिक स्थिरताको बाटोमा नेपाल अघि बढेकोमा हामी खुशी छौं । दुई चरणको स्थानीय तह निर्वाचन सम्पन्न भएकोमा हामी बधाई दिन चाहन्छौँ । तेश्रो चरणको चुनाव सफलताको कामना छ ।

दुई मुलुकबीच उच्चस्तरीय राजनीतिक भ्रमणलाई निरन्तरता दिनुपर्छ । त्यसका लागि हामी तयार छौँ । उपयुक्त समयमा चीनबाट नेपालमा उच्चस्तरीय भ्रमण हुनेछ । भ्रमण कुन समयमा गर्ने भन्ने कुरा हाम्रा मुलुकका आन्तरिक राजनीतिक परिस्थितिले निर्णय गर्ने कुरा हो । नेपाल हाम्रो प्राचीन र निकट छिमेकी मुलुक हो ।

चिनियाँ रेल नेपालसम्म विस्तार भएको हेर्न नेपाली जनता आतुर छन् भन्ने हामीलाई थाहा छ । नेपालसम्म रेल विस्तारका लागि भौगोलिक जटिलता पनि छन् । यसैपनि उच्च हिमाली क्षेत्रबाट तल्लो क्षेत्रमा रेल लैजाने कुरा विश्वभरी नै चुनौतिपूर्ण काम मानिन्छ । तर हामीले यो बिषयलाई प्राथमिकतामा राखेका छौँ । जस्तोसुकै चुनौति आएपनि हामी यो परियोजना अघि बढाउनेछौँ । यसका लागि हाम्रा संबन्धित सरकारी निकायलाई आवश्यक अध्ययन गर्न ब्यक्तिगत रुपमा मैले निर्देशन दिइसकेको छु । अध्ययनको प्रतिफल सकारात्मक आउने मेरो विश्वास छ ।

 चिनियाँ स्टेट काउन्सिलर याङ् जेइची :  नेपाल हाम्रो पुरानो र असल मित्र हो । नेपालका राजनीतिक दलहरुले निरन्तर रुपमा चिनियाँ राष्ट्रपति सि जिनपिङ्को भ्रमणका लागि अनुरोध गरिरहनुभएको छ । हामीले पनि राष्ट्रपतिको नेपाल भ्रमण हुनुपर्छ भन्नेमा जोड दिइरहेका छौँ । उपयुक्त समयमा राष्ट्रपति सिको नेपाल भ्रमण हुनेछ । तर राष्ट्रपति तहको भ्रमणका बेला दुई देशबीचको सम्ंबन्धलाई नयाँ उचाईमा पु¥याउने खालका दिर्घकालीन महत्वका बिषय समेटिएको हुनुपर्छ। भ्रमण भ्रमणका लागि मात्र सीमित हुनुहुंदैन । भ्रमणको प्रतिफलमा हामीले ध्यान दिनुपर्छ । हामीले यस्ता भ्रमणहरु गर्दा दुरदृष्टि राख्नुपर्छ । ताकि यस खालका भ्रमणले दुवै मुलुकबीचको संबन्धलाई नयाँ गति प्रदान गरुन् । चीनले नेपालको प्रगति, स्थिरता र शान्तिका लागि सदैव हरतरहले सहयोग गर्नेछ ।

चिनियाँ बिदेशमन्त्री वाङ् यी : परराष्ट्रमन्त्री महरासँग मेरो बृहत् र फलदायी भेटवार्ता भयो । बेल्ट एन्ड रोड अवधारणालाई व्यावहारिक कार्यान्वयनमा लैजान मिलेर काम गर्न हामी सहमत भयौँ । हामी नेपाललाई अटुट रुपमा सहयोग जारी राख्नेछौँ । नेपालको सार्वभौमिकता, अखण्डता र स्वतन्त्रताको हामी उच्च सम्मान गर्छौँ । बेल्ट एन्ड रोड अवधारणामा नेपाल साझेदार बनेकोमा हामी नेपाललाई आभार ब्यक्त गर्न चाहन्छौँ । आशा छ, नेपालले आफ्नो आर्थिक विकासमा यो अवधारणाबाट लाभ लिनेछ ।
अरनिको राजमार्गलाई पुनः संचालनमा ल्याउन चीन सकारात्मक छ । विगतमा नेपाल र चीनबीच भएका पारवहन यातायात सम्झौता र बेल्ट एन्ड रोड अवधारणामा नेपालको सहभागिताबाट सम्बन्धलाई अघि बढाउन ठूलो सहयोग मिलेको छ । हामीले यी सम्झौताको व्यावहारिक कार्यान्वयनमा ध्यान केन्द्रित गर्नुपर्छ । पारवहन सम्झौताको प्रोटोकलाई हामीले अध्ययन गरिरहेका छौँ ।