पोखरामा बंगुर पार्क
पोखरा : बंगुरपालन व्यवसायलाई व्यवस्थित गर्न पोखरामा बंगुर व्यवसाय औधोगिक पार्क निमार्ण कार्य सुरु भएको छ । पोखरा लेखनाथ महानगरपालिका ३१ बाघमारा स्थित सेती नदिको किनारको १ सय ४० रोपनी क्षेत्रफलमा बंगुर व्यवसाय औधोगिक पार्क निमार्ण कार्य सुरु भएको हो ।
महानगरमा एकीकृत रुपमा बैज्ञानीक ढंगले बंगुरपालन व्यवसाय संचालन गर्ने उद्देश्यले बंगुर ब्रिडर कृषक सहकारी संस्थाको पहलमा बंगुर व्यवसाय औधोगिक पार्क (पिग पार्क) निमार्ण कार्य भइरहको छ ।
पहिलो चरणमा ४ करोड ६८ लाखको लगानीमा पिगपार्क निमार्ण कार्य भइरहेको जिल्ला पशु सेवा कार्यालय कास्कीका प्रमुख डा पुरुषोतम त्रिपाठीले जानकारी दिए । पिगपार्क स्थापनाकालागि नेपाल सरकारको ७० प्रतिशत र व्यवसायीको ३० प्रतिशत लागनी रहने छ । दोस्रो चरणमा ५ करोड नेपाल सरकारको लगानी र त्यसको ३० प्रतिशत व्यवसायीको रहने कार्यालय प्रमुख त्रिपाठीले जानकारी दिए । पिग पार्कका कम्प्लीट प्याकेज तयार हुन २० देखि २५ करोड लाग्ने बताइएको छ ।
निजी जग्गा २५ बर्षकालागि भाडामा लिएर पिग पार्क निमार्ण कार्य भएको हो । सरकारले आवश्यक दोस्रो किस्ताको रकम बेलैमा उपलब्ध गराए आउदो आर्थिक बर्ष देखि पिग पार्क पूर्ण रुपमा संचालनमा आउने बंगुर व्यवसाय औधोगिक पार्क निमार्ण समितिका अध्यक्ष कृष्णबहादुर गुरुङले बताए । पिग पार्ककालागि बैज्ञानिक र प्राविधिकरुपमा पूर्णता दिने काम भने संचालन पछि पनि निरन्तर रुपमा अघि बढ्ने उनले सुनाए ।
महानगरमा जनघनत्व बृद्धि संगै छरिएर बंगुरपालन गरिदा वातावरणीय र मानवीय स्वास्थ्यका दृष्टिले पनि हितकर नहुने भएकोले पशुपंक्षी मन्त्रालयले पोखरेली व्यवसायीको माग अनुसार पोखरामा पिग पार्क निमार्ण कार्य अघि बढेको जिल्ला पशु सेवा कार्यालय कास्कीका प्रमुख त्रिपाठीले बताए । पर्यटकीय शहर पोखरामा बंगुर पालन गर्ने व्यवसायी बढ्दो रहेकोले पिग पार्क स्थापनाले वातावरण मैत्री, हाइजेनिक मासु उत्पादन गर्ने उद्देश्यले योजना अघि बढेको उनले सुनाए । यसवाट मासु उत्पादनमा पोखरावाट देशलाई नै थप योगदान पुग्ने उनले विश्वास गरे ।
२०७३ जेठ २ गतेवाट सुरु भएको पिग पार्क निमार्ण कार्य अन्तर्गत मासुकालागि पालिने बंगुरको खोर बनी सकेको छ । यसै गरि बोरिङ गरि पानी, बिजुली, बाटो र कम्पाउण्डा वाल लगाई सकीएको निमार्ण समितिका अध्यक्ष कृष्णबहादुर गुरुङले जानकारी दिए । प्रजनन केन्द्र, बधशाला, खोर व्यवस्थापन, नाली, दाना स्टोर, क्लिनिक आउस लगाएतका काम हुन बाँकी रहेको उनले सुनाए ।
पिग पार्क दश हजार बंगुर पाल्न सकीने क्षमताको हुने छ । बंगुरलाई फोहोर चिज खुवाउने मान्यता भए पनि यहाँ पालिएका पिग पार्कमा बंगुरलाई फोहोर चिज खुवाइने छैन् । दाना खुवाएर बंगुर पालिने बंगुर व्यवसाय औधोगिक पार्क निमार्ण समितिका सचिव यज्ञ पौडेलले बताए । पिग पार्कमा अन्तर्राष्ट्रि बजारमा प्रतिस्पर्धा गर्न सक्ने हाइजेनिक बंगुरको मासु उत्पादन गरिने योजना अनुसार काम भइरहेको उनले बताए ।
पार्क भित्रै स्थापना हुने बधशालामा मासु काटीने छ । सुरक्षित रुपमा मासु राख्ने चिस्यान केन्द्र पनि पिग पार्क भित्रै हुने छ । पिग पार्कमा ब्रिडिङ गरि पार्कमा चाहिने बंगुरका पाठापाठी उत्पादन गरिने छ । यहाँ १ सय १३ वटा पिग फर्म संचालनमा छन् । कास्कीमा बंगुर र सुंगुरको उत्पादन बर्षेनी बढ्दो छ । मासुको राष्ट्रिय उपलब्धता प्रति ब्यक्ति प्रति बर्ष भन्दा कास्कीमा उपलब्धता प्रति व्यक्ति प्रतिशत धेरै छ । राष्ट्रिय उपलब्धता प्रति व्यक्ति प्रति बर्ष १२ केजी रहेकोमा कास्कीमा १६।४१ केजि रहेको जिल्ला पशु सेवा कार्यालय कास्कीको तथ्याङ्क छ ।
प्रतिक्रिया दिनुहोस !
