उपमहानगरलाई समृद्ध बनाउने छु : डा. कृष्ण पौडेल

प्रदेश नम्बर दुईको तीन उपमहानगरमध्ये बढी सम्भावना बोकेको उपमहानगरको रुपमा हेरिएको जीतपुरसिमरा उपमहानगरपालिकामा चुनावी रस्साकस्सी निकै बढेको छ । दलहरु आफ्ना उम्मेदवारलाई जिताउन निकै कस्सिएर लागेका छन् । जीतपुरसिमरा उपमहानगरको नेतृत्व गर्न १६ जनाले मेयर पदमा उम्मेदवारी दिएका छन् । उम्मेदवारी दिएका मध्ये केही उम्मेदवारबाहेक अन्यको चर्चा खासै छैन् ।

चर्चा पाएका मध्ये एक हुन् नेकपा एमालेका उम्मेदवार डा. कृष्ण पौडेल । सामाजिक र सहकारी अभियन्ता डा. पौडेलको चर्चा नगरभित्र निकै चुलिएको छ । बौद्धिक व्यक्तित्वका रुपमा नगरभित्र राम्रो परिचय बनाएका कारण पनि पौडेलको विजयी हुने सम्भावना धेरै रहेको नगरबासी बताउछन् । डा. पौडेल उपमहानगर हाक्न उत्साहित देखिन्छन् । अन्नपूर्ण पोष्टको राउण्ड टेबलमा सहभागी हुन आएका डा. पौडेलसंग कुराकानी गर्ने क्रममा उनले उपमहानगरलाई समृद्ध बनाउने आफ्नो अभियानलाई जनताले मन पराएको र साथ दिनेमा आफू ढुक्क रहेको बताए ।

तपाईको छोटो परिचय ?
मेरो जन्म २०२९ सालमा भएको हो । जीतपुरसिमरा उपमहानगर- १५ मा स्थायी बसोबास छ । तीन दशक देखि राजनिति र सामाजिक गतिविधिमा सक्रिय छु । प्ररायुसंघ, अनेस्ववियु हुँदै एमालेको राजनितिमा प्रवेश गरेँ । १५ वर्ष प्रचार बिभागको जिम्मेवारी सम्हाले । सहकारीमा विद्यावारिधी (पिएचडी), व्यवस्थापनमा स्नातकोत्तर र कानूनमा स्नातक गरेको छु । अडिटर्स एशोसिएसनको प्रथम केन्द्रीय उपाध्यक्ष, नेपाल बचत तथा ऋण केन्द्रीय सहकारी संघको केन्द्रीय सञ्चालक, डुमरवाना बहुमुखी क्याम्पसको अध्यक्ष, हातेमालो सहकारीको अध्यक्ष छु । एउटा सामाजिक र सहकारी अभियन्ताको रुपमा नगरबासीबिच परिचित छु ।

तपाईको चर्चा उपमहानगरभित्र निकै रहेछ, किन ?
एउटा सामाजिक र सहकारी अभियन्ता, यही उपमहानगरका सबै नागरिकको सुखदुःखको साथी, समाजलाई समृद्ध बनाउने अभियानमा हिडेको एउटा अभियन्ताका रुपमा चिन्नुहुन्छ भन्ने मलाई लाग्छ । उपमहानगरबासीबाट धेरै राम्रो प्रतिक्रिया पाएको छु, मलाई धेरै उर्जा मिलेको छ । जनताको मनमा बस्न सकेको छु जस्तो लाग्छ । सामाजिक गतिविधिमा सक्रिय भएर लागेकै कारण सबैले चिन्नुहुन्छ र सबैको विश्वास पनि जित्न सकेको छु ।

उपमहानगर प्रमुखको नेतृत्व लिन चुनावी प्रतिस्पर्धामा हुनुहुन्छ, तपाईको जित्ने आधार के हुन् ?
सबैभन्दा पहिलो ठूलो आधार भनेको जनताले मलाई विश्वास गर्नुहुन्छ, साथ दिनुभएको छ । त्यसबाहेक अन्य थुप्रै आधार छन् । जसले मलाई उपमहानगरको नेतृत्व गर्नका निम्ति उत्साह थपिरहेको छ । यस उपमहानगरलाई समृद्ध बनाउने हो र महानगरको आधार खडा गर्ने हो । यस उपमहानगरको समस्या र सम्भावनाका बारेमा निकै जानकार छु, त्यसैअनुसारको योजना बनाएको छु । त्यसलाई पूरा गर्न सके भने यो उपमहानगर नेपालकै उत्कृष्ट उपमहानगर बन्नेछ, जुन मेरो लक्ष्य हो ।

यस उपमहानगरको खास समस्या के हो र सम्भावना के हुन् ?
जनसंख्याको आधारमा मात्रै उपमहानगरपालिका बनेको र पूवार्धारले सम्पन्न नभएका कारण यस उपमहानगरमा समस्या धेरै छ । उपमहानगरबासीको मुख्य समस्या अव्यवस्थित बसोबास हो । त्यसबाहेक आधारभूत पूर्वाधारको अभाव छ । शिक्षा, स्वास्थ्य, खानेपानी, सडक, विद्यतु, कृषि, उद्योग, रोजगार, पर्यटन, सहकारीलगायतका क्षेत्रमा योजनाका साथ धेरै काम गर्नुपर्छ । दोस्रो अन्र्तराष्ट्रिय विमानस्थल, बिशेष आर्थिक क्षेत्र(सेज), पथलैया‍-वीरगन्ज औद्योगिक करिडोर, पर्सा राष्ट्रिय निकुञ्ज, सिमरा विमानस्थल यसै उपमहानगरभित्र पर्दछन् । त्यसैले उपमहानगरको सम्भावना धेरै छ ।

तपाईका योजना के हो ?
समृद्ध महानगरको आधार निर्माण गर्ने उद्देश्यसहित तीन महिनाभित्र रणनीतिक लक्ष्य, मार्गचित्र, पञ्चवर्षीय आवधिक योजना, अल्पकालीन कार्ययोजना र आवधिक मूल्यांकनको आधारमा काम गर्ने । जेष्ठ नागरिक, युवा, महिला लक्षित कार्यक्रम, मधेसी, थारु बुहारी कार्यक्रम, दलित, आदिवासीजनजाति र सीमान्तीकृत समूदायका लागि प्रभावकारी योजना ल्याउने । कृषिको बढी सम्भावना रहेको उपमहानगरमा बजार व्यवस्थापन, बित्तीय सशक्तीकरणसहित घरेलु उद्यम व्यवसायको प्रवद्र्धन र स्वरोजगारी सिर्जना गर्ने । सहकारीमार्फत समुदायको बित्तीय तथा गैरवित्तीय समाधान दिने र जीवनस्तरमा परिवर्तन ल्याउने र अव्यवस्थित बसोबासलाई ब्यवस्थित गर्ने, खेतीयोग्य जमिनको संरक्षण गर्नका निम्ति प्लटिङको न्युनीकरण गर्ने, व्यवस्थित चक्रपथ, सडक, सामुदायिक भवन, क्लव, खेलमैदान, वाचनालय, व्यायामघर निर्माण गर्ने सोच छ । औद्योगिक क्षेत्रतर्फ वीरगञ्ज-पथलैया औद्योगिक करिडरको प्रवद्र्धनमार्फत उद्योगको पर्याप्त विकास र सम्वद्र्धन गर्न सक्रिय हुने योजना छ ।