प्रमुख तीन दलसँग भिड्दै राजपा

काठमाडौं : संविधान निर्माण प्रक्रियादेखि १३ महिने मधेस आन्दोलनबीच सात महिना नाकाबन्दी, संविधान संशोधन हुँदै ब्यालेटसम्म आएको राजपा नेपालको चुनावी मुद्दा ‘मधेस र मधेसीको पहुँंच राज्यसत्ता' रहेको छ । निर्वाचनमा आन्दोलन पक्षधरको मत पाउनेमा राजपा ढुक्क देखिएको छ । एक महानगरपालिका (वीरगन्ज महानगरपालिका), तीन उपमहानगरपालिका (कलैया, जितपुर-सिमरा र जनकपुर), ६९ नगरपालिका र ६३ गाउँपालिकामा असोज २ गते स्थानीय तह निर्वाचन हुँदै छ । कांग्रेसले आफ्नो आधार र राजनीतिको उद्गमथलोका रूपमा प्रदेश नम्बर २ लाई लिइरहेको छ । एमालेले पहिलो र दोस्रो चरणको निर्वाचन परिणामले निरन्तता पाउनेमा विश्वस्त हुँदै शुक्रबार निजगढमा हुने अन्तिम चुनावी सभामा पार्टी अध्यक्ष केपी शर्मा ओलीलाई उतार्दै छ । अन्नपूर्णसँग बिहीबार भएको कुराकानीमा कांग्रेस र एमाले पहिलो शक्ति र राजपाले सकारात्मक परिणाम आउने दाबी सम्बद्ध दलका नेताले गरेका छन् ।

 

राजपा अध्यक्षमण्डलका नेता अनिलकुमार झाले प्रदेश नम्बर २ मधेस आन्दोलनको उर्वरभूमि रहेकाले आन्दोलनमा भाग लिएका जनताले राजपालाई मतदान गर्ने विश्वास व्यक्त गरे । उनले भने, ‘एक सय ३६ स्थानीय तहमध्ये अधिकांशमा प्रमुख तीन दलमध्ये कुनै एकसँग, केही स्थानमा संघीय समाजवादी र केहीमा लोकतान्त्रिक फोरमसँग प्रतिस्पर्धा हुनेछ । पहाडीको बाक्लो बस्ती रहेको राजमार्ग क्षेत्रमा राजपालाई केही कठिन छ ।'

प्रमुख तीन दलसँगको चुनावी होडबाजीमा पैसा, गुन्डा र राज्यको शक्तिसँग गर्नुपर्ने प्रतिस्पर्धा राजपाको मुख्य चुनौती भएको झाले बताए । मधेस आन्दोलन र नाकाबन्दीमा राजपाको नेतृत्व स्वीकार गर्ने सबै मधेसी मतदाताले राजपालाई नै मतदान गर्ने बलियो पक्ष रहेको दाबी उनले गरे । आममधेसीले संविधान संशोधन मधेसका पक्षमा गर्नुपर्ने माग पार्टीका उम्मेदवारसँग गरेको उनले बताए ।

अध्यक्षमण्डलका अर्का नेता राजकिशोर यादवले आत्मनिर्णयको अधिकारसहित मधेस स्वायत्त प्रदेशको मागसहित घरदैलो गएका उम्मेदवारका पक्षमा आममतदाता रहेको दाबी गरे । सिंहदरबारमा रहेको अधिकार मधेसमा लग्न संविधानका ३६ ठाउँमा संशोधनको आवश्यकता रहेको उनले बताए । राजपाका सहअध्यक्ष वृषेशचन्द्र लालले मधेस आन्दोलनको नेतृत्व लिएको पार्टीलाई मधेसीबाट अलग्याउन सरकार र निर्वाचन आयोगले आचारसंहिताका नाममा कडाइ गरेको आरोप लगाए । मधेसका आठै जिल्लाका १ सय ३६ स्थानीय तहमा राजपा अघि भएको दाबी उनले गरे । राजपाका महामन्त्री मनीषकुमार सुमनले संविधान संशोधनमार्फत मधेसको अधिकार मधेसीलाई दिँदै संविधान सबैका लागि भएको सन्देश दिन मतदाताले आग्रह गरेको सुनाए । आन्दोलनको एउटा प्रक्रियाका रुपमा लिएको निर्वाचनमा आफ्नो पार्टी पहिलो हुने दाबी पनि उनले गरे ।

प्रधानमन्त्री तथा कांग्रेस सभापति शेरबहादुर देउवाले वीरगन्जमा विशेष सम्बोधन गर्ने भएका छन् । कांग्रेस केन्द्रीय सदस्य तथा केन्द्रीय प्रचारप्रसार समन्वय समितिका संयोजक रमेश लेखकले बिहीबार केन्द्रीय कार्यालय सानेपामा आयोजित पत्रकार सम्मेलनमा आफ्नो पार्टीले १ सय ३६ मध्ये १ सय तहमा जित्ने बताए । कांग्रेसले तीन स्थानीय तह (गौर, मिथिला र निजगढ नगरपालिका)को प्रमुख र उपप्रमुखमा अन्य राजनीतिक दलसँग तालमेल गरेको छ । लेखकले भने, ‘कांग्रेस स्थापनाकालदेखि हालसम्म मधेस र मधेसीको हितमा समर्पित भएकाले आगामी दिनमा पनि मधेसीलगायत सम्पूर्ण भाषाभाषी, जनजाति, वर्ग समुदायका नागरिकको भावना समेटेर संविधान सर्वस्वीकार्य बनाउन दृढतापूर्वक अघि बढ्नेछ ।'

एमालेले प्रदेश नम्बर २ को चुनावमा पहिलोपटक पार्टी अध्यक्ष ओलीलाई उतार्दै शुक्रबार जितपुर-सिमरा उपमहानगरपालिका र बर्दिबास नगरपालिकाको चुनावी सभा सम्बोधन गर्ने भएको छ । ओलीले मधेसी मतदाताबीच राज्यशक्तिमा पहुँचका लागि विशेष अधिकारसहित प्याकेजको खुलासा गर्ने एमाले स्रोतले बताएको छ । पहिलो र दोस्रो चरणजस्तै तेस्रो चरणमा पनि एमालेलाई पहिलो पार्टी बनाउने प्रतिबद्धतासहित ओलीले गर्ने सम्बोधन पार्टीका लागि प्रतिनिधिसभा र प्रदेशसभा निर्वाचनका लागि ऊर्जा बन्ने विश्वासमा एमाले नेतृत्व छ ।

माओवादी केन्द्रका प्रवक्ता पम्फा भुसालले प्रदेश नम्बर २ को पार्टीपंक्ति र विशेष भूमिका निभाएका पार्टी अध्यक्ष पुष्पकमल दाहालको सफल नेतृत्वले आफ्नो पक्षमा सकारात्मक परिणाम आउने दाबी गरिन् । पार्टी विभाजनका क्रममा अन्यत्र गएका नेतासमेत पार्टीमै फर्कनु र राजपाका स्थानीय नेतृत्व माओवादीमा प्रवेश गर्नुले पनि चुनावी परिणाम सकारात्मक हुने विश्वास उनले व्यक्त गरिन् । दाहालले मधेसका आठ जिल्ला भ्रमणका सन्दर्भमा रिक्सावाला, चियापसलेदेखि सामान्य मजदुरसम्म खुला बजारमै सेल्फी खिच्दै चुनाव प्रचारमा देखाएको सक्रियताले मतदातामाझ गतिलो सन्देश दिएको उनले बताइन् ।