होटल बुकिङ ५० प्रतिशत

काठमाडौं : पर्यटकीय सिर्जन सुरुसँगै देशभरका होटेलमा ५० प्रतिशतभन्दा बढी कोठा बुकिङ भइसकेको होटल व्यवसायीले बताएका छन् । विदेशी पर्यटकको आगमन पनि बढ्दो छ । पर्यटकीय आगमनले होटल व्यवसायमा चलपल सुरु भइसकेको छ । पर्यटक आगमनलाई हेर्दा भूकम्प र भारतीय नाकाबन्दीले थला परेको पर्यटन क्षेत्र यो सिर्जनसँग उकालो लाग्नेमा पर्यटन व्यवसायी आशावादी छन् ।

तर, पर्यटकीय गन्तव्यसम्म जोडिएका सडक सञ्जालमा देखिएको समस्या समाधानमा सरकारले चासो नदेखाउँदा पर्यटन क्षेत्रमा नकारात्मकम असरपर्ने व्यवसायी बताउँछन् । हवाई सञ्जालमा रहेको महँगो फेयरले काठमाडौंभन्दा बाहिरका पर्यटकी गन्तव्यमा पर्यटक आगमन कमी हुने गरेको व्यवसायी बताउँछन् । सन् २०१७ को ६ महिनामै साढे चार लाखभन्दा बढी विदेशी पर्यटकले नेपाल भ्रमण गरिसेका छन् । यो संख्या पर्यटकीय सिर्जन सुरुभएसँगै बढेर सन् २०१७ मा १० लाख पुग्ने नेपाल पर्यटन बोर्डको अनुमान छ ।

नेपाल होटल एसोसिएसन अर्फ (हान) का अनुसार विगतका वर्षभन्दा यो वर्ष सिर्जन सुरुसँगै पर्यटक आगमन बढेको छ । एसोसिएसनका महासचिव विनायक शाहाले सिजन सुरुसँगै उपत्यकालगायत धुलिखेल, नगरकोट क्षेत्रमा सञ्चालित होटलका कोठा ६० प्रतिशत बुकिङ भइसकेको जानकारी दिए । होटल बुकिङलाई हेर्दा इतिहासमै यो वर्ष बढी पर्यटक आगमन हुने संकेत देखाएको उनको भनाइ छ । विगतका वर्षमा यतिखेर ४० प्रतिशत मात्रै होटलका कोठा बुकिङ हुन्थ्यो । सिर्जन सुरुभएसँगै पहिलो चरणमा भएको बुकिङलाई हेर्दा सन् २०१७मा १० लाख भन्दा बढी विदेशी पर्यटक नेपाल भ्रमणका लागि आउने शाहाको अनुमान छ ।

यो सिजनमा होटलको अकुपेन्सी ९० प्रतिशत पुग्ने उनको भनाइ छ । तर, उपत्यका पछिको दोस्रो पर्यटकीय गन्तव्य पोखराको होटल बुकिङ भने सन्तोष जनक छैन । पश्चिमाअञ्चल होटल एसोसिएसनमा पूर्वअध्यक्ष हरीप्रसाद शर्माका अनुसार पोखरामा सञ्चालित होटलका ३० प्रतिशतभन्दा बढी कोठा बुकिङ भइसकेको छ । विगत वर्षमा यतिखेर ४० प्रतिशतभन्दा बढी बुकिङ हुन्थ्यो । बुकिङ पहिलो चरणका कमी देखिए पनि बढ्दो रहेकाले ८० प्रतिशतसम्म होटलको अकुपेन्सी पुग्ने शर्माको अनुमान छ । पोखरालगायत चार नम्बर प्रदेशमा पाँच सयका हाराहारीका होटल छन् ।

भारत र चीनबाट आफ्नै सावरी लिएर नेपाल भ्रमणका आउने पर्यटकको संख्याका भने केही कमी रहेको शर्माले बताए । दुई नम्बर प्रदेशमा हुन लागेको स्थानीय तहको निर्वाचन र सडक सञ्जालमा देखिएको समस्याका कारण बुकिङमा कमी आएको उनको भनाइ छ । चितवन तथा सौराह क्षेत्रका होटल व्यवसायी बाढीले क्षति गरेको होटलको संरचना मर्मत तथा रङरोकनमा व्यस्त छन् ।

चिनियाँ पर्यटकको आगमनमा केही कमी देखिए पनि पर्यटक आगमन बढ्दो रहेको ग्रिन पार्क होटलका अध्यक्ष केशव पान्डेले बताए । सौराह आसपासमा रहेका सयभन्दा बढी होटलका ५० प्रतिशतभन्दा बढी कोठा बुकिङ भइसकेको उनले बताए । यो संख्या बढेर ९० प्रतिशतसम्म पुग्ने उनको भनाइ छ । पर्यटकी सौराह काठमाडौ र पोखरापछिको पर्यटक आगमन बढी हुने गन्तव्य हो । बुद्ध धर्मावलम्बीको आर्कषणमा रहेको लुम्बिनी क्षेत्रमा आउने पर्यटकको संख्या भने गत वर्षभन्दा बढी रहेको भरैहवा नान्स होटलका सञ्चालक सीपी श्रेष्ठले जानकारी दिए ।